ଅତି ଆଡ଼ମ୍ବର ସହକାରେ ପାଳିତ ହେଉଛି ପାରମ୍ପାରିକ ଠାକୁରାଣୀ ଯାତ୍ରା, ଜମୁଛି ଶ୍ରଦ୍ଧାଳୁଙ୍କ ଗହଳି
ଢୋଲ-ମହୁରୀ ସାଙ୍ଗକୁ ବାଜା-ବାଜଣାରେ ଅତି ଧୁମଧାମରେ ଚାଲିଛି ଠାକୁରାଣୀଙ୍କ ସାହି ପରିକ୍ରମା । ବିଶ୍ବାସ ରହିଛି, ମା’ଙ୍କ ଏହି ଅଲୌକିକ ଯାତ୍ରା ଦର୍ଶନ କରିବା ସହ ଭକ୍ତି ସହକାରେ ପୂଜା କଲେ ଭକ୍ତଙ୍କ ସମସ୍ତ ମାନସିକ ପୂରଣ ହୋଇଥାଏ । କରୋନା କଟକଣା ଯୋଗୁଁ ଠାକୁରାଣୀଙ୍କ ତ୍ରୟୋବାର୍ଷିକ ଯାତ୍ରା ବନ୍ଦ ରହିଥିଲା । ଚଳିତବର୍ଷ, ସ୍ଥାନୀୟ ବାସିନ୍ଦାଙ୍କ ସହଯୋଗରେ ପୁଣିଥରେ ଆରମ୍ଭ ହୋଇଛି ଏହିଯାତ୍ରା । ସାହି ଯାତ୍ରାରେ ଦୁଲୁକୁଛି ସମଗ୍ର ଗ୍ରାମାଞ୍ଚଳ ।
ଗଞ୍ଜାମ ଜିଲ୍ଲା ଭଞ୍ଜନଗର ସ୍ଥିତ ଭେଜିପୁଟରେ ଅତି ଆଡ଼ମ୍ବର ସହକାରେ ପାଳିତ ହେଉଛି ପାରମ୍ପାରିକ ଠାକୁରାଣୀ ଯାତ୍ରା । ନିର୍ବାଚନର କୋଳାହଳ ସରିବା ପରେ ପରେ ଏବେ ଶକ୍ତି ଉପାସନାରେ ମନ୍ତ୍ରମୁଗ୍ଧ ହୋଇ ଉଠିଛନ୍ତି ଭକ୍ତ । ଭାଇଚାରା ସମ୍ପର୍କରେ ଏକାଠି ହୋଇଛନ୍ତି ସ୍ଥାନୀୟ ଲୋକେ । ପ୍ରତିଦିନ ହଜାର ହଜାର ଶ୍ରଦ୍ଧାଳୁଙ୍କ ଗହଳି ଜମୁଛି । ୨୧ ଦିନିଆ ଏହି ଯାତ୍ରାରେ, ମା’ ବ୍ରହ୍ମଣଦେବୀ ଏବଂ ବୁଢ଼ୀ ମା ଠାକୁରାଣୀଙ୍କୁ ବରଣ କରି ସାହିରେ ନିର୍ମାଣ ହୋଇଥିବା ଅସ୍ଥାୟୀ ମଣ୍ଡପରେ ବିଜେ କରାଯାଇଛି ।
ଆଲୋକମାଳାରେ ସଜ୍ଜିତ ହୋଇଛି ସମୁଦାୟ ଅଞ୍ଚଳ । ବିଶ୍ରାମ ଦିନ ବ୍ୟତୀତ ପ୍ରତ୍ୟେକ ସନ୍ଧ୍ୟାରେ ପଟୁଆରରେ ମା’ଙ୍କ ସାହି ପରିକ୍ରମା କରାଯାଉଛି । ଏହାସହ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ମଧ୍ୟ ହୋଇଛି । ରଙ୍ଗାରଙ୍ଗ କାର୍ଯ୍ୟକ୍ରମ ଦେଖିବାକୁ ପ୍ରତିଦିନ ହଜାର ହଜାର ଦର୍ଶକଙ୍କ ଭିଡ ଜମୁଛି । ଯାତ୍ରାକୁ ଅଧିକ ଆକର୍ଷଣୀୟ କରିବାପାଇଁ, ଦୋଳି ଓ ମୀନାବଜାର ମଧ୍ୟ ବସିଛି । କିଣା-ବିକା ସାଙ୍ଗକୁ ଯାତ୍ରାରେ ବୁଲି ମଜା ନେଉଛନ୍ତି, ଆଖପାଖ ଅଞ୍ଚଳରୁ ଆସୁଥିବା ଲୋକେ ।
ସ୍ଥାନୀୟ ପୋଲିସ ଓ ପ୍ରଶାସନ ପକ୍ଷରୁ ମଧ୍ୟ, ସୁରକ୍ଷା ଦାୟିତ୍ବକୁ ଗୁରୁତ୍ଵ ଦିଆଯାଇଛି । ୧୭ ତାରିଖରୁ ଆରମ୍ଭ ହୋଇଥିବା ଭେଜିପୁଟ୍ ର ଏହି ବ୍ରହ୍ଣଣୀଦେବୀ ଠାକୁରାଣୀ ଯାତ୍ରା, ଆସନ୍ତା ୯ ତାରିଖରେ ଉଦଯାପିତ ହେବ । ଏଥିପାଇଁ ଆୟୋଜିତ ହୋଇଥିବା ମା’ଙ୍କ ଯାତ୍ରା, ସାହି-ପରିକ୍ରମା, ସାଂସ୍କୃତିକ କାର୍ଯ୍ୟକ୍ରମ ଏବଂ ମୀନା-ବଜାର ମେଳାକୁ ସ୍ଥାନୀୟ କମିଟି ଏବଂ ପୋଲିସ ଓ ପ୍ରଶାସନ ପକ୍ଷରୁ ସଠିକ୍ ଢଙ୍ଗରେ ପରିଚାଳନା କରାଯାଉଛି ।