ଲୋନ୍ ସୁଝି ପାରିଲେନି ଅଭିନେତା ରାଜପାଲ ଯାଦବ, ଘର ହେଲା ସିଜ୍
ମୁମ୍ବାଇର ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ ଟିମ୍ ବଲିଉଡ ଅଭିନେତା ରାଜପାଲ ଯାଦବଙ୍କ କଚେରି ଓଭରବ୍ରିଜ ନିକଟରେ ଥିବା ସେଥ୍ ଏନକ୍ଲେବ୍ କଲୋନୀରେ କୋଟି କୋଟି ଟଙ୍କାର ସମ୍ପତ୍ତି ସିଲ୍ କରିଛି । ତେବେ ରାଜପାଲ ଫିଲ୍ମ ତିଆରି କରିବା ପାଇଁ ୩ କୋଟି ଲୋନ୍ ନେବା ପାଇଁ ନିଜ ସମ୍ପତ୍ତି ଏବଂ ଘରକୁ ବନ୍ଧା ପକାଇଥିଲେ । କିନ୍ତୁ ବର୍ତ୍ତମାନ ଅଭିନେତା ଏହି ଲୋନ୍ ସୁଝିନପାରିବା ଯୋଗୁ ତାଙ୍କ ଘରକୁ ସିଲ୍ କରାଯାଇଛି । ଏବେ ଏହି ଖବର ସବୁ ସ୍ଥାନରେ ଚର୍ଚ୍ଚାର ବିଷୟ ପାଲଟିଛି ।
ରାଜପାଲ ତାଙ୍କ ବାପା ଓ ମା’ଙ୍କ ନାମରେ ତିଆରି କରିଥିବା ଶ୍ରୀ ନୌରାଙ୍ଗ ଗୋଦାବରୀ ଏଣ୍ଟରଟେନମେଣ୍ଟ ଲିମିଟେଡ ପ୍ରଡକ୍ସନ୍ ହାଉସରେ ଏହି ଫିଲ୍ମ ନିର୍ମାଣ କରିଥିଲେ । ତେବେ ଏହି ପ୍ରଡକ୍ସନ୍ ହାଉସ୍ ତାଙ୍କ ସ୍ତ୍ରୀ ରାଧା ଯାଦବଙ୍କ ନାମରେ ରହିଛି । ଏହି ଫିଲ୍ମର ନିର୍ଦ୍ଦେଶନା ଦେବା ସହିତ ରାଜପାଲ ଏବଂ ଓମ୍ ପୁରୀ ମୁଖ୍ୟ ଭୂମିକାରେ ନଜର ଆସିଥିଲେ । ଶାହାଜାହାନପୁରର ସମସ୍ତ କଳାକାର ଏହି ଫିଲ୍ମରେ କାମ କରିବାର ସୁଯୋଗ ପାଇଥିଲେ ।
ଏପରି ମଧ୍ୟ କୁହାଯାଉଛି ଯେ ଏହି ଫିଲ୍ମର ପ୍ରଡକ୍ସନ୍ ପାଇଁ ଅଭିନେତା ମୁମ୍ବାଇର ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆରୁ ୩ କୋଟି ଟଙ୍କା ଲୋନ୍ ନେଇଥିଲେ । ସେ ଗ୍ୟାରେଣ୍ଟି ଭାବରେ ତାଙ୍କ ବାପାଙ୍କ ନାମରେ ଥିବା ଜମି ଏବଂ କୋଠା ବନ୍ଧକ ରଖିଥିଲେ । ତେବେ ଲୋନ୍ ସୁଝି ନପାରିବା କାରଣରୁ ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ, ବାନ୍ଦ୍ରା କୁର୍ଲା କମ୍ପ୍ଲେକ୍ସ, ମୁମ୍ବାଇ ଶାଖା ଟିମ୍ ଅଗଷ୍ଟ ୮ ରେ ସଦର ବଜାର ପୋଲିସକୁ ନୋଟିସ୍ ପଠାଇ ଫୋର୍ସ ଦାବି କରିଥିଲା । ପରେ, ବ୍ୟାଙ୍କ ଟିମ୍ ପୋଲିସକୁ ନ ନେଇ ସେଥ୍ ଏନକ୍ଲେଭରେ ଥିବା କୋଟି କୋଟି ମୂଲ୍ୟର ସମ୍ପତ୍ତିକୁ ଗୁପ୍ତରେ ସିଲ୍ କରିଥିଲେ । ସୂଚନାନୁସାରେ, ରାଜପାଲ ୩ କୋଟି ଟଙ୍କା ଲୋନ୍ ନେଇଥିଲେ ଯାହା ଏବେ ୧୧ କୋଟି ଟଙ୍କାକୁ ବୃଦ୍ଧି ପାଇଛି ।
ରାଜପାଲ ଯାଦବଙ୍କ ସମ୍ପତ୍ତି କଚେରି ଓଭରବ୍ରିଜ ନିକଟରେ । ଏପରି ମଧ୍ୟ ସୂଚନା ରହିଛି ଯେ ମାର୍ବଲ ବିକ୍ରେତାଙ୍କୁ ଭଡା ଉପରେ ବାହାର ସ୍ଥାନ ଦିଆଯାଇଛି । ବ୍ୟାଙ୍କ ଟିମ୍ ବିଲ୍ଡିଂର ଗେଟ୍ରେ ତାଲା ଦେଇଛନ୍ତି । ଏହି କାମ ଏତେ ଶୀଘ୍ର ହୋଇଥିଲା ଯେ ଘର ଭିତରେ ଚାଲୁଥିବା କୁଲର୍ ମଧ୍ୟ ବନ୍ଦ କରାଯାଇନଥିଲା । ଯଦି ଅଭିନେତା ରାଜପାଲଙ୍କ ବିଷୟରେ କହିବା, ତାହେଲେ ସେ ତାଙ୍କ ଅଭିନୟ ଜରିଆରେ ଅନେକ ଲୋକଙ୍କ ମନ ଜିତିଛନ୍ତି । ଏହା ସହ ଫ୍ୟାନ୍ସ ତାଙ୍କ ଫିଲ୍ମକୁ ପସନ୍ଦ କରିବା ସହିତ ତାଙ୍କୁ ମଧ୍ୟ ବହୁତ ଭଲ ପାଇବା ଦିଅନ୍ତି ।
