ବହୁ ଆଡମ୍ବରରେ ପ୍ରତିଷ୍ଠା ହେଲା ମା’ ଚଣ୍ଡିଙ୍କ ମନ୍ଦିର, ଜମିଲା ଭକ୍ତଙ୍କ ଭିଡ଼

ବହୁ ଆଡମ୍ବରରେ ପ୍ରତିଷ୍ଠା ହେଲା ମା’ ଚଣ୍ଡିଙ୍କ ମନ୍ଦିର । ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ବଡକୁଳ ଗ୍ରାମପଞ୍ଚାୟତ ଅନ୍ତର୍ଗତ ଭାଲେରୀ ପାହାଡ଼ର ପାଦ ଦେଶରେ ଥିବା ନୂଆଗଡ ଗ୍ରାମରେ ମା’ଙ୍କ ଚଣ୍ଡୀ ମନ୍ଦିର ବହୁ ଧୂମଧାମରେ ପ୍ରତିଷ୍ଠା କରାଯାଇଛି । ଲୋକମାନଙ୍କର କହିବାନୁଯାୟୀ, ଶହ ଶହ ବର୍ଷ ପୂର୍ବରୁ ଭାଲେରି ପାହାଡ଼ର ଗୁମ୍ଫା ଭିତରେ ପ୍ରଥମେ ମା’ ଚଣ୍ଡୀଙ୍କ ପୂଜାର୍ଚନା କରାଯାଉଥିଲା । ସେତେବେଳେ ମା’ଙ୍କୁ ପୂଜାର୍ଚନା କରୁଥିବା ପୂଜକ ବହୁ ଦିନଧରି ରୋଗରେ ପଡ଼ିଥିଲେ ଯେତେବେଳେ ପୂଜକଙ୍କ ପାଇଁ ସେହି ଗୁମ୍ଫା ପର୍ଯ୍ୟନ୍ତ ଯାଇ ପୂଜା କରିବା କଷ୍ଟକର ହୋଇପଡିଥିଲା ।

ସେଥିପାଇଁ ସେହି ଗୁମ୍ଫା ଭିତରୁ ମା’ ଚଣ୍ଡୀ ଠାକୁରାଣୀଙ୍କୁ ଆଣି ଭାଲେରି ପାହାଡ଼ର ପାଦ ଦେଶରେ ରଖି ପୂଜାର୍ଚନା କରିଥିଲେ । ସେହିଦିନ ଠାରୁ ମା’ଚଣ୍ଡୀ ଠାକୁରାଣୀ ଖୋଲା ଆକାଶ ତଳେ ରହି ପୂଜାର୍ଚନା ପାଉଥିଲେ । ଭାଲେରି ପାହାଡ଼ ପାଦଦେଶ ସହିତ, ଶାଳ, ଶାଗୁଆନ ଭରା ଜଙ୍ଗଲ ଦ୍ଵାରା ଘେରି ରହିଥିବା ଏହି ସ୍ଥାନଟିରେ ଅବସ୍ଥିତ ମା’ ଙ୍କ ପୀଠଟି ପାଲଟି ଯାଇଥିଲା ଏକ ପର୍ଯ୍ୟଟନ ସ୍ଥଳ । ପର୍ଯ୍ୟଟନ ଋତୁ ଆସିଲେ ଆଖ ପାଖ ଅଞ୍ଚଳରୁ ବଣଭୋଜି କରିବାକୁ ଲୋକ ମାନଙ୍କର ଏଠାରେ ଭିଡ଼ ଦେଖିବାକୁ ମିଳେ ।

ପାହାଡ଼, ଜଙ୍ଗଲ ମଧ୍ୟରେ ମା’ଙ୍କ ଦର୍ଶନ ସାଙ୍ଗକୁ ବଣଭୋଜି ପାଇଁ ପର୍ଯ୍ୟଟକଙ୍କୁ ବହୁତ ଆକୃଷ୍ଟ କରିଥାଏ ମା’ଙ୍କର ଏହି ପୀଠଟି । ତେବେ ବହୁ ବର୍ଷ ପରେ ଆଜି ନୂଆଗଡ ଗ୍ରାମର ବୁଦ୍ଧିଜୀବୀ ଓ ଯୁବକମାନଙ୍କର ମିଳିତ ଉଦ୍ୟମରେ ଖୋଲା ଆକାଶ ତଳେ ପୂଜା ପାଉଥିବା ମା’ ଚଣ୍ଡୀଙ୍କର ଏକ ଭବ୍ୟ ମନ୍ଦିର ପ୍ରତିଷ୍ଠା କରାଯାଇଛି । ଆଗରୁ ଖାଲ ଖମାରେ ପରିପୂର୍ଣ ଥିଲା ମା’ଙ୍କ ପୀଠ । କିନ୍ତୁ ଏବେ ଏହାକୁ ସମତଳ କରି ପାନୀୟ ଜଳର ସୁବିଧା ମଧ୍ୟ କରାଯାଇଛି । ଯାହାକି ପିକନିକ କରିବାକୁ ଆସୁଥିବା ପର୍ଯ୍ୟଟକମାନଙ୍କ ପାଇଁ ବେଶ ସୁବିଧାଜନକ ହୋଇଯାଇଛି ।

ଏଠାରେ ବିଗତ ୫ ଦିନ ଧରି ପୂଜାର୍ଚନା କରାଯାଇ ଏବେ ମନ୍ଦିର ପ୍ରତିଷ୍ଠା ଶେଷ ହୋଇ ଯାଇଛି । ଗତ କିଛି ଦିନରୁ ପୂଜା ଆରମ୍ଭ ହୋଇ ଅଧିବାସ, ନାମଯଜ୍ଞ, ଅଙ୍କୁରରୋପଣ, କଳସଯାତ୍ରା, ମହାସ୍ନାନ ହୋଇ ଆଜି ପୂର୍ଣ୍ଣାହୁତି କରାଯାଇଥିଲା । ଶେଷ ଦିନରେ ନୂଆଗଡ ଗ୍ରାମର ନିମନ୍ତ୍ରଣ କ୍ରମେ ଆଖପାଖ ଗ୍ରାମରୁ ପ୍ରାୟ ୧୮ ଗୋଟି ଦେବାଦେବୀ ନିଜ ନିଜ ବିମାନରେ ବିରାଜମାନ ହୋଇ ଘଣ୍ଟ, ମୃଦଙ୍ଗ ଓ ଡିଜେ ସହିତ ବିରାଟ ପଟୁଆରରେ ପୁରା ଗ୍ରାମ ପରିକ୍ରମା କରି ମା’ଙ୍କ ପୀଠକୁ ଆସି ନିଜ ନିଜ ଆସନରେ ବିରାଜମାନ ହୋଇଥିଲେ । ଏଥିରେ ପ୍ରକମ୍ପିତ ହୋଇ ଉଠୁଥାଏ ପୁରା ପରିବେଶ । ଏଠାରେ ହଜାର ହଜାର ଭକ୍ତଙ୍କ ସମାଗମ ସହିତ ଲୋକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା ।

ପ୍ରସାଦ ସେବନ ସହିତ ଗ୍ରୀଷ୍ମ ପ୍ରବାହକୁ ନଜରରେ ରଖି ରାସ୍ତାରେ ଦହି ପଣାର ବନ୍ଦୋବସ୍ତ କରାଯାଇଥିଲା । ତା’ ସହିତ ମେଳାର ଆୟୋଜନ ମଧ୍ୟ କରାଯାଇଥିଲା । ପରିଶେଷରେ ବିମାନରେ ଆସିଥିବା ସମସ୍ତ ଦେବା ଦେବୀଙ୍କ ମହାମିଳନ ଅପରାହ୍ନ ହେବାପରେ ସମସ୍ତ ଠାକୁର ନିଜ ନିଜ ଗ୍ରାମ ମନ୍ଦିରକୁ ଫେରିଯାଇଥିଲେ । ଏପଟେ ମନ୍ଦିର ପୀଠରେ ଆହୁରି ଉର୍ନତି କରିବା ପାଇଁ ସରକାର ଏଥିପ୍ରତି ଦୃଷ୍ଟି ଦେବାପାଇଁ ଗଣମାଧ୍ୟମ ଜରିଆରେ ନୂଆଗଡ ଗ୍ରାମବାସୀ ଅନୁରୋଧ କରିଛନ୍ତି ।