ମାରୁତି ସୁଜୁକିର ବଡ଼ ପ୍ଲାନ୍‌, Tiago EVକୁ ଟକ୍କର ଦେବ ନୂଆ ଇଲେକ୍ଟ୍ରିକ୍‌ କାର୍‌

ଦିନକୁ ଦିନ ପେଟ୍ରୋଲ ଦାମ ବଢ଼ୁଛି । ଏନେଇ ଇଲେକ୍ଟ୍ରିକ୍‌ ସ୍କୁଟି ଏବଂ କାରର ଚାହିଦା ବଢ଼ିଚାଲିଛି । ଅନେକ କମ୍ପାନୀ ଇଲେକ୍ଟ୍ରିକ୍‌ କାର୍‌ ବିକ୍ରି କରି ଖୁବ୍‌ ଲାଭବାନ ହେଉଛନ୍ତି । ତେବେ ଇଲେକ୍ଟ୍ରିକ୍‌ କାର ଲଞ୍ଚ କରିବାରେ ମାରୁତି ସୁଜୁକି ମଧ୍ୟ ପଛରେ ନାହିଁ । ଅନ୍ୟ କାର କମ୍ପାନୀମାନଙ୍କ ଭଳି ମାରୁତି ସୁଜୁକି ମଧ୍ୟ ଖୁବଶୀଘ୍ର ଇଲେକ୍ଟ୍ରିକ୍‌ କାର ଲଞ୍ଚ କରିବ ବୋଲି ପ୍ରସ୍ତୁତ ହେଉଛି ।

ଭାରତର ସବୁଠାରୁ ବଡ କାର କମ୍ପାନୀ ହେଉଛି ମାରୁତି ସୁଜୁକି । କାରଣ ପେଟ୍ରୋଲ କାର ବିକ୍ରି କରିବାରେ ମାରୁତି ଏକ ନମ୍ବର ସ୍ଥାନରେ ଅଛି, କିନ୍ତୁ ଏପର୍ଯ୍ୟନ୍ତ କମ୍ପାନୀ କୌଣସି ଇଲେକ୍ଟ୍ରିକ୍‌ କାର ଲଞ୍ଚ କରି ନାହିଁ । କମ୍ପାନୀ ଏହାର ପ୍ରଥମ ଇଲେକ୍ଟ୍ରିକ୍‌ କାର୍ eVX କୁ ଆଗାମୀ ସମୟରେ ଲଞ୍ଚ୍‌ କରିବ, ଯାହା ପୂର୍ବରୁ ଅଟୋ ଏକ୍ସପୋ ୨୦୨୩ରେ ସାମ୍ନାକୁ ଆସିଥିଲା । ଏହା ବ୍ୟତୀତ ମାରୁତି ଅନ୍ୟ ଏକ ଇଭି ଆଣିବାକୁ ଯାଉଛି ଯାହା ଟାଟା Tiago EVକୁ ଟକ୍କର ଦେବ । କିନ୍ତୁ ଏହି କାର ପାଇଁ ଆପଣଙ୍କୁ ଅପେକ୍ଷା କରିବାକୁ ପଡିବ । ଆଶା କରାଯାଉଛି ମାରୁତିର ଏହି ଇଲେକ୍ଟ୍ରିକ୍‌ ହ୍ୟାଚବ୍ୟାକ୍ କାର୍‌ ୨୦୨୬ରୁ ୨୦୨୭ ମଧ୍ୟରେ ଲଞ୍ଚ ହେବ । ଏହି କାରଟି eWX କନସେପ୍ଟ ଉପରେ ବେସଡ୍‌ ହେବ, ଯାହା ଜାପାନ ମୋବିଲିଟି ସୋ’ ୨୦୨୩ରେ ସାମ୍ନାକୁ ଆସିଥିଲା ।

ମାରୁତି ସୁଜୁକି ଏକ ନୂଆ EV ଆର୍କିଟେକ୍ଚର ପ୍ରସ୍ତୁତ କରୁଛି, ଯାହାର ନାଁ K-EV ଦିଆଯାଇଛି । ଆଗାମୀ ଇଲେକ୍ଟ୍ରିକ୍ କାର୍ ଏହି ଆର୍କିଟେକ୍ଚରକୁ ନେଇ ପ୍ରସ୍ତୁତ ହେବ ବୋଲି ଜଣା ପଡ଼ିଛି । ଏହି କାରକୁ ସ୍କେଟ୍ ବୋର୍ଡ ପ୍ଲାଟଫର୍ମରେ ପ୍ରସ୍ତୁତ କରାଯିବ । କମ୍ପାନୀର ସିଇଓ ସିଭି ରମଣଙ୍କ କହିବା ଅନୁଯାୟୀ, ମାରୁତି ସୁଜୁକିର ସମସ୍ତ ଇଭିଗୁଡ଼ିକ ‘ବର୍ନ ଇଲେକ୍ଟ୍ରିକ୍’ ହେବ। କାରର ଦାମ୍‌ କମ୍‌ କରିବା ପାଇଁ କମ୍ପାନୀ ଏହି ଗାଡ଼ିଗୁଡିକର ପାର୍ଟ୍ସ କୁ ଲୋକାଲ ମାନ୍ୟୁଫ୍ୟାକ୍ଚର କରିବାକୁ ଚାହୁଁଛି । ଏଥିପାଇଁ ମାରୁତି ୧୦,୦୦୦ କୋଟି ଟଙ୍କା ଇନଭେଷ୍ଟ କରିବାକୁ ଯାଉଛି ।

ଏହା ସହିତ ମାରୁତି ଡେନସୋ ଏବଂ ତୋଷିବା ସହିତ ମିଶି ଏକ ନୂଆ ବ୍ୟାଟେରୀ ପ୍ଲାଣ୍ଟ ସେଟ୍‌ କରିଛି , ଯେଉଁଠାରେ ଏହାର ହାଇବ୍ରିଡ୍ ଏବଂ ଇଲେକ୍ଟ୍ରିକ୍‌ କାର ଗୁଡ଼ିକର ବ୍ୟାଟେରୀ ତିଆରି କରାଯିବ । ଏଥିପାଇଁ ଚୀନର କମ୍ପାନୀ BYD ସହିତ ପାର୍ଟନରସିପ୍‌ ମଧ୍ୟ କରିଛି ।

ଅନ୍ୟପଟେ ଟାଟା କମ୍ପାନୀ ନିକଟରେ ହିଁ ଗୋଟିଏ ବର୍ଷରେ ୧୦ ରୁ ୧୫ ହଜାର ଇଲେକ୍ଟ୍ରିକ୍‌ ଟିଆଗୋ ବିକ୍ରି କରିଛି । ପେଟ୍ରୋଲ ଗାଡ଼ି ଦାମ୍‌ ରେ ଇଲେକ୍ଟ୍ରିକ୍‌ କାର ଆଣିବା ପାଇଁ କମ୍ପାନୀ ଚେଷ୍ଟା କରୁଛି । ମାରୁତି ଇଲେକ୍ଟ୍ରିକ୍‌ କାର ଲଞ୍ଚ କରିବାକୁ ପ୍ଲାନ୍‌ କରୁଥିବାବେଳେ ଟାଟା ଗ୍ରାହକଙ୍କୁ ଇଲେକ୍ଟ୍ରିକ୍‌ କାର ଯୋଗାଇ ଲୋକଙ୍କ ମନରେ ଭଲ ସ୍ଥାନ ସୃଷ୍ଟି କରିଛି ।