ଆଜି ବିଶ୍ୱ ଶାକାହାରୀ ଦିବସ: ଜାଣନ୍ତୁ ଶାକାହାରୀ ହେବାର ଉପକାରିତା ଏବଂ ଅପକାରିତା
ପ୍ରତିବର୍ଷ ୧ ଅକ୍ଟୋବର ବିଶ୍ୱ ଶାକାହାରୀ ଦିବସ ଭାବରେ ପାଳନ କରାଯାଏ । ଏହି ଦିନ ୧୯୭୭ ରେ ଆରମ୍ଭ ହୋଇଥିଲା । ବିଶ୍ୱ ଶାକାହାରୀ ଦିବସ ପାଳନ କରିବାର ଉଦ୍ଦେଶ୍ୟ ହେଉଛି ଶାକାହାରୀ ଜୀବନଶୈଳୀକୁ ପ୍ରୋତ୍ସାହିତ କରିବା । ଏହି ଦିନ ଜୀବଜନ୍ତୁଙ୍କ ପ୍ରତି ଦୟା ସହିତ ଜଡିତ । ଶାକାହାରୀ ନଥିବା ଲୋକମାନଙ୍କର କୌଣସି ଅଭାବ ନାହିଁ, କିନ୍ତୁ ବର୍ତ୍ତମାନ ଶାକାହାରୀ ହେଉଥିବା ଲୋକଙ୍କ ସଂଖ୍ୟା ମଧ୍ୟ ଦ୍ରୁତ ଗତିରେ ବୃଦ୍ଧି ପାଉଛି । ଏପରିକି ଲୋକମାନେ ଭେଜିଟେରିଆନରୁ ଭେଗାନ୍ ମଧ୍ୟ ହେଉଛନ୍ତି ।
ଏଥିରେ ଲୋକମାନେ ଜୀବଜନ୍ତୁଙ୍କଠାରୁ ଉତ୍ପନ୍ନ କୌଣସି ପ୍ରଡ଼କ୍ଟ ବ୍ୟବହାର କରନ୍ତି ନାହିଁ । ଯଦି ଆପଣ ମଧ୍ୟ ଶାକାହାରୀ, ତେବେ ଏହାର ଅନେକ ଲାଭ ହୋଇପାରେ କିନ୍ତୁ ଏହାର କିଛି ଅସୁବିଧା ମଧ୍ୟ ଅଛି । ଉତ୍ତର ଆମେରିକୀୟ ଶାକାହାରୀ ସମାଜ ଦ୍ୱାରା ଆରମ୍ଭ ହୋଇଥିବା ବିଶ୍ୱ ଶାକାହାରୀ ଦିବସର ଉଦ୍ଦେଶ୍ୟ ହେଉଛି ନୈତିକ ମାନବିକ ମୂଲ୍ୟବୋଧକୁ ବ୍ୟାଖ୍ୟା କରିବା । ପରିବେଶ ଏବଂ ସ୍ୱାସ୍ଥ୍ୟ ପ୍ରତି ସଚେତନତା ସୃଷ୍ଟି କରିବା ସହିତ ଅଧିକରୁ ଅଧିକ ଶାକାହାରୀ ହେବା ଉପରେ ଗୁରୁତ୍ୱ ଦେବା । ବର୍ତ୍ତମାନ ପାଇଁ, ଆସନ୍ତୁ ଜାଣିବା ଶାକାହାରୀ ହେବାର ଲାଭ କ’ଣ ଏବଂ ଅସୁବିଧା କ’ଣ ହୋଇପାରେ ।
ହୃଦୟ ସୁସ୍ଥ ରହିଥାଏ:
ଶାକାହାରୀମାନେ ମାଂସାହାରୀମାନଙ୍କ ଅପେକ୍ଷା କମ୍ ପରିପୃଷ୍ଟ ଚର୍ବି ଖାଇଥା’ନ୍ତି, ଯାହା ସେମାନଙ୍କୁ ଖରାପ କୋଲେଷ୍ଟ୍ରଲ ବଢ଼ାଇବାର ସମ୍ଭାବନା କମ କରିଥାଏ ଏବଂ ହୃଦୟକୁ ସୁସ୍ଥ ରଖେ । ଶାକାହାରୀ ଖାଦ୍ୟ ଖାଇବା ଦ୍ୱାରା ବ୍ଲଡ ପ୍ରେସର ନିୟନ୍ତ୍ରଣରେ ରହିଥାଏ ।
ଓଜନ ହ୍ରାସ କରିବାରେ ସାହାଯ୍ୟ କରେ:
ଶାକାହାରୀ ଖାଦ୍ୟରେ ଅଧିକ ଚର୍ବି ନଥାଏ, ତେଣୁ ଏହା ଓଜନ ବଜାୟ ରଖିବାରେ ଲାଭଦାୟକ । ଯେଉଁଠାରେ ନନ୍-ଭେଜ୍ ପ୍ରେମୀମାନଙ୍କର ଓଜନ ବଢିବାର ଅଧିକ ସମ୍ଭାବନା ଥାଏ ।
ହଜମ ପ୍ରକ୍ରିୟା ସୁସ୍ଥ ରହିଥାଏ:
ଶାକାହାରୀ ଖାଦ୍ୟ ହଜମ କରିବା ସହଜ ଏବଂ ଏଥିରେ ଫାଇବର ମଧ୍ୟ ଭଲ ପରିମାଣରେ ମିଳିଥାଏ, ଯେଉଁ କାରଣରୁ ହଜମ ପ୍ରକ୍ରିୟା ସଠିକ୍ ଭାବରେ କାର୍ଯ୍ୟ କରିବାରେ ସକ୍ଷମ ହୋଇଥାଏ ଏବଂ ବଦହଜମି, ଏସିଡିଟି, କୋଷ୍ଠକାଠିନ୍ୟ ହେବାର ସମ୍ଭାବନା କମ୍ ଥାଏ ।
ଏହି ଜିନିଷଗୁଡ଼ିକୁ ଧ୍ୟାନରେ ରଖିବା ଉଚିତ୍:
ଶାକାହାରୀ ଖାଦ୍ୟର ଅନେକ ଲାଭ ଅଛି, କିନ୍ତୁ ଯଦି ଆପଣ ଡାଏଟକୁ ସଠିକ୍ ଭାବରେ ବାଲାନ୍ସ କରନ୍ତି । ଆଜିକାଲି ଖାଦ୍ୟ ଅଭ୍ୟାସ ଏତେ ଖରାପ ହୋଇଯାଇଛି ଯେ ଶାକାହାରୀ ଲୋକଙ୍କ ପାଇଁ ମଧ୍ୟ ଅଏଲି ଏବଂ ଜଙ୍କ ଫୁଡ୍ ର ଅନେକ ଅପ୍ସନ ଅଛି ।
ଅସୁବିଧା:
ଯଦି ଶାକାହାରୀମାନେ ଉପଯୁକ୍ତ ଖାଦ୍ୟ ଗ୍ରହଣ ନକରନ୍ତି, ତେବେ ସେମାନେ ପ୍ରୋଟିନ୍, ଭିଟାମିନ୍ ବି 12, ଓମେଗା 3, କ୍ୟାଲସିୟମ୍ ଇତ୍ୟାଦି ପୋଷକ ତତ୍ତ୍ୱ ଅଭାବର ଶିକାର ହୋଇପାରନ୍ତି, ଯାହା ବେଳେବେଳେ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିଥାଏ । ତେଣୁ, ଯଦି ଆପଣ ଶାକାହାରୀ ତେବେ ଏକ ଭଲ ଡାଏଟ୍ ପ୍ରତି ଧ୍ୟାନ ଦିଅନ୍ତୁ । ଯେପରି ସବୁଜ ପନିପରିବା, ସିଜିନାଲ୍ ଫ୍ରୁଟ୍, କ୍ଷୀର ଏବଂ ଅନ୍ୟାନ୍ୟ ଦୁଗ୍ଧଜାତ ଦ୍ରବ୍ୟ, ବିଭିନ୍ନ ପ୍ରକାରର ଶସ୍ୟ, ଡ୍ରାଏ ଫ୍ରୁଟସ୍, ବାଦାମ, ସିଡ୍ସ ଇତ୍ୟାଦି ନିଜ ଖାଦ୍ୟରେ ସାମିଲ କରନ୍ତୁ ।
