ଅଭିନେତା ଗୋବିନ୍ଦାଙ୍କୁ ବାଜିଲା ଗୁଳି, ମୁମ୍ବାଇର ଏକ ମେଡିକାଲରେ ଭର୍ତ୍ତି
ଅଭିନେତା ଗୋବିନ୍ଦାଙ୍କୁ ବାଜିଲା ଗୁଳି । ନିଜ ଗୁଳିରେ ବଲିଉଡ୍ ଅଭିନେତା ଗୋବିନ୍ଦା ଆହତ ହୋଇଥିବା ସୂଚନା ମିଳିଛି । ତାଙ୍କ ଆଣ୍ଠୁରେ ଗୁଳି ବାଜିଛି । ତାଙ୍କୁ ମୁମ୍ବାଇ ମେଡିକାଲରେ ଭର୍ତ୍ତି କରାଯାଇଛି ।
ବଲିଉଡ ଇଣ୍ଡଷ୍ଟ୍ରୀରେ ନିଜର ଦମ୍ଦାର ଅଭିନୟ ଏବଂ ଡ୍ୟାନ୍ସ ଯୋଗୁ ଗୋବିନ୍ଦା ସମସ୍ତଙ୍କ ମନ ଜିତିଛନ୍ତି । ଏବେ ଏହି ଅଭିନେତା ଫିଲ୍ମ ସ୍କ୍ରିନରୁ ଦୂରରେ ରହିଛନ୍ତି, ହେଲେ ବେଳେବେଳେ ତାଙ୍କୁ ଟିଭି ପରଦାରେ ଦେଖିବାକୁ ମିଳିଥାଏ । ତେବେ ଏବେ ମଧ୍ୟ ଲୋକମାନେ ତାଙ୍କ ଅଭିନୟକୁ ବହୁତ ପସନ୍ଦ କରନ୍ତି ଏବଂ ବହୁତ ଭଲ ପାଇବା ଦେଇଥାନ୍ତି । ବର୍ତ୍ତମାନ ଏହି ଅଭିନେତାଙ୍କଚ ଏପରି ଏକ ଖବର ଆସିବା ଦ୍ୱାରା ଲୋକମାନଙ୍କର ସମସ୍ତ ଧ୍ୟାନ ତାଙ୍କ ଆଡକୁ ଯାଇଛି ।
ଯାହା ସୂଚନା ମିଳିଛି, ନିଜ ବନ୍ଧୁକ ସଫା କରୁଥିବାବେଳେ ଗୋବିନ୍ଦାଙ୍କୁ ଗୁଳି ଲାଗିଛି । ଯାହାଫଳରେ ବଲିଉଡର ଏହି ବର୍ଷିଆନ୍ ଅଭିନେତା ଆହାତ ହୋଇଛନ୍ତି । ଭୁଲବଶତଃ ତାଙ୍କ ଗୋଡରେ ଗୁଳି ବାଜିଛି । ନିଜ ଲାଇସେନ୍ସପ୍ରାପ୍ତ ବନ୍ଧୁକରୁ ଭୁଲବଶତଃ ଗୁଳି ଫୁଟିଥିବା ସୂଚନା ମିଳିଛି । ସେ ଏବେ ହସ୍ପିଟାଲରେ ଚିକିତ୍ସାଧୀନ ଥିବା ବେଳେ ତାଙ୍କ ଅବସ୍ଥା ସ୍ଥିର ରହିଛି । ତାଙ୍କ ମ୍ୟାନେଜର ଶଶି ସିହ୍ନା ନିଶ୍ଚିତ କରିଛନ୍ତି ଯେ, ଡାକ୍ତର ଗୁଳିଟିକୁ ସଫଳତାର ସହ ବାହାର କରିଦେଇଛନ୍ତି ।
ଜଣେ ଦମଦାର ହିରୋ ଭାବେ ବଲିଉଡ ଅଭିନେତା ଗୋବିନ୍ଦାଙ୍କର ବିଶେଷ କ୍ଷାତି ରହିଛି । ଆଜି ବି ତାଙ୍କର ପ୍ରଶଂସକଙ୍କ ଲମ୍ବା ଲାଇନ ଲାଗେ । ତେବେ ଗୋଟେପଟେ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିବାବେଳେ ଏପଟେ ଖବର ପାଇ ତାଙ୍କର ବନ୍ଧୁକ ଜବତ କରିବା ସହ ପୋଲିସ୍ ଘଟଣାର ତଦନ୍ତ କରୁଛି ।
ଖବର ଅନୁଯାୟୀ, ଗୋବିନ୍ଦା ଏକ କାମକୁ ଯିବାକୁ ବାହାରିଥିବା ସମୟରେ, ପ୍ରାୟ ସକାଳ ୪.୪୫ ରେ ଏହି ଦୁର୍ଘଟଣା ଘଟିଥିଲା । ତେବେ ଏତେ ସକାଳୁ ବନ୍ଧୁକକୁ କଣ ପାଇଁ ବାହାର କରି ସଫା କରୁଥିଲେ ସେନେଇ କୌଣସି ସୂଚନା ମିଳିନଥିବାବେଳେ, ଏ ସଂକ୍ରାନ୍ତରେ ଅଭିନେତାଙ୍କ ପରିବାର ପକ୍ଷରୁ ବି କୌଣସି ପ୍ରତିକ୍ରିୟା ମିଳିପାରିନାହିଁ ।
ତେବେ ସୂଚନା ଥାଉକି, ବଲିଉଡର କମେଡି କିଙ୍ଗ ତଥା ସୁପରଷ୍ଟାର ଗୋବିନ୍ଦାଙ୍କ ଫିଲ୍ମ ଦେଖିବାକୁ ପ୍ରାୟତଃ ସମସ୍ତେ ପାଗଳଙେ୍କେ ଭଳି ଅପେକ୍ଷା କରିଥାନ୍ତି । ବଲିଉଡ ଇଣ୍ଡଷ୍ଟ୍ରୀରେ ସେତେବେଳେ ଗୋବିନ୍ଦାଙ୍କ ପାଖରେ ଫିଲ୍ମର ଲାଇନ ଲାଗିଥିଲା । ଗୋବିନ୍ଦାଙ୍କ ଲୋକପ୍ରିୟତା କାହାକୁ ଅଛପା ନାହିଁ । ନିଜର ଅଭିନୟ କରିବା ସମୟରେ ଗୋବିନ୍ଦା ସମସ୍ତଙ୍କୁ ପଛରେ ପକାଇ ଦେଇଥିଲେ ।
ଭାରତୀୟ ସିନେମାରେ ତାଙ୍କର ଯୋଗଦାନ ପାଇଁ ଡକ୍ଟରେଟ ଉପାଧିରେ ବି ସମ୍ମାନିତ କରାଯାଇଛି । ବଲିଉଡର ହିରୋ ନଂ ୧ ଟାଇଟଲ ହାସଲ କରିସାରିଛନ୍ତି । ତାଙ୍କର ଅଭିନୟ ପାଇଁ ଆଜି ମଧ୍ୟ ସମସ୍ତଙ୍କ ହୃଦୟରେ ରାଜ କରୁଛନ୍ତି । ତେବେ ଅଆଜି ସକାଳୁ ସକାଳୁ ତାଙ୍କୁ ଗୁଳି ବାଜିଥିବା ଖବର ପ୍ରଚାର ହେବା ପରେ ସାରା ବଲିଉଡ ଇଣ୍ଡଷ୍ଟ୍ରୀ ସହ ତାଙ୍କ ପ୍ରଶଂସକ ମାନେ ଦୁଃଖ ପ୍ରକାଶ କରିବା ସହ ତାଙ୍କ ଆଶୁ ଆରୋଗ୍ୟ କାମନା କରିଛନ୍ତି ।
