କଳ୍ପନା ଜଳ୍ପନାର ଅନ୍ତ, ଯାଜପୁର ବିଧାନସଭା ଆସନରୁ ପୁଣିଥରେ ଲଢିବେ ପ୍ରଣବ ପ୍ରକାଶ

ଯାଜପୁର ଟାଉନ (କେ ନ୍ୟୁଜ୍‌) : ରାଜ୍ୟ ରାଜନୀତିରେ ଯାଜପୁର ଜିଲ୍ଲାର ନେତା ସବୁ ବେଳେ ସେମାନଙ୍କ ଉପସ୍ଥିତିକୁ ଜାହିର କରିଥାନ୍ତି । ବର୍ତମାନ ରାଜ୍ୟ ରାଜନୀତିରେ ଯାଜପୁର ନିର୍ବାଚନ ମଣ୍ଡଳୀକୁ ନେଇ ବେଶ ଚର୍ଚ୍ଚା ଚାଲିଥିବା ବେଳେ ଆଜି ବାକିଥିବା ଦୁଇଟି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା ପରେ ସେଥିରେ ଅନ୍ତ ଘଟିଛି । ଆଜି ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ଯାଜପୁର ବିଧାନସଭା ଆସନ ପାଇଁ ପ୍ରଣବ ପ୍ରକାଶ ଦାସଙ୍କ ନାମ ଘୋଷଣା କରିଛନ୍ତି । ସେଥିପାଇଁ ଯାଜପୁର ବିଜେଡି କର୍ମୀ ଓ ସମର୍ଥକଙ୍କ ମନରେ ଖୁସିର ଲହରି ଖେଳି ଯାଇଛି । ସମର୍ଥକ ଓ କର୍ମୀମାନେ ବାଣ ଫୁଟାଇ, ମିଠା ବାଣ୍ଟି ପ୍ରଣବଙ୍କୁ ଅଭିନନ୍ଦନ ଜଣାଇଛନ୍ତି । ଗତ ନିର୍ବାଚନରେ ସେ ୧ ଲକ୍ଷରୁ ଊର୍ଦ୍ଧ୍ୱ ଭୋଟ ପାଇଥିବା ବେଳେ ନିକଟତମ ପ୍ରତିଦ୍ୱନ୍ଦ୍ୱୀ ମାତ୍ର ୧୯ ହଜାର ଭୋଟ ପାଇଥିଲେ । ତେବେ ଚଳିତ ବର୍ଷ ନିର୍ବାଚନରେ ତ୍ରିମୁଖୀ ଲଢ଼େଇ ହେବାର ସମ୍ଭାବନା ନେଇ ଚର୍ଚ୍ଚା ଚାଲିଛି ।

ଯାଜପୁର ନିର୍ବାଚନ ମଣ୍ଡଳୀ ଉଭୟ ଯାଜପୁର ଓ ଦଶରଥପୁର ବ୍ଲକକୁ ନେଇ ଗଠିତ । ଏହି ନିର୍ବାଚନ ମଣ୍ଡଳୀ ଅଧିକାଂଶ ସମୟ ଅଣକଂଗ୍ରେସ ଦଳ ହାତରେ ରହି ଆସିଛି । ଦୀର୍ଘଦିନ ଧରି ଏହି ଆସନଟି ସଂରକ୍ଷିତ ହୋଇ ରହି ଆସିଥିଲା । ଗତ ୨୦୦୯ ମସିହାରେ ଏହି ଆସନଟି ସାଧାରଣ ବର୍ଗଙ୍କ ପାଇଁ ହେବା ପର ଠାରୁ ପ୍ରାର୍ଥୀଙ୍କ ସଂଖ୍ୟା ବୃଦ୍ଧି ପାଇଛି । ୨୦୦୯ ମସିହାରେ ପୂର୍ବତନ ବିଧାୟକ ତଥା ଜନତା ଦଳ ସଭାପତି ଅଶୋକ ଦାସଙ୍କ ପୁଅ ପ୍ରଣବ ପ୍ରକାଶ ଦାସ ହଠାତ୍ ନିର୍ବାଚନ ପୂର୍ବରୁ ବିଜେଡିରେ ଯୋଗ ଦିଅନ୍ତି ଆଉ ଟିକେଟ ପାଇ ନିର୍ବାଚନ ଜିତି ଯାଆନ୍ତି । ସେତେବେଳେ ସେ ୬୧ ହଜାର ଭୋଟ ପାଇଥିବା ବେଳେ ନିକଟତମ କଂଗ୍ରେସ ପ୍ରାର୍ଥୀ ଦେବବ୍ରତ କଣ୍ଠ ୩୧ ହଜାର ଭୋଟ ପାଇଥିଲେ । ଏହା ପରେ ଗତ ୨୦୧୪ ନିର୍ବାଚନରେ ପ୍ରଣବ ପ୍ରକାଶ ଦାସ ପୁଣି ୧ ଲକ୍ଷରୁ ଊର୍ଦ୍ଧ୍ୱ ଭୋଟ ପାଇ ରେକର୍ଡ ସୃଷ୍ଟି କରିଥିଲେ ।
ଚଳିତ ବର୍ଷ ସେ ପ୍ରାର୍ଥୀ ହେବେ କି ନାହିଁ ତାକୁ ନେଇ ଚର୍ଚ୍ଚା ଚାଲିଥିଲା । ତେବେ କର୍ମୀ, ସମର୍ଥକ ଓ ଯାଜପୁରବାସୀଙ୍କ ଚାପ ପରେ ତାଙ୍କୁ ହିଁ ବିଜେଡି ସଭାପତି ପ୍ରାର୍ଥୀ ଭାବେ ପାଛଥିବା ଚର୍ଚ୍ଚା ହେଉଛି । ଯାଜପୁର ନିର୍ବାଚନ ମଣ୍ଡଳୀ ଅଧୀନରେ ଯାଜପୁର ପୌରପାଳିକା, ଯାଜପୁର ବ୍ଲକ ଓ ଦଶରଥପୁର ବ୍ଲକ ରହିଛି । ଏହି ୩ଟି ସ୍ଥାନରେ ପ୍ରଣବ ନିଜର ପତିଆରା ରଖିଛନ୍ତି ।