ମା’ ଅନ୍ନପୂର୍ଣ୍ଣା ଦେବୀଙ୍କ ପୀଠରେ ସପ୍ତଦିନ ବ୍ୟାପି ବିଶ୍ୱଶାନ୍ତି ମହାଯଜ୍ଞ ଓ କଳସ ଯାତ୍ରା

ଭଗବତୀ ମା’ ଅନ୍ନପୂର୍ଣ୍ଣା ଦେବୀଙ୍କ ମହିମା କହିଲେ ନସରେ । ଜଗତସିଂହପୁର ଜିଲ୍ଲା ରଘୁନାଥପୁର ନିକଟସ୍ଥ ଶିଉଳି ଗ୍ରାମର ଗ୍ରାମ ଦେବତୀ ଭଗବତୀ ମା’ ଅନ୍ନପୂର୍ଣ୍ଣା ଦେବୀଙ୍କ ପୀଠରେ ସପ୍ତଦିନ ବ୍ୟାପି ବିଶ୍ବସାନ୍ତି ମହାଯଜ୍ଞ, ଅହରାତ୍ର ହରିନାମ, ହରିହାଟ, ସାଧୁସନ୍ଥ ସମ୍ମିଳନୀ ଆଦି କାର୍ଯ୍ୟକ୍ରମ ପାଇଁ ଏକ କଳସ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି । ଏହି ଦିନ ପୂର୍ଣ୍ଣ କଳସୀରେ ପବିତ୍ର ତୀର୍ଥ ଜଳ ସଂଗ୍ରହ କରାଯାଇଥିଲା । ଯାହାକୁ ଆଖପାଖ ଗାଁ ମାନଙ୍କର ଶହଶହ ମହିଳାମାନେ ସଂଗ୍ରହ କରିଥିଲେ । ଏହାପରେ ଏହି ପବିତ୍ର ଜଳକୁ ଯଜ୍ଞ ମଣ୍ଡପରେ ସ୍ଥାପନ କରାଯାଇଥିଲା ।

ଏହି ଯଜ୍ଞ ଅଧିବାସରେ କଳସ ବୁଡାଇ ମାନସିକ ରଖିଲେ ମା’ ଅନ୍ନପୂର୍ଣ୍ଣା ଭକ୍ତ ମାନଙ୍କ ମନୋକାମନା ପୂରଣ କରନ୍ତି ବୋଲି ବିଶ୍ୱାସ ରହିଛି । ଏହି ଯଜ୍ଞର କର୍ତ୍ତା କିଟ ଓ କିସର ଆଇନ ନିର୍ଦେଶକ ମନୋରଞ୍ଜନ ପ୍ରଧାନ ଏବଂ କର୍ତ୍ତୀ ମାଲା ପ୍ରଧାନଙ୍କ ତତ୍ୱାବଧାନରେ ୫୦ ରୁ ଉର୍ଧ୍ଵ ମହିଳାମାନେ କଳସ ଶୋଭାଯାତ୍ରାରେ ଯାଇ ପୂଜାର୍ଚନା ପରେ ଯଜ୍ଞ ସ୍ଥଳକୁ କଳସରେ ସୁଦ୍ଧ ଜଳ ଯାତ୍ରାରେ ଜଳ ଆଣି ଯଜ୍ଞର ଶୁଭାରମ୍ଭ କରାଯାଇଥିଲା ।

ଅଗ୍ନି ସ୍ଥାପନ, ସୂର୍ଯ୍ୟପୂଜା, ଗୋପୂଜା, ଅଙ୍କରା ରୋପଣ, ହଵନ, ଆହୁତି ଦିଆଯାଇ ଯଜ୍ଞର ଶୁଭାରମ୍ଭ କରାଯାଇଛି । ତେବେ ଏହି ଯଜ୍ଞ ସାତଦିନ ଧରି ଚାଲିବ ଏବଂ ପ୍ରତ୍ୟହ ହରିହାଟ, ନାମ ସଂକୀର୍ତ୍ତନ ଆଦି କାର୍ଯ୍ୟକ୍ରମ ଚାଲିବା ସହିତ ଦୋଳ ପୂର୍ଣ୍ଣମୀ ଦିନ ଏହାର ପୂର୍ଣ୍ଣାହୁତି କରାଯିବ । ଏହି କାର୍ଯ୍ୟକ୍ରମରେ ହଜାର ହଜାର ଭକ୍ତମାନେ ଯୋଗଦେବାର କାର୍ଯ୍ୟକ୍ରମ ରହିଛି ।

ନାମ ସଂକୀର୍ତ୍ତନ ସହ ଶଙ୍ଖ ହୁଳହୁଳିରେ କମ୍ପି ଉଠିଥିଲା ସମଗ୍ର ଅଞ୍ଚଳ । ସେହିପରି ପୀଠରେ ଭଜନ କୀର୍ତ୍ତନ ସହିତ ପ୍ରତିଦିନ ପ୍ରସାଦ ସେବନର ବ୍ୟବସ୍ତା ମଧ୍ୟ କରାଯାଇଛି । ଭଗବତୀ ମା’ ଅନ୍ନପୂର୍ଣ୍ଣା ଦେବୀଙ୍କ ଏହି ଉତ୍ସବରେ ଆଖପାଖ ଗ୍ରାମର ଶତାଧିକ ଭକ୍ତ ମାନେ ମଧ୍ୟ ଯୋଗ ଦେଇଥିଲେ । ଭଗବତୀ ମା’ ଅନ୍ନପୂର୍ଣ୍ଣା ଦେବୀଙ୍କ ଦର୍ଶନ ପାଇଁ ଏବେ ଛୁଟିଛି ଶ୍ରଦ୍ଧାଳୁଙ୍କ ସୁଅ । ଏନେଇ ଏଠାରେ ସୃଷ୍ଟି ହୋଇଛି ଖୁବ ଆଧ୍ୟାତ୍ମିକ ପରିବେଶ ।