ଉତ୍ତର ପ୍ରଦେଶରେ ଗୁଳିକାଣ୍ଡ : ଜମି ଚାଷକୁ ବିରୋଧ କରିବାରୁ ୯ ଗ୍ରାମବାସୀଙ୍କୁ ଗୁଳି କରି ହତ୍ୟା

ଚାଷ ଜମିକୁ ନେଇ ପୂର୍ବ ଉତ୍ତର ପ୍ରଦେଶର ସୋନଭଦ୍ର ଜିଲା ଉଭା ଗାଁରେ ଘଟିଛି ଏକ ଜଘନ୍ୟ ଗୁଳିକାଣ୍ଡ। ଏଥିରେ ୩ ମହିଳାଙ୍କ ସମେତ ୯ ଜଣଙ୍କୁ ଗୁଳି କରି ହତ୍ୟା କରାଯାଇଛି। ଏହି ଘଟଣାରେ ଆଉ ୧୯ ଜଣ ବ୍ୟକ୍ତି ଗୁରୁତର ଭାବେ ଆହତ ହୋଇଛନ୍ତି। ପୋଲିସ ୨ଜଣଙ୍କୁ ଗିରଫ କରିଛି।

ସୋନଭଦ୍ର ପୋଲିସ ଇନ୍ସପେକ୍ଟର ସଲମାନତାଜ୍ ପାଟିଲଙ୍କ ସୂଚନାନୁଯାୟୀ, ଏହି ଘଟଣା ଉଭା ଗାଁଠାରୁ କିଛି ଦୂର ଘୋରାବଲ୍ ଅଞ୍ଚଳରେ ଘଟିଛି। ଗାଁର ମୁଖିଆ ଯଜ୍ଞ ଦତ୍ତ ୨ ବର୍ଷ ପୂର୍ବେ ୩୬ ଏକର ଚାଷ ଜମି କିଣିଥିଲେ। ବୁଧବାର ଜମି ହଳ କରିବାକୁ ସେ ଏବଂ ତାଙ୍କର ସହଯୋଗୀ ଟ୍ରାକ୍ଟର ଯୋଗେ ଆସି ସେଠାରେ ପହଞ୍ଚିଥିଲେ। ତେବେ ଏହି ସମୟରେ କେତେଜଣ ଗ୍ରାମବାସୀ ସେମାନଙ୍କୁ ବିରୋଧ କରିବାରୁ ଯଜ୍ଞ ଦତ୍ତଙ୍କ ସହଯୋଗୀ କ୍ରୋଧିତ ହୋଇପଡ଼ିଥିଲେ। ଏହାପରେ ସେମାନେ ଗାଁ ଲୋକଙ୍କ ଉପରକୁ ଆଖି ବୁଜା ଗୁଳି ଚଳାଇ ଥିଲେ ବୋଲି ପାଟିଲ କହିଛନ୍ତି।

ଏହାସହ ପଢ଼ନ୍ତୁ: ଗାଁରେ ପରିବା ବିକୁଥିବା ବ୍ୟକ୍ତିଙ୍କ ବ୍ୟାଙ୍କ ଆକାଉଣ୍ଟରେ ଆସିଗଲା ୪ କୋଟି, କିଛି କ୍ଷଣ ପରେ ଭାଙ୍ଗିଗଲା ସୁନେଲି ସ୍ବପ୍ନ

ସେପଟେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଘଟଣା ବିଷୟରେ ଅବଗତ ହେବା ପରେ ମୃତକଙ୍କ ପରିବାର ଲୋକଙ୍କୁ ସମବେଦନା ଜଣାଇଛନ୍ତି। ସେ ଜିଲାପାଳଙ୍କୁ ଆହତଙ୍କ ଚିକିତ୍ସା ପାଇଁ ସମସ୍ତ ପ୍ରକାର ସୁବିଧା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି। ଏହା ସହ ରାଜ୍ୟର ପ୍ରମୁଖ ପୋଲିସ ଅଧିକାରୀଙ୍କୁ ଘଟଣାକୁ ବ୍ୟକ୍ତିଗତ ଭାବେ ନେଇ ଏହାର ଉଚ୍ଚସ୍ତରୀୟ ତଦନ୍ତ ଏବଂ ଦୋଷୀଙ୍କ ବିରୋଧରେ ଯଥା ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।

Leave A Reply

Your email address will not be published.