ସଲମାନଙ୍କ ଘର ବାହାରେ ଗୁଳିମାଡ଼ ମାମଲା: ଧରାପଡିଲା ୬ଷ୍ଠ ଅଭିଯୁକ୍ତ, ଆଜି କୋର୍ଟରେ କରାଯିବ ହାଜର

ବଲିଉଡର ଭାଇଜାନ ସଲମାନ ଖାନଙ୍କ ଘର ଉପରକୁ ବୋମା ମାଡ ଘଟଣାରେ ଆଉ ଜଣେ ଅଭିଯୁକ୍ତକୁ ଗିରଫ କରିଛି ମୁମ୍ବାଇ ପୋଲିସ । ଗିରଫ ହୋଇଥିବା ଯୁବକଙ୍କ ବୟସ ୩୪ ବର୍ଷୀୟ ହରପାଲ ସିଂ ବୋଲି ଜଣାପଡିଛି । ଅଭିଯୁକ୍ତର ଘର ହରିୟାଣାର ଫତେହାବାଦରେ ବୋଲି ପୋଲିସ ସୂଚନା ଦେଇଛି ।

ମୁମ୍ବାଇ କ୍ରାଇମବ୍ରାଞ୍ଚର ଏକ ଟିମ ସୋମବାର ସନ୍ଧ୍ୟାରେ ଅଭିଯୁକ୍ତକୁ ଗୃହନଗରରୁ ଗିରଫ କରିଛି । ଗିରଫ ହୋଇଥିବା ହରପାଲଙ୍କୁ ଆଜି ମୁମ୍ବାଇ ଅଣାଯାଇ କୋର୍ଟରେ ହାଜର କରାଯିବ । ତେବେ ଏହି ମାମଲାରେ ମୁମ୍ବାଇ ପୋଲିସ ଏପର୍ଯ୍ୟନ୍ତ ୬ ଜଣଙ୍କୁ ଗିରଫ କରିସାରିଛି ।

ଚଳିତ ମାସ ଆରମ୍ଭରୁ ମୁମ୍ବାଇ ପୋଲିସ ରଫିକ ଚୌଧୁରୀକୁ ଗିରଫ କରିଥିଲା । ରଫିକୁ ମୁମ୍ବାଇ ପୋଲିସ ପଞ୍ଜାବରୁ ଗିରଫ କରିଥିଲା ।

ସୂଚନାଯୋଗ୍ୟ, ଏପ୍ରିଲ ୧୪ରେ ବାନ୍ଦ୍ରାରେ ଅଭିନେତା ସଲମାନ ଖାନଙ୍କ ଘର ବାହାରେ ଫାୟାରିଂ ହୋଇଥିଲା । ଦୁଇ ବାଇକ ଆରୋହୀ ଗୁଳିମାଡ କରିଥିଲେ । ପ୍ରାୟ ୨-୩ ରାଉଣ୍ଡ ଫାୟାରିଂ ହୋଇଥିଲା । ଏହି ଘଟଣାପରେ ସଲମାନଙ୍କ ପରିବାର, ବଲିଉଡ ଇଣ୍ଡଷ୍ଟ୍ରୀ, ଫ୍ୟାନ୍ସ ତାଙ୍କ ସୁରକ୍ଷାକୁ ନେଇ ଚିନ୍ତାରେ ପ୍ରକଟ କରିଥିଲେ । ଘଟଣାକୁ ନେଇ ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇ ନିଜକୁ ଦାୟୀ କରିଥିଲା । ତଦନ୍ତ କରୁଥିବା ପୋଲିସକୁ ଘଟଣା ସ୍ଥଳର କିଛି ଦୂରରେ ବାଇକ ମିଳିଥିଲା । ଏହାର ୨ ଦିନ ପରେ ମୁମ୍ବାଇ ପୋଲିସ ୨ ବାଇକ ଆରୋହୀଙ୍କୁ ଗୁଜରାଟ କଚ୍ଛରୁ ଗିରଫ କରିଥିଲା । ପଚରା ଉଚରାରୁ ସନ୍ଦିଗ୍ଧ ଜଣକ କହିଥିଲା କି, ଏହି ଘଟଣାକୁ ଘଟାଇବା ପରେ ତାପି ନଦୀରେ ବନ୍ଧୁକ ଫୋପାଡି ଦେଇଛି । ଏହାପରେ ମୁମ୍ବାଇ କ୍ରାଇମବ୍ରାଞ୍ଚ ଅଭିଯୁକ୍ତ ବିକ୍କି ଗୁପ୍ତାକୁ ସୁରଟର ତାପି ନଦୀକୁ ନେଇ ଯାଇଥିଲା । ସେଠାରୁ ବନ୍ଧୁକକୁ ଜବତ କରିଥିଲା ।

ସଲମାନଙ୍କ ଘର ବାହାରେ ଗୁଳିଚାଳନା ପୂର୍ବରୁ ଦୁହେଁ ଗତ ଏକ ମାସ ହେବ ମୁମ୍ବାଇ ନିକଟସ୍ଥ ପନଭେଲ ଅଞ୍ଚଳର ଏକ ସୋସାଇଟିରେ ଭଡ଼ାରେ ରହୁଥିଲେ । ଏହି ଅଞ୍ଚଳରେ ସଲମାନଙ୍କ ଫାର୍ମହାଉସ ରହିଛି । ଦୁହେଁ ବଲିଉଡ ଷ୍ଟାରଙ୍କ ଘର ଉପରେ ଲଗାତାରନଜର ରଖିବା ପରେ ଗୁଳିକାଣ୍ଡ ଘଟାଇଥିଲେ । ଫେବୃଆରୀ ୨୯, ୨୦୨୪ର ଏକ ସିସିଟିଭି ଫୁଟେଜ୍ରେ ସାମ୍ନାକୁ ଆସିଥିଲା, ଯାହାକି ହରିୟାଣାର ରୋହତକ ଠାରେ ଏକ ଢାବାର ବୋଲି କୁହାଯାଉଥିଲା । ଏଥିରେ ବିଶାଲ ନାମକ ଜଣେ ଯୁବକ ନଜର ଆସିଥିଲା । ସିସିଟିଭିରେ ରେକର୍ଡ ହୋଇଥିବା ଦୃଶ୍ୟରେ ସେ ଗୁଳି ଚଳାଇଥିବା ଦେଖିବାକୁ ମିଳିଥିଲା । ବିଶାଲ ହେଉଛି ରାଜସ୍ଥାନର ଗ୍ୟାଙ୍ଗଷ୍ଟର ରୋହିତ ଗୋଦାରା ଗୋଷ୍ଠୀର । ରୋହିତ ଗୋଦାରା ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହିତ ଜଡିତ ।