୪୯ ବର୍ଷରେ ପାଦ ଥାପିଲେ ସୁସ୍ମିତା ସେନ୍, ପାଖାପାଖି ୪୦ଟି ଫିଲ୍ମରେ କରିଛନ୍ତି କାମ
ବଲିଉଡର ଜଣାଶୁଣା ଅଭିନେତ୍ରୀ ତଥା ପୂର୍ବତନ ମିସ୍ ୟୁନିଭର୍ସ ସୁସ୍ମିତା ସେନଙ୍କର ଆଜି ହେଉଛି ଜନ୍ମ ଦିନ । ସେ ୪୯ ବର୍ଷରେ ପାଦ ଥାପଛନ୍ତି । ସୁସ୍ମିତା ସେନ୍ ୧୯ ନଭେମ୍ବର ୧୯୭୫ ମସିହାରେ ଆନ୍ଧ୍ରପ୍ରଦେଶର ହାଇଦ୍ରାବାଦରେ ଜନ୍ମଗ୍ରହଣ କରିଥିଲେ । ସୁସ୍ମିତା ସେନଙ୍କ ବାପା ସୁବୀର ସେନ ବାୟୁସେନାରେ ୱିଙ୍ଗ କମାଣ୍ଡର ହୋଇଥିବାବେଳେ ମାଆ ଶୁଭ୍ରା ସେନ ବ୍ୟବସାୟରେ ଥିଲେ । ୧୯୯୪ ମସିହାରେ ସୁସ୍ମିତା ସେନ୍ ମିସ୍ ଇଣ୍ଡିଆ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ, ଯେଉଁଥିରେ ସେ ପ୍ରଥମ ହୋଇଥିଲେ । ଏହା ପରେ ୧୯୯୪ ମସିହାରେ ସୁସ୍ମିତା ସେନ୍ ମିସ୍ ୟୁନିଭର୍ସ ହୋଇ ସମସ୍ତଙ୍କୁ ଚମକାଇ ଦେଇଥିଲେ ।
୧୯୯୬ରେ ରିଳିଜ୍ ହୋଇଥିବା ଫିଲ୍ମ ‘ଦସ୍ତକ’ରୁ ସୁସ୍ମିତା ସେନ୍ ତାଙ୍କ କ୍ୟାରିୟର ଆରମ୍ଭ କରିଥିଲେ, କିନ୍ତୁ ଏହି ଫିଲ୍ମ ଖାସ୍ ହୋଇପାରି ନଥିଲା । ଏହା ପରେ ୧୯୯୭ ମସିହାରେ ସୁସ୍ମିତା ସେନ୍ ସନି ଦେଓଲଙ୍କ ବିପକ୍ଷରେ କାମ କରିବାର ସୁଯୋଗ ପାଇଲେ, କିନ୍ତୁ ଏହି ଚଳଚ୍ଚିତ୍ର ମଧ୍ୟ ଅସଫଳ ପ୍ରମାଣିତ ହୋଇଥିଲା । ୧୯୯୯ ମସିହା ସୁସ୍ମିତା ସେନଙ୍କ କ୍ୟାରିୟର ପାଇଁ ଏକ ଗୁରୁତ୍ୱପୂର୍ଣ୍ଣ ବର୍ଷ ଥିଲା । ଉକ୍ତ ବର୍ଷ ବିବି ନମ୍ବର ୱାନ୍ ଏବଂ ସିର୍ଫ ତୁମ୍ ପରି ସୁପରହିଟ୍ ଚଳଚ୍ଚିତ୍ର ମୁକ୍ତିଲାଭ କରିଥିଲା । ବିବି ନମ୍ବର ୱାନ ପାଇଁ ଶ୍ରେଷ୍ଠ ସହାୟକ ଅଭିନେତ୍ରୀ ଭାବରେ ସୁସ୍ମିତା ସେନଙ୍କୁ ଫିଲ୍ମଫେୟାର ପୁରସ୍କାରରେ ସମ୍ମାନିତ କରାଯାଇଥିଲା । ୨୦୦୪ ମସିହାରେ ରିଲିଜ୍ ହୋଇଥିବା ଫିଲ୍ମ ମେଁ ହୁଁ ନା’ ସୁସ୍ମିତା ସେନଙ୍କ କ୍ୟାରିୟରକୁ ବଦଳାଇ ଦେଇଥିଲା ।
ଏହି ଚଳଚ୍ଚିତ୍ରରେ ସୁସ୍ମିତା ସେନ୍ ପ୍ରଥମ ଥର ପାଇଁ କିଙ୍ଗ ଖାନ ଶାହାରୁଖ ଖାନଙ୍କ ସହ କାମ କରିବାର ସୁଯୋଗ ପାଇଲେ । ଫରାହ ଖାନଙ୍କ ନିର୍ଦ୍ଦେଶିତ ଏହି ଫିଲ୍ମଟି ସୁପରହିଟ୍ ବୋଲି ପ୍ରମାଣିତ ହୋଇଥିଲା । ୨୦୦୫ ମସିହାରେ ସୁସ୍ମିତା ସେନ୍ ମଧ୍ୟ ସୁପରହିଟ୍ ଚଳଚ୍ଚିତ୍ର ମୈନ୍ ପ୍ୟାର୍ କ୍ୟୁ କିଆରେ ସଲମାନ ଖାନଙ୍କ ସହ କାମ କରିଥିଲେ, ଏହା ପରେ ସୁସ୍ମିତାଙ୍କ ଅନେକ ଚଳଚ୍ଚିତ୍ର ମୁକ୍ତିଲାଭ କରିଥିଲା, କିନ୍ତୁ ବକ୍ସ ଅଫିସରେ ସଫଳ ହୋଇପାରି ନଥିଲା । ସୁସ୍ମିତା ସେନ୍ ତାଙ୍କ ଫିଲ୍ମ କ୍ୟାରିୟରରେ ପ୍ରାୟ ୪୦ଟି ଚଳଚ୍ଚିତ୍ରରେ କାମ କରିଛନ୍ତି ।