ଆଜି ରିଲିଜ୍ ହେବ ନାହିଁ ସଲମାନ ଖାନଙ୍କ ‘ସିକନ୍ଦର’ର ଟିଜର, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ଦେହାନ୍ତରେ ଦେଶରେ ରାଷ୍ଟ୍ରୀୟ ଶୋକ

By Roshni
salman

ସାରା ଦେଶରେ ଶୋକର ଛାଇ । ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କର ଗତକାଲି ୯୨ ବର୍ଷ ବୟସରେ ପରଲୋକ ହୋଇଛି । ତାଙ୍କ ବିୟୋଗରେ କେନ୍ଦ୍ର ସରକାର ୭ ଦିନିଆ ରାଷ୍ଟ୍ରୀୟ ଶୋକ ଘୋଷଣା କରିଛନ୍ତି । ଏହି କାରଣରୁ ବଲିଉଡ୍ ସୁପରଷ୍ଟାର ସଲମାନ ଖାନଙ୍କର ବହୁ ପ୍ରତୀକ୍ଷିତ ‘ସିକନ୍ଦର’ର ଟିଜର ଆଜି ରିଲିଜ୍ ହେଉନାହିଁ । ନିର୍ମାତା ଏହାର ତାରିଖ ଘୁଞ୍ଚାଇ ଦେଇଛନ୍ତି । ଏହା ସହିତ ନୂଆ ରିଲିଜ୍ ତାରିଖ ମଧ୍ୟ ଘୋଷଣା କରିଛନ୍ତି ।

ସଲମାନ ଖାନଙ୍କ ୫୯ତମ ଜନ୍ମଦିନ ଅବସରରେ ତାଙ୍କ ଚଳଚ୍ଚିତ୍ର ‘ସିକନ୍ଦର’ର ଟିଜର ଡିସେମ୍ବର ୨୭ ଅର୍ଥାତ୍ ଆଜି ରିଲିଜ୍ ହେବାର ଥିଲା । କିନ୍ତୁ ପୂର୍ବତନ ପ୍ରଧାନମନ୍ତ୍ରୀଙ୍କ ଦେହାନ୍ତ ପରେ ଏହି ରିଲିଜକୁ ସ୍ଥଗିତ ରଖାଯାଇଛି । ନିର୍ମାତାମାନେ ‘ସିକନ୍ଦର’ ଟିଜରର ନୂଆ ରିଲିଜ୍ ତାରିଖ ଘୋଷଣା କରିଛନ୍ତି ।

ଏଆର୍ ମୁରୁଗଡୋସଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମର ଟିଜର ଆଜି ରିଲିଜ୍ କରାଯାଉ ନାହିଁ । ପୂର୍ବତନ ପିଏମଙ୍କ ଦେହାନ୍ତ ହେତୁ ଏହାର ତାରିଖ ଟାଳି ଦିଆଯାଇଛି । ନିର୍ମାତା ସାଜିଦ ନାଦିଆଡୱାଲା ଟିଜରର ନୂଆ ରିଲିଜ୍ ତାରିଖ ଘୋଷଣା କରିଛନ୍ତି ।

କହି ରଖୁଛୁ, ଏହି ଆକ୍ସନ୍ ଥ୍ରୀଲର ଫିଲ୍ମର ଟିଜରକୁ ବର୍ତ୍ତମାନ ଡିସେମ୍ବର ୨୮ ସକାଳ ୧୧ଟା ୭ରେ ଅନଲାଇନ୍ ରିଲିଜ୍ କରାଯିବ । ନାଦିଆଡୱାଲା ଗ୍ରାଣ୍ଡସନ ଏଣ୍ଟରଟେନମେଣ୍ଟର ଅଫିସିଆଲ୍ ‘X’ ଆକାଉଣ୍ଟରେ ଏହା ନିଶ୍ଚିତ କରାଯାଇଛି ।

‘X’ରେ କୁହାଯାଇଛି ଯେ ‘ଆମର ସମ୍ମାନିତ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ଦେହାନ୍ତକୁ ଦୃଷ୍ଟିରେ ରଖି ଆମେ ‘ସିକନ୍ଦର’ର ଟିଜର ରିଲିଜକୁ ସ୍ଥଗିତ ରଖିଛୁ । ଏଥିପାଇଁ ଆମେ ଦୁଃଖିତ । ବର୍ତ୍ତମାନ ଏହାକୁ ଡିସେମ୍ବର ୨୮ ତାରିଖ ସକାଳ ୧୧ଟା ୦୭ରେ ରିଲିଜ୍ କରାଯିବ’ ।

ସାଜିଦ ନାଦିଆଡୱାଲାଙ୍କ ଫିଲ୍ମ ‘ସିକନ୍ଦର’ର ଫାର୍ଷ୍ଟ ଲୁକ୍ ପୋଷ୍ଟର ପୂର୍ବରୁ ହିଁ ରିଲିଜ୍ ହୋଇସାରିଛି । ସିକନ୍ଦରରେ ସଲମାନଙ୍କ ସହ ରଶ୍ମିକା ମନ୍ଦାନା ଲିଡ୍ ରୋଲରେ ଅଛନ୍ତି ।