‘ଭୁଲ୍ ଭୁଲୈୟା-୩’ର ପୋଷ୍ଟର ରିଲିଜ୍, ଦୀପାବଳିରେ ଧମାକା କରିବାକୁ ଆସୁଛନ୍ତି ରୁହ୍ ବାବା
କାର୍ତ୍ତିକ ଆର୍ଯ୍ୟନଙ୍କ ଫିଲ୍ମ ‘ଭୁଲ୍ ଭୁଲୈୟା-୩’ର ପୋଷ୍ଟର ରିଲିଜ ହୋଇଛି । ଚଳିତ ବର୍ଷ ଦୀପାବଳିରେ ମୁକ୍ତିଲାଭ କରୁଥିବା ଏହି ଚଳଚ୍ଚିତ୍ର ଦର୍ଶକଙ୍କୁ ପୁଣି ଥରେ ହସାଇବାକୁ ପ୍ରସ୍ତୁତ ହୋଇଛି । କାର୍ତ୍ତିକ ଆର୍ଯ୍ୟନ ନିଜର ଇନଷ୍ଟାଗ୍ରାମରେ ଏହାର ପୋଷ୍ଟର ସେୟାର କରିଛନ୍ତି । ଏହି ପୋଷ୍ଟରକୁ ସେୟାର କରି କାର୍ତ୍ତିକ ଆର୍ଯ୍ୟନ୍ ଲେଖିଛନ୍ତି, ‘ଦରଓ୍ୱାଜା ଖୁଲେଗା…ଇସ୍ ଦିଓ୍ୱାଲି’ ।
ନିର୍ଦ୍ଦେଶକ ଅନିସ୍ ବଜମିଙ୍କ ଏହି ଫିଲ୍ମ ବକ୍ସ ଅଫିସରେ ଧମାକା କରିବାକୁ ଆସୁଛି । ଏହା ପୂର୍ବରୁ ଫିଲ୍ମର ଦ୍ୱିତୀୟ ଭାଗ ସୁପରହିଟ୍ ରହିଥିଲା । ଭୁଲ୍ ଭୁଲୈୟାର ପ୍ରଥମ ଭାଗରେ ଅକ୍ଷୟ କୁମାର ମୁଖ୍ୟ ଭୂମିକାରେ ଅଭିନୟ କରିଥିଲେ । ପରେ କାର୍ତ୍ତିକ ଆର୍ଯ୍ୟନ୍ ଓ କିଆରା ଆଡଭାନୀ ଦ୍ୱିତୀୟ ଭାଗରେ ମୁଖ୍ୟ ଭୂମିକାରେ ନଜର ଆସିଥିଲେ । ବର୍ତ୍ତମାନ କାର୍ତ୍ତିକ ଭୁଲ୍ ଭୁଲୈୟା-୩ ସହିତ ବଡ଼ ପରଦାକୁ ଫେରୁଛନ୍ତି ।
ନିର୍ଦ୍ଦେଶକ ପ୍ରିୟର୍ଦଶନଙ୍କ ଫିଲ୍ମ ‘ଭୁଲ୍ ଭୁଲୈୟା’ ୨୦୦୭ ଅକ୍ଟୋବର ୧୨ରେ ରିଲିଜ୍ ହୋଇଥିଲା । ଫିଲ୍ମରେ ଅକ୍ଷୟ କୁମାର, ବିଦ୍ୟା ବାଲନ୍, ଅମିଷା ପଟେଲ ଓ ଶିନି ଅହୁଜାଙ୍କ ଭଳି କଳାକାର ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଥିଲେ । ଏହି ଚଳଚ୍ଚିତ୍ରଟି ବକ୍ସ ଅଫିସରେ ସୁପରହିଟ୍ ହୋଇଥିଲା ।
ଏହାପରେ ଭୁଲ୍ ଭୁଲୈୟାର ଦ୍ୱିତୀୟ ଭାଗ ୨୦୨୨ ମେ’ ୨୦ରେ ମୁକ୍ତିଲାଭ କରିଥିଲା । ଏହି ଫିଲ୍ମ ମଧ୍ୟ ଆଶ୍ଚର୍ଯ୍ୟଜନକ ଆୟ କରିଥିଲା । ଏବେ ଚଳଚ୍ଚିତ୍ରର ତୃତୀୟ ଭାଗ ମଧ୍ୟ ଚଳିତ ବର୍ଷ ଦୀପାବଳିରେ ରିଲିଜ୍ ହେବାକୁ ଯାଉଛି ।
