ଆସନ୍ତା ମାର୍ଚ୍ଚ ୨୭ ତାରିଖରୁ ଆରମ୍ଭ ହେବ ଅନ୍ତରାଷ୍ଟ୍ରୀୟ ବିମାନ ସେବା
କରୋନା ମହାମାରୀ କାରଣରୁ ପ୍ରାୟ ଦୁଇ ବର୍ଷ ହେବ ଅନ୍ତରାଷ୍ଟ୍ରୀୟ ବିମାନ ଉଡାଣ ଉପରେ ରୋକ ଲାଗିଥିଲା । କିନ୍ତୁ ମିଳିଥିବା ଖବରରୁ ଜଣାଯାଇଛିକି ଆସନ୍ତା ମାର୍ଚ୍ଚ ୨୭ ତାରିଖରୁ ପୁଣି ଥରେ ଦେଶରେ ଅନ୍ତରାଷ୍ଟ୍ରୀୟ ବିମାନ ଉଡାଣ ଆରମ୍ଭ ହେବ । ସମସ୍ତ ଦିଗ ପ୍ରତି ଅନୁଧ୍ୟାନ କରି ସରକାର ଏହି ନିଷ୍ପତ୍ତି ନେଇଥିବା ଜଣାଯାଇଛି । ପ୍ରକୃତରେ କରୋନାର ପ୍ରାଦୁର୍ଭାବ କମି ଥିବାରୁ ସରକାର ଏହି ଘୋଷଣା କରିଥିବା ଜଣାଯାଇଛି । ଏଣିକି ମାର୍ଚ୍ଚ ୨୭ ତାରିଖରୁ ଯାତ୍ରୀ ମାନେ ସହଜରେ ବିଦେଶ ଯାତ୍ରାର ସୁବିଧା ପାଇପାରିବେ ।
କହିରଖିବା ଉଚିତ ହେବକି ନାଗରିକ ଉଡ୍ଡୟନ ମହାନିର୍ଦ୍ଦେଶାଳୟ ବା DGCA ବିଶ୍ଵବ୍ୟାପୀ ଦେଖାଦେଇଥିବା କରୋନା ମହାମାରୀ କାରଣରୁ ୨୦୨୦ ମସିହା ମାର୍ଚ୍ଚ ୨୩ ତାରିଖରେ ଅନ୍ତରାଷ୍ଟ୍ରୀୟ ଵେବସାୟିକ ଯାତ୍ରୀ ବିମାନ ଗୁଡିକର ଚାଳନ ଉପରେ ରୋକ ଲଗାଇଥିଲେ । କିନ୍ତୁ ପରେ ଟୀକାକରଣ କାରଣରୁ କରୋନା ଆକ୍ରାନ୍ତ ସଂଖ୍ୟାରେ ପରିବର୍ତ୍ତନ ଦେଖାଦେବା ପରେ ସେବାକୁ ପୁଣି ଥରେ ଆରମ୍ଭ କରିବାକୁ ନିଷ୍ପତ୍ତି ନେଇଛି ମନ୍ତ୍ରାଳୟ । ପୂର୍ବରୁ ଭାରତ ସରକାର କେତେ ଗୁଡିଏ ରାଷ୍ଟ୍ର ସହିତ ଅନ୍ତରାଷ୍ଟ୍ରୀୟ ଉଡ଼ାଣ ସଂଚାଳନ କରିବା ପାଇଁ ଅନୁମତି ପ୍ରଦାନ କରିଥିଲେ ।
