ଆପଣଙ୍କ ପିଲା ଘଣ୍ଟା ଘଣ୍ଟା ଧରି ମୋବାଇଲରେ ବିତାଉଛି କି? ଏହି ଉପାୟରେ ଦୂର କରନ୍ତୁ ମୋବାଇଲ୍ ନିଶା
ବର୍ତ୍ତମାନର ଲାଇଫ ଷ୍ଟାଇଲରେ ମୋବାଇଲ ସବୁଠାରୁ ଜରୁରୀ ଜିନିଷ ପାଲଟିଛି । ତେବେ ଆପଣମାନେ ତ ଜାଣିଥିବେ ଆଜିକାଲି ଲୋକମାନେ ମୋବାଇଲ ବିନା କୌଣସି ସ୍ଥାନକୁ ଯିବା ଅସମ୍ଭବ । କିନ୍ତୁ ବର୍ତ୍ତମାନର ବଡ଼ ସମସ୍ୟା ହେଉଛି ପିଲାମାନେ ସବୁଠାରୁ ଅଧିକ ଫୋନ୍ ବ୍ୟବହାର କରୁଛନ୍ତି । ଏପରିକି ଦୁଇ ବର୍ଷର ଶିଶୁ ମଧ୍ୟ ମୋବାଇଲ୍ ଫୋନ୍ ଧରିଥିବାର ନଜର ଆସିଥାନ୍ତି । ତେବେ ପିଲାମାନଙ୍କ ହାତରୁ ଫୋନ୍ ନେବା ମାତ୍ରେ ସେମାନେ କାନ୍ଦିବା ଆରମ୍ଭ କରନ୍ତି । ପିଲାମାନଙ୍କର ମୋବାଇଲ୍ ଫୋନ୍ ବ୍ୟବହାର କେବଳ ସେମାନଙ୍କ ଆଖିକୁ ପ୍ରଭାବିତ କରେ ନାହିଁ ବରଂ ସେମାନଙ୍କର ଚିନ୍ତା ଏବଂ ବୁଝିବା କ୍ଷମତାକୁ ମଧ୍ୟ ପ୍ରଭାବିତ କରେ । ବହୁତ ସମୟ ଫୋନ୍ ସ୍କ୍ରିନ ଦେଖିବା ହେତୁ, ସେମାନେ ଗୋଟିଏ ସ୍ଥାନରେ ଘଣ୍ଟା ଘଣ୍ଟା ଧରି ରହିଥା’ନ୍ତି ଏବଂ ଏହି କାରଣରୁ, ସେମାନଙ୍କର ଶାରୀରିକ ଅଭିବୃଦ୍ଧି ମଧ୍ୟ ପ୍ରଭାବିତ ହୁଏ । ଆଜିକାଲି ପିଲାମାନେ ଅଳ୍ପ ବୟସରେ ମେଦବହୁଳତା, ଆଖି ସମସ୍ୟା, ଚିଡଚିଡା, ଷ୍ଟ୍ରେସ ଇତ୍ୟାଦି ସମସ୍ୟାର ଶିକାର ହେଉଛନ୍ତି । ଏହା ପଛରେ ଏକ ବଡ଼ କାରଣ ହେଉଛି ଲଙ୍ଗ ସ୍କ୍ରିନ୍ ଟାଇମିଂ । ତେବେ ମା ଓ ବାପାମାନେ ଫୋନ୍ ନିଶା ରୁ ମୁକ୍ତି ପାଇବା ପାଇଁ ଗାଳି ଦେବା ଠାରୁ ଆରମ୍ଭ କରି ପିଲାମାନଙ୍କୁ ଚାପୁଡ଼ା ମାରିବା ପର୍ଯ୍ୟନ୍ତ ସବୁକିଛି ଚେଷ୍ଟା କରନ୍ତି, କିନ୍ତୁ ଏହା ସଠିକ୍ ଉପାୟ ନୁହେଁ । କାରଣ ଏପରି କରିବା ଦ୍ବାରା ପିଲାମାନେ ବିଗିଡି ଯିବେ । ସେଥିପାଇଁ ଆମେ ଆଜି ଆପଣଙ୍କୁ କିଛି ଏପରି ଉପାୟ ଜଣାଇବୁ, ଯାହାକୁ ଫଲୋ କରି ଆପଣ ନିଜ ପିଲାଙ୍କ ଫୋନ୍ ଦେଖିବା ଅଭ୍ୟାସ ପରିବର୍ତ୍ତନ କରିପାରିବେ ।
ଆପଣମାନେ ତ ଜାଣିଥିବେ ଯଦି ପିଲାମାନେ କିଛି ଜିନିଷ ପାଇଁ ଜିଦ୍ କରନ୍ତି, ତେବେ ସେମାନଙ୍କ ଠାରୁ ସେହି ଜିନିଷ ଛାଡ଼ିବା ବହୁତ କଷ୍ଟକର ହୋଇଥାଏ । ଏହି କାରଣରୁ ସେ ଆହୁରି ଜିଦଖୋର ହୁଅନ୍ତି । ଯଦି କୌଣସି ପିଲାର ମୋବାଇଲରେ ନିଶା ରହିଛି, ତା’ହେଲେ ମାଡ ମାରିବା ଏବଂ ଗାଳି ଦେବା ପରିବର୍ତ୍ତେ, ଏଥିରୁ ମୁକ୍ତି ପାଇବା ପାଇଁ କିଛି ସରଳ ପଦ୍ଧତି ଗ୍ରହଣ କରାଯାଇପାରେ । ତେଣୁ ଆସନ୍ତୁ ଜାଣିବା କିପରି ପିଲାମାନଙ୍କୁ ମୋବାଇଲ୍ ନିଶାରୁ ମୁକ୍ତ କରାଯିବ ।
ଏପରିକି ଆଜିକାଲି ବୟସ୍କମାନେ ମୋବାଇଲ୍ ଫୋନରେ ଅଭ୍ୟସ୍ତ, ତେଣୁ ପରିବାର ସଦସ୍ୟ କିମ୍ବା ବାପା ଓ ମାଆ ମଧ୍ୟ ଏହି ସମସ୍ୟା ପାଇଁ ଦାୟୀ ହୋଇଥାନ୍ତି । ଯଦି ପିଲାମାନଙ୍କୁ ଏଥିରୁ ମୁକ୍ତି କରିବାକୁ ଚହୁଛନ୍ତି, ତେବେ ମାଆ ଓ ବାପାଙ୍କୁ ପ୍ରଥମେ ଘରେ ସେମାନଙ୍କର ସ୍କ୍ରିନ ଟାଇମ୍ କମ କରିବାକୁ ପଡିବ । ସେଥିପାଇଁ ଖାଇବା ସମୟରେ, ଶୋଇବା ସମୟରେ, ମୋବାଇଲକୁ ଆପଣଙ୍କଠାରୁ ଦୂରରେ ରଖନ୍ତୁ । ଏପରିକି ବିଶେଷ ଭାବରେ ଧ୍ୟାନ ଦିଅନ୍ତୁ ଯେ ଯେତେବେଳେ ପିଲାଟି ଆପଣଙ୍କ ପାଖରେ ଅଛି, ଆପଣ ଫୋନରେ ବ୍ୟସ୍ତ ରୁହନ୍ତୁ ନାହିଁ, ବରଂ ସେମାନଙ୍କ ସହ କଥାବାର୍ତ୍ତା କରନ୍ତୁ, ସେମାନଙ୍କ ସହିତ ସମୟ ବିତାନ୍ତୁ, ଖେଳନ୍ତୁ । ତେବେ ଅନେକ ଥର ଏପରି ହୋଇଥାଏ ଯେ ଯେତେବେଳେ ପିଲାଟି କାନ୍ଦେ କିମ୍ବା ଖାଏନାହିଁ, ତେବେ ତାଙ୍କୁ ମୋବାଇଲ୍ ଫୋନ୍ ଦିଆଯାଏ । ଏପରି ଭାବେ ହିଁ ପିଲାଟିର ମୋବାଇଲ୍ ନିଶା ଆରମ୍ଭ ହୁଏ, ଯେପରି ଅତି କମରେ ଦୁଇରୁ ଅଢେଇ ବର୍ଷ ପର୍ଯ୍ୟନ୍ତ ପିଲାମାନଙ୍କ ଠାରେ ଏହା ଅଧିକ ଦେଖା ଯାଏ ।
ସେଥିପାଇଁ ପିଲାଙ୍କ ପ୍ରତିଦିନ ରୁଟିନ୍ ସେଟ୍ କରନ୍ତୁ । ସର୍ବପ୍ରଥମେ, ନିଶ୍ଚିତ କରନ୍ତୁ ଯେ ପିଲାଟିର ଖାଇବା ଠାରୁ ଆରମ୍ଭ କରି ଶୋଇବା, ଉଠିବା, ପଢ଼ିବା ଏବଂ ବାହାରେ ଖେଳିବା ପର୍ଯ୍ୟନ୍ତ ଏକ ନିର୍ଦ୍ଦିଷ୍ଟ ସମୟ ସ୍ଥିର କରନ୍ତୁ । ଏହି ଉପାୟରେ, ତାଙ୍କୁ ସ୍କ୍ରିନ୍ ଟାଇମିଂ ପାଇଁ ଦିନରେ କେବଳ କିଛି ସମୟ ଦିଅନ୍ତୁ । ଯାହାଫଳରେ ସେ ଅନ୍ୟ ଜିନିଷ ଉପରେ ଭଲ ଧ୍ୟାନ ଦେଇ ପାରିବେ ଏବଂ ମୋବାଇଲ୍ ନିଶା କମିଯିବ । ଯେତେବେଳେ ପିଲାମାନେ ବାହାରେ ଖେଳିବାକୁ ଆରମ୍ଭ କରନ୍ତି, ସେତେବେଳେ ତାଙ୍କ ଫୋନ୍ ଦେଖିବା ନିଶା କମିବାକୁ ଆରମ୍ଭ କରିଥାଏ ।
ଏଥିସହ ପିଲାମାନଙ୍କୁ ବିଭିନ୍ନ କାର୍ଯ୍ୟରେ ନିୟୋଜିତ କରନ୍ତୁ । ଆପଣଙ୍କ ପିଲାଙ୍କୁ ମୋବାଇଲ୍ ନିଶା ଠାରୁ ମୁକ୍ତ କରିବାକୁ, ଏହା ମଧ୍ଯ ବହୁତ ଜରୁରୀ ଯେ ଅଧ୍ୟୟନ ବ୍ୟତୀତ, ଆପଣ ତାଙ୍କୁ କିଛି ନୂଆ କାମରେ ଜଡିତ କରନ୍ତୁ । ଯେପରି ଗୀତ, ନାଚ ଓ ଚିତ୍ର ଅଙ୍କନ ଭଳି କାମ କରାନ୍ତୁ ।
ତେବେ ଫୋନକୁ ପିଲାମାନଙ୍କ ଦୃଷ୍ଟିରୁ ଦୂରରେ ରଖନ୍ତୁ । ଯଦି ଆପଣ ମୋବାଇଲ୍ ନିଶାରୁ ମୁକ୍ତି ପାଇବାକୁ ଚାହୁଁଛନ୍ତି, ତେବେ ଫୋନକୁ ପିଲାମାନଙ୍କ ଦୃଷ୍ଟିରୁ ଦୂରେଇ ରଖିବାକୁ ଚେଷ୍ଟା କରନ୍ତୁ । ବିଶେଷକରି ଯେତେବେଳେ ସେ ଶୋଇବାକୁ ଯାଉଛନ୍ତି, ସେତେବେଳେ ତାଙ୍କ ଠାରୁ ଫୋନ୍ ଦୂରେଇ ରଖନ୍ତୁ । ଏପରି ଭାବେ ଆପଣ ନିଜ ପିଲାଙ୍କ ଫୋନ୍ ନିଶା ସହଜରେ ଦୂର କରିପାରିବେ ।
