୫୬ ଡିଗ୍ରୀରେ ରେକର୍ଡ ଭାଙ୍ଗିଲା ନାଗପୁର, କେତେ ଡିଗ୍ରୀ ତାପମାତ୍ରା ସହ୍ୟ କରିପାରିବ ମଣିଷ ଶରୀର?

ଏଥର ଗରମ ସମସ୍ତ ରେକର୍ଡ ଭାଙ୍ଗିଦେଇଛି । ଚଳିତ ବର୍ଷ ସମଗ୍ର ଭାରତରେ ପ୍ରବଳ ଗ୍ରୀଷ୍ମ ପ୍ରବାହ ହେଉଛି, ଏଥିଯୋଗୁଁ ଲୋକମାନେ ମଧ୍ୟ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ଅତ୍ୟଧିକ ଉତ୍ତାପ ଯୋଗୁଁ ଅନେକ ଲୋକଙ୍କ ମୃତ୍ୟୁ ଖବର ମଧ୍ୟ ସାମ୍ନାକୁ ଆସୁଛି । ରାଜଧାନୀ ଦିଲ୍ଲୀରେ ୫୨ ଡିଗ୍ରୀ ଅତିକ୍ରମ କରିଛି । କିନ୍ତୁ ବର୍ତ୍ତମାନ ମହାରାଷ୍ଟ୍ରର ନାଗପୁରରେ ୫୬ ଡିଗ୍ରୀ ଅତିକ୍ରମ ହୋଇଛି । ଉତ୍ତାପରୁ ରକ୍ଷା ପାଇବା ପାଇଁ ଲୋକମାନେ ବିଭିନ୍ନ ପଦକ୍ଷେପ ନେଉଛନ୍ତି, କିନ୍ତୁ ଏସବୁ ମଧ୍ୟରେ ଏକ ବଡ଼ ପ୍ରଶ୍ନ ଉଠିଛି ଯେ ଯଦି ତାପମାତ୍ରା ପ୍ରାୟ ୬୦ ଡିଗ୍ରୀରେ ପହଞ୍ଚେ ତେବେ ଶରୀର ଏହାକୁ କିପରି ସମ୍ଭାଳିବ? ଆମ ଶରୀର କେତେ ଡିଗ୍ରୀ ତାପମାତ୍ରା ସହ୍ୟ କରିପାରିବ? ଆସନ୍ତୁ ଜାଣିବା ଏହା ବିଷୟରେ…

ବାସ୍ତବରେ ଚଳିତ ବର୍ଷ ଉତ୍ତାପ ଏବଂ ଗ୍ରୀଷ୍ମ ପ୍ରବାହ ସମସ୍ତ ସୀମା ପର କରିଛି । ଏହି ପ୍ରଭାବ ସମଗ୍ର ଭାରତରେ ଦେଖିବାକୁ ମିଳିଛି । ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଅନେକ ଅଞ୍ଚଳରେ ଜଳାଭାବ ମଧ୍ୟ ଦେଖାଦେଇଛି । ଏହା ସତ୍ୟ ଯେ ମାନବ ଶରୀର ସମସ୍ତ ପ୍ରକାରର ପାଣିପାଗକୁ ସହ୍ୟ କରିପାରିବ କିନ୍ତୁ ଅତ୍ୟଧିକ ଉତ୍ତାପକୁ ସହ୍ୟ କରିବା ପାଇଁ ଏହା ପ୍ରସ୍ତୁତ ହୋଇନଥାଏ । ମଣିଷ ଶରୀରର ସାଧାରଣ ତାପମାତ୍ରା ପ୍ରାୟ ୩୭ ଡିଗ୍ରୀ ସେଲସିୟସ୍ ।

ଯଦି ଆମେ ବାହ୍ୟ ତାପମାତ୍ରା ବିଷୟରେ କଥାବାର୍ତ୍ତା କରିବା, ତେବେ ଆଜି ପର୍ଯ୍ୟନ୍ତ ଏହା ଜଣାପଡିନାହିଁ ଯେ ମଣିଷ ଶରୀର ସର୍ବାଧିକ କେତେ ତାପମାତ୍ରାରେ ବଞ୍ଚିପାରିବ । ସାଧାରଣ ପରିସ୍ଥିତିରେ, ମାନବ ଶରୀର ବିନା କୌଣସି ଅସୁବିଧାରେ ୩୭ ଡିଗ୍ରୀ ସେଲସିୟସ ତାପମାତ୍ରାରେ ବଞ୍ଚିପାରେ । କିନ୍ତୁ ଏହା ପରେ ସମସ୍ୟା ଦେଖାଯିବା ଆରମ୍ଭ ହୋଇପାରେ । ୫୦ ଡିଗ୍ରୀ ତାପମାତ୍ରା ମାନବ ଶରୀର ପାଇଁ ଅତ୍ୟନ୍ତ ବିପଜ୍ଜନକ ଅଟେ ।

ଏହି ତାପମାତ୍ରାରେ ଚେତାଶୂନ୍ୟ ହୋଇଯିବା, ମୁଣ୍ଡ ବୁଲାଇବା କିମ୍ବା ବ୍ଲଡ଼ ପ୍ରେସର କମ ହୋଇଯିବ ଭଳି ସମସ୍ୟା ହୋଇପାରେ । ଏପରିକି ଏହି ତାପମାତ୍ରାରେ ଅଧିକ ସମୟ ରହିବା ମାଂସପେଶୀକୁ ସମ୍ପୂର୍ଣ୍ଣ କ୍ଷତି ପହଞ୍ଚାଇପାରେ ଏବଂ ଅନେକ ଲୋକଙ୍କ ମୃତ୍ୟୁ ମଧ୍ୟ ହୋଇପାରେ । ସ୍ୱାସ୍ଥ୍ୟ ବିଶେଷଜ୍ଞମାନେ ଏହା ମଧ୍ୟ ସ୍ୱୀକାର କରିଛନ୍ତି ଯେ ୫୦ ଡିଗ୍ରୀ ସେଲସିୟସରୁ ଅଧିକ ତାପମାତ୍ରାରେ ବ୍ରେନ ଡ୍ୟାମେଜ ହୋଇଯାଏ ଏବଂ କୋଷଗୁଡ଼ିକ ମଧ୍ୟ ନଷ୍ଟ ହୋଇଯାଏ । ଏକ ଗଣମାଧ୍ୟମ ରିପୋର୍ଟ ଅନୁଯାୟୀ ମାନବ ଶରୀର ପ୍ରାୟ ୩୬ ରୁ ୩୭ ଡିଗ୍ରୀ ମଧ୍ୟରେ ଭଲ ଭାବରେ ଆକ୍ଟିଭ ରହିଥାଏ ।

ଏଭଳି ଅତ୍ୟଧିକ ତାପମାତ୍ରାରୁ ବଞ୍ଚିବା ପାଇଁ କେଉଁ ପଦକ୍ଷେପ ଗ୍ରହଣ କରାଯାଇପାରିବ?

-ଛାଇରେ ରୁହନ୍ତୁ: ପ୍ରତ୍ୟକ୍ଷ ସୂର୍ଯ୍ୟ କିରଣରୁ ଦୂରେଇ ରୁହନ୍ତୁ ।

-ଢିଲା ଏବଂ ହାଲୁକା ରଙ୍ଗର ପୋଷାକ ପିନ୍ଧନ୍ତୁ: ଏହି ଝାଳ ବାଷ୍ପୀଭୂତ କରିବାରେ ସାହାଯ୍ୟ କରିଥାଏ ।

-ପାଣି ପିଅନ୍ତୁ ଏବଂ ଡିହାଇଡ୍ରେସନ୍ ଠାରୁ ଦୂରେଇ ରୁହନ୍ତୁ ।

-ଯେତେବେଳେ ବି ସମ୍ଭବ ସାୱାର ନିଅନ୍ତୁ ।

-ଇଲେକ୍ଟ୍ରୋଲାଇଟ୍ ଯୁକ୍ତ ପାନୀୟ ପିଅନ୍ତୁ ।

-ଯଦି ଉପଲବ୍ଧ ଏସି ଏବଂ ଫ୍ୟାନ ବ୍ୟବହାର କରନ୍ତୁ ।

ମନେରଖନ୍ତୁ ଯଦି ଅତ୍ୟଧିକ ଗ୍ରୀଷ୍ମ ପ୍ରବାହ କାରଣରୁ ଆପଣ ଏଭଳି କିଛି ଲକ୍ଷଣ ଅନୁଭବ କରନ୍ତି ଯେପରିକି ମୁଣ୍ଡ ବୁଲାଇବା, ବାନ୍ତି ଲାଗିବା କିମ୍ବା ବେହୋସ ହୋଇଯିବା ତେବେ ତୁରନ୍ତ ଥଣ୍ଡା ସ୍ଥାନକୁ ଯାଆନ୍ତୁ, ପାଣି ପିଅନ୍ତୁ ଏବଂ ଡାକ୍ତରୀ ସାହାଯ୍ୟ ନିଅନ୍ତୁ ।