ବର୍ଜ୍ୟବସ୍ତୁରେ ସୁନ୍ଦର କଳାକୃତି, ଦେଖିଲେ ଲାଖିଯିବ ଆଖି

ଅନୁଗୁଳ (କେନ୍ୟୁଜ) : ପରିବେଶ ପ୍ରଦୂଷିତ କରେ ବର୍ଜ୍ୟବସ୍ତୁ । ନିତିଦିନ ଲୋକେ ପଲିଥିନ, ଅଦରକାରୀ ଲୁହାକୁ ଏଣେତେଣେ ଫିଙ୍ଗିବା ସହ କବାଡି ଦୋକାନରେ ବିକ୍ରି କରି ଦେଉଥିବା ଦେଖିବାକୁ ମିଳିଥାଏ । ଯାହାଦ୍ୱାରା ପରିବେଶ ପ୍ରଦୂଷିତ ହେବା ସହ ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ହେଉଛି । ହେଲେ ଅନୁଗୁଳରେ ଏବେ ଏହି ଅଦରକାରୀ ଜିନିଷକୁ ନଫୋପାଡ଼ି ତିଆରି କରାଯାଉଛି ସୁନ୍ଦର ସୁନ୍ଦର ଜିନିଷ। ଯାହାକୁ ଦେଖିଲେ ଆପଣ ବି ନିଜ ଆଖିକୁ ବିଶ୍ୱାସ କରିପାରିବେନି।

ବିଭିନ୍ନ ଅଦରକାରି ଲୁହା ସାମଗ୍ରୀକୁ ନେଇ କାରିଗର ମାନେ ନୂଆ ନୂଆ ରୂପ ଦେବାରେ ଲାଗିଛନ୍ତି। ହାତୀ,ବାଘ,ସିଂହ ସହ ଅନେକ ଐତିହାସିକ କିମ୍ବଦନ୍ତୀ ଆଧାରିତ ସୁନ୍ଦର ସୁନ୍ଦର ସାମଗ୍ରୀ ବନାଉଛନ୍ତି। ଜିଲ୍ଲାପ୍ରଶାସନ ସହଯୋଗରେ ଏହାକୁ ନିର୍ମାଣ କରୁଛନ୍ତି କାରିଗର। ଅନୁଗୁଳ ସହର ଓ ଅନୁଗୁଳ ଷ୍ଟାଡିୟମର ସୌନ୍ଦର୍ଯ୍ୟକରଣରେ ଏହି ସବୁ ସାମଗ୍ରୀକୁ ଲଗାଯିବ ଯାହାଫଳରେ ଲୋକଙ୍କୁ ମଧ୍ୟ ବେଶ ଆକର୍ଷିତ କରିବ।

କାରିଗର ମାନଙ୍କ ହାତର ଯାଦୁରେ ବିଭିନ୍ନ ଅଦରକାରୀ ଜିନିଷ ହୋଇଉଠୁଛି ଜୀବନ୍ତ । ଆଉ ଏସବୁ ସାମଗ୍ରୀକୁ ଦେଖିଲେ ଆଖି ଲାଖିଯାଉଛି। ମହଙ୍ଗା ସାମଗ୍ରୀଠାରୁ ଏହି ହାତ ତିଆରି ସାମଗ୍ରୀ କୌଣସି ଗୁଣରେ କମ୍ ନୁହେଁ।

Leave A Reply

Your email address will not be published.