ସଲମାନଙ୍କୁ ହତ୍ୟା କରିବା ଷଡଯନ୍ତ୍ର ପର୍ଦ୍ଦାଫାସ୍, ୪ ଗିରଫ
ବଲିଉଡ ଭାଇଜାନଙ୍କୁ ହତ୍ୟା କରିବା ଷଡଯନ୍ତ୍ର ଉଦ୍ୟମ ପଣ୍ଡ । ନଭି ମୁମ୍ବାଇରେ ଥିବା ପନ୍ଭେଲ ସ୍ଥିତ ଫାର୍ମ ହାଉସରେ ଅଭିନେତା ସଲମାନ ଖାନଙ୍କ ଗାଡି ଉପରେ ଆକ୍ରମଣ କରାଯିବାକୁ ଯୋଜନା କରାଯାଇଥିଲା । ଏହା ପୂର୍ବରୁ ପୋଲିସ ପର୍ଦ୍ଦାଫାସ୍ କରିନେଇଛି । ଏହି ମାମଲାରେ ନଭି ମୁମ୍ବାଇ ପୋଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ।
ଖବର ମୁତାବକ, ସଲମାନ ଖାନଙ୍କୁ ହତ୍ୟା କରିବା ପାଇଁ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ପ୍ଲାନ୍ କରିଥିଲା । ଏଥିପାଇଁ ସେ ପାକିସ୍ତାନରୁ ଅସ୍ତ୍ରଶସ୍ତ୍ର ମଗାଇଥିଲା । ପନ୍ଭେଲରେ ସଲମାନ ଖାନଙ୍କ କାର ଉପରେ ଆକ୍ରମଣ କରିବାକୁ ଲରେନ୍ସ ବିଷ୍ଣୋଇ ଗ୍ୟାଙ୍ଗ ଯୋଜନା କରିଥିଲା । ଏହି ମାମଲାରେ ଗୁଇନ୍ଦା ସୂଚନା ମିଳିବା ପରେ ପୋଲିସ ଅଭିଯୋଗ ଦାୟର କରି ୪ ଜଣଙ୍କୁ ଗିରଫ କରିଛି । ଏମାନେ ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହ ମିଶିଥିବା ପୋଲିସ ଦାବି କରିଛି । ତେବେ ଏମାନେ ଲରେନ୍ସ ବିଷ୍ଣୋଇ ଗ୍ୟାଙ୍ଗର ଲୋକ ବୋଲି ଜଣାପଡିଛି ।
ସଲମାନଙ୍କୁ ଆକ୍ରମଣ କରିବା ପାଇଁ ପାକିସ୍ତାନର ଅସ୍ତ୍ରଶସ୍ତ୍ର ଡିଲର ସହିତ ଯୋଗାଯୋଗରେ ଥିଲେ । ସେ ତାଙ୍କ ଠାରୁ AK-47, M-16, AK-92 ଏବଂ ଅନ୍ୟାନ୍ୟ ଅତ୍ୟାଧୁନିକ ଅସ୍ତ୍ର କିଣି ଅଭିନେତା ସଲମାନ ଖାନଙ୍କୁ ହତ୍ୟା କରିବା ପାଇଁ ପ୍ଲାନ କରିଥିଲା । ଏମାନଙ୍କୁ ପୋଲିସ ଗିରଫ କରି ୧୪ ଦିନିଆ ନ୍ୟାୟିକ ହେପାଜତକୁ ପଠାଇଛି । ପୋଲିସ ଏହି ମାମଲାରେ ଯାଞ୍ଚ ଆରମ୍ଭ କରିଛି । ପୋଲିସ ଏହି ମାମଲାରେ ଆଇପିସି ଧାରା ୧୧୫, ୧୨୦(ବି), ୫୦୬ (୨) ଅଧିନରେ ଏଫଆଇଆର ଦାୟର କରିଛି ।
ସୂଚନାଯୋଗ୍ୟ, ଏପ୍ରିଲ ୧୪ରେ ବାନ୍ଦ୍ରାରେ ଅଭିନେତା ସଲମାନ ଖାନଙ୍କ ଘର ବାହାରେ ଫାୟାରିଂ ହୋଇଥିଲା । ଦୁଇ ବାଇକ ଆରୋହୀ ଗୁଳିମାଡ କରିଥିଲେ । ପ୍ରାୟ ୨-୩ ରାଉଣ୍ଡ ଫାୟାରିଂ ହୋଇଥିଲା । ଏହି ଘଟଣାପରେ ସଲମାନଙ୍କ ପରିବାର, ବଲିଉଡ ଇଣ୍ଡଷ୍ଟ୍ରୀ, ଫ୍ୟାନ୍ସ ତାଙ୍କ ସୁରକ୍ଷାକୁ ନେଇ ଚିନ୍ତାରେ ପ୍ରକଟ କରିଥିଲେ । ଘଟଣାକୁ ନେଇ ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇ ନିଜକୁ ଦାୟୀ କରିଥିଲା । ସଲମାନଙ୍କ ଘର ବାହାରେ ଗୁଳିଚାଳନା ପୂର୍ବରୁ ଦୁହେଁ ଗତ ଏକ ମାସ ହେବ ମୁମ୍ବାଇ ନିକଟସ୍ଥ ପନଭେଲ ଅଞ୍ଚଳର ଏକ ସୋସାଇଟିରେ ଭଡ଼ାରେ ରହୁଥିଲେ । ଏହି ଅଞ୍ଚଳରେ ସଲମାନଙ୍କ ଫାର୍ମହାଉସ ରହିଛି ।