ଆଦିତ୍ୟ ପାଞ୍ଚୋଲୀଙ୍କ ବିରୋଧରେ ଦୁଷ୍କର୍ମ ଅଭିଯୋଗ, ମାମଲା ରୁଜୁ କଲା ମୁମ୍ବାଇ ପୋଲିସ୍
ପୁଣି ବିବାଦରେ ଆଦିତ୍ୟ ପାଞ୍ଚୋଲି । ୧୦ ବର୍ଷ ତଳର ଦୁଷ୍କର୍ମ ମାମଲାରେ ଫସିଲେ ବଲିଉଡ୍ ଅଭିନେତା । ଆଦିତ୍ୟଙ୍କ ବିରୋଧରେ ଦୁଷ୍କର୍ମ ମାମଲା ରୁଜୁ କରିଛି ମୁମ୍ବାଇ ବର୍ସୋବା ପୋଲିସ୍ । ତେବେ କିଏ ଏହି ମାମଲା ରୁଜୁ କରିଛି ତାହା ଏଯାଏଁ ସ୍ପଷ୍ଟ ହୋଇନାହିଁ । ଜଣେ ଅଭିନେତ୍ରୀଙ୍କୁ ଯୌନ ନିର୍ୟାତନା ଦେଇଥିବା ଆଦିତ୍ୟଙ୍କ ବିରୋଧରେ ଅଭିଯୋଗ ହୋଇଛି ।
ତେବେ ଆଦିତ୍ୟଙ୍କ ବିରୋଧରେ ଏହା ପ୍ରଥମ ବିବାଦ ନୁହେଁ । ଏହା ପୂର୍ବରୁ ମଧ୍ୟ ଅନେକ ସମୟରେ ବିବାଦ ଘେରରେ ରହି ଆସିଛନ୍ତି ଆଦିତ୍ୟ । ଖାସ୍ କରି କଙ୍ଗନା ରଣାୱତଙ୍କ ସହ ସମ୍ପର୍କକୁ ନେଇ ସର୍ବଦା ଚର୍ଚ୍ଚାରେ ଥାନ୍ତି ଆଦିତ୍ୟ । କିଛି ଦିନ ତଳେ କଙ୍ଗନା ଏବଂ ତାଙ୍କ ଭଉଣୀ ରଙ୍ଗୋଲୀଙ୍କ ବିରୋଧରେ ମାନହାନୀ ମକଦ୍ଦମା କରି ଚର୍ଚ୍ଚାକୁ ଆସିଥିଲେ ।
ସୂଚନାଯୋଗ୍ୟ, ୨୦୧୭ରେ ଆଦିତ୍ୟ ନିଜ ପତ୍ନୀ ଜରିନା ବାହାବଙ୍କ ସହ ମିଶି କଙ୍ଗନା ଏବଂ ରଙ୍ଗୋଲୀଙ୍କ ବିରୋଧରେ ୪ଟି ମାମଲା ରୁଜୁ କରିଥିଲେ । ଅଭିଯୋଗ ଥିଲା ବିଭିନ୍ନ ପବ୍ଲିକ୍ ପ୍ଲାଟଫର୍ମରେ ଦୁଇ ଭଉଣୀ ଆଦିତ୍ୟ ଏବଂ ତାଙ୍କ ପରିବାର ବିରୋଧରେ ଅନେକ ଆରୋପ ଲଗାଉଥିଲେ ।
ସେହିପରି ନିଜ ପଡୋଶୀଙ୍କ ସହ ମାରପିଟ୍ କରିଥିବା ଅଭିଯୋଗରେ ୨୦୧୬ରେ ଦୋଷୀ ସାବ୍ୟସ୍ତ ହୋଇଥିଲେ ଆଦିତ୍ୟ । କେବଳ ସେତିକି ନୁହେଁ ଜୁହୁରେ ଅବସ୍ଥିତ ଏକ ଫାଇଭଷ୍ଟାର୍ ହୋଟେଲରେ ମାରପିଟ୍ ଏବଂ ଭଙ୍ଗାରୁଜା କରି ଗିରଫ ହୋଇଥିଲେ ଆଦିତ୍ୟ ପାଞ୍ଚୋଲି ।