ପତ୍ନୀଙ୍କ ବିୟୋଗରେ ୩୧ ବର୍ଷ ଧରି ଯନ୍ତ୍ରଣା ଭୋଗୁଛନ୍ତି ଶଶି କପୁର, ଜାଣନ୍ତୁ କଣ ରହିଥିଲା ତାଙ୍କ ପ୍ରେମ କାହାଣୀ

ଜୀବନର ଚଲାପଥରେ ସାଥି ହୋଇ ଚାଲୁଥିବା ସାଥୀଟିଏ ଯେତେବେଳେ ଆମକୁ ଛାଡି ଚାଲି ଯାଇଥାଏ ସେତେବେଳେ ଆଗକୁ ବଢିବାର ଇଚ୍ଛାଶକ୍ତି ର୍ଦୁବଳ ହୋଇପଡେ । ଆମେ ଆଜି ବଲିଉଡର ଲୋକପ୍ରିୟ ଅଭିନେତା ଶଶି କପୁରଙ୍କ ପ୍ରେମ କାହାଣୀ ବିଷୟରେ କହିବୁ ଯାହାଙ୍କ ଚଲାପଥରେ ଧର୍ମପତ୍ନି ଜେନିଫର ସାଥିହୋଇ ଚାଲିଥିଲେ ସତ କିନ୍ତୁ ମଝିରାସ୍ତାରେ ହାତଛାଡି ସବୁଦିନ ପାଇଁ ତାଙ୍କୁ ଏକା କରି ଆର ପାରିକୁ ଚାଲିଯାଇଥିଲେ । ୧୯୮୪ ମସିହା ସେପ୍ଟେମ୍ବର ୭ ଅର୍ଥାତ ଦୀର୍ଘ ୩୧ ବର୍ଷ ପୂର୍ବେ ଆଜି ଦିନରେ ଜେନିଫର ଶଶିଙ୍କୁ ସବୁଦିନ ପାଇଁ ଏକା ଛଡି ଚାଲିଯାଇଥିଲେ । ଦୀର୍ଘ ୩୧ ବର୍ଷରୁ ଶଶି କପୁର ଏକାକି ଯନ୍ତ୍ରଣା ଭୋଗୁଛନ୍ତି ।

୧୯୫୬ ମସିହାରେ ଜେନିଫର କ୍ୟାଣ୍ଡଲ ନିଜ ବନ୍ଧୁ ସହ ‘ଦିବାର’ ନାଟକ ଦେଖିବା ପାଇଁ ରୋୟଲ ଅପେରା ଦେଖିବାକୁ ଯାଇଥିଲେ ।ଶଶି କପୁରଙ୍କୁ ‘ଦିବାର’ ନାଟକରେ ଅଭିନୟ କରୁଥିବା ସମୟରେ ୧୮ ବର୍ଷ ବୟସ ହୋଇଥିଲା । ନାଟକ ଆରମ୍ଭ ହେବା ପୂର୍ବରୁ ଶଶି ଦର୍ଶକଙ୍କ ଗହଳିର ଧାରଣା ଲଗାଇବା ପାଇଁ ପରଦା ଭିତରୁ ଠିଆ ହୋଇ ଦେଖୁଥିଲେ । ହଠାତ୍‌ ସେହି ସମୟରେ ଚତୁର୍ଥ ଧାଡିରେ ବସିଥିବା ଜଣେ ଝିଅ ଉପରେ ତାଙ୍କ ନଜର ପଡିଥିଲା ଓ ପ୍ରଥମ ଦେଖାରୁ ହିଁ ଶଶି ଜେନିଫରଙ୍କୁ ନିଜ ହୃଦୟ ଭେଟି ଦେଇଥିଲେ ।

ସେହି ସମୟରେ ଶଶି କପୁର ପୃଥିବି ଥିଏଟରରେ ଏକ ଛୋଟ କଳାକାର ଭାବେ କାମ କରୁଥିଲେ ଓ ଅନ୍ୟ ପକ୍ଷରେ ଜେନିଫର ନିଜ ପିତା ଜେଫ୍ରି କ୍ୟାଣ୍ଡଲଙ୍କ ଥିଏଟରରେ ମୁଖ୍ୟ ଅଭିନେତ୍ରୀର ଭୂମିକାରେ ଅଭିନୟ କରୁଥିଲେ । ଅନେକ ଚେଷ୍ଟା ଓ ଅପେକ୍ଷା ପରେ ଶଶି ଜେନିଫରଙ୍କ ସହିତ ବନ୍ଧୁତା କରିବାରେ ସଫଳ ହୋଇଥିଲେ । ବନ୍ଧୁତା ହେଲା ପରେ ଦୁହେଁ ସାଥି ହୋଇ ଯିବା ଆସିବା କରୁଥିଲେ ଓ ପରେ ଉଭୟଙ୍କ ମଧ୍ୟରେ ପ୍ରେମ ସର୍ମ୍ପକ ଗଡି ଉଠିଥିଲା ।

ଜେନିଫରଙ୍କ ପ୍ରେମ ସକାଶେ ଶଶି ତାଙ୍କ ବାପାଙ୍କ ଥିଏଟର ସହିତ ଧୀରେ ଧୀରେ ଯୋଡି ହୋଇ ଯାଇଥିଲେ କିନ୍ତୁ ଜେଫ୍ରି କ୍ୟାଣ୍ଡଲ ନିଜ ଝିଅ ଜେନିଫରଙ୍କୁ ବହୁତ ଭଲ ପାଉଥିଲେ ତେଣୁ ଶଶିଙ୍କ ସହିତ ଜେନିଫରଙ୍କ ବିବହକୁ ସେ ସହମତି ଦେଉ ନଥିଲେ । ନିଜ ପିତାଙ୍କ ସହମତି ନ ମିଳିବାରୁ ଜେନିଫର ୧୯୫୮ ମସିହାରେ ନିଜ ବାପାଙ୍କ ଘର ଛାଡି ଶଶିଙ୍କୁ ବିବାହ କରଥିଲେ । ଅନ୍ୟପକ୍ଷରେ କପୁର ପରିବାର ବହୁ କଷ୍ଟରେ ବିଦେଶୀ ବହୁକୁ ଗ୍ରହଣ କରିବାକୁ ରାଜି ହୋଇଥିଲେ । ବିବାହାର ଏକ ବର୍ଷ ପରେ ଶଶି ଓ ଜେନିଫର ମାତା ପିତା ହୋଇଥିଲେ । କୁହାଯାଏ ଯେ ପୁରୁଷର ସଫଳତା ପଛରେ ଏକ ସ୍ତ୍ରୀର ହାତ ରହିଥାଏ । ଶଶିଙ୍କ କ୍ଷେତ୍ରରେ ଏହା ର ଯର୍ଥାଥତା ଦେଖିବାକୁ ମିଳିଛି ।ଶଶିଙ୍କ ପାଇଁ ଜେନିଫର ନିଜ ଥିଏଟର କାମକୁ ମଧ୍ୟ ଜଳାଞଳି ଦେଇଥିଲେ । ଏହା ପରେ ଶଶି ନିଜ ଫିଲ୍ଵ କ୍ୟାରିୟରରେ ଅନେକ ନାମ ଅର୍ଜନ କରିବାକୁ ଲାଗିଲେ , ଦେଶ ବିଦେଶରେ ମଧ୍ୟ ତାଙ୍କ ଚର୍ଚ୍ଚା ହେବାକୁ ଲାଗିଲା । ତାଙ୍କର ଏତେ ବଡ ସଫଳତା ପଛରେ ଜେନିଫରଙ୍କ ଅନେକ ଅବଦାନ ରହିଥିଲା ।

କିନ୍ତୁ କିଛି ସମୟ ପରେ ସତେ ଯେମିତି ତାଙ୍କ ହସଖୁସିର ସଂସାରରେ କାହାର ଖରାପ ଦୃଷ୍ଟି ପଡିଯାଇଥିଲା । ୧୯୮୨ ମସିହାରେ ଜେନିଫର କର୍କଟ ରୋଗରେ ପିଡିତ ଥିବାର ଜଣା ପଡିଥିଲା । ମୁମ୍ବାଇ ଠାରୁ ଆରମ୍ଭ କରି ଲଣ୍ଡନ ପର୍ଯ୍ୟନ୍ତ ଚିକିତ୍ସା କଲା ପରେ ମଧ୍ୟ ତାଙ୍କ ସ୍ୱାସ୍ଥବସ୍ଥାରେ ସୁଧାରତା ଦେଖାଯାଇ ନଥିଲା । ୧୯୮୪ ମସିହା ସେପ୍ଟେମ୍ବର ୭ରେ ଜେନିଫରଙ୍କ ଜୀବନ ଦୀପ ଲିଭି ଯାଇଥିଲା । ଶଶିଙ୍କ ଜୀବନରେ ଅନ୍ଧକାର ଖେଳେଇ ଦେଇ ସବୁଦିନ ପାଇଁ ତାଙ୍କୁ ଛାଡି ଚାଲି ଯାଇଥିଲେ । ୨୮ ବର୍ଷଧରି ତାଙ୍କ ସୁଖ ଦୁଃଖରେ ସାଥି ହୋଇ ଚାଲିଥିବା ପତ୍ନିଙ୍କ ବିୟୋଗରେ ଶଶି ସମ୍ପୂର୍ଣ୍ଣ ରୂପରେ ଭାଙ୍ଗି ପଡିଥିଲେ ଓ ଗତ ୩୧ ବର୍ଷରୁ ସେଏକାକି ଜୀବନ ବିତାଉଛନ୍ତି ।