ହିନ୍ଦୁ ଧର୍ମରେ ଶ୍ରାବଣ ମାସର ବିଶେଷ ଧାର୍ମିକ ମହତ୍ତ୍ୱ ରହିଛି । ଏହା ବର୍ଷର ସବୁଠାରୁ ପବିତ୍ର ମାସ ଭାବରେ ବିବେଚନା କରାଯାଏ । ଶ୍ରାବଣ ମାସରେ ଭଗବାନ ଶିବ ଏବଂ ମାତା ପାର୍ବତୀଙ୍କୁ ଅତ୍ୟନ୍ତ ଭକ୍ତିଭାବରେ ପୂଜା କରାଯାଏ । ଏଥର ଶ୍ରାବଣ ମାସ ଦୁଇଟି ବିରଳ ସମନ୍ୱୟରେ ପରିପୂର୍ଣ୍ଣ । ସର୍ବପ୍ରଥମେ, ଏଥର ଶ୍ରାବଣ ମାସର ଆରମ୍ଭ ସୋମବାରର ପବିତ୍ର ଦିନରୁ ଆରମ୍ଭ ହେଉଛି । ଦ୍ୱିତୀୟତଃ, ଏଥର ଶ୍ରାବଣ ମାସରେ ସମୁଦାୟ ୫ଟି ସୋମବାର ରହିଛି । ତେବେ ଆଜି ଆମେ ଆପଣଙ୍କୁ ଶ୍ରାବଣ ମାସ ସହ ଜଡିତ ସମସ୍ତ ସୂଚନା ବିଷୟରେ ବିସ୍ତୃତ ଭାବରେ ଜଣାଇବୁ ।
ଶ୍ରାବଣ ମାସରେ ଅଧିକାଂଶ ଭକ୍ତ ସୋମବାର ଉପବାସ ପାଳନ କରନ୍ତି ଏବଂ ଶୁଦ୍ଧ ହୃଦୟରେ ଭଗବାନ ଶିବଙ୍କୁ ପୂଜା କରନ୍ତି । ଅବିବାହିତ ଝିଅମାନେ ଶ୍ରାବଣର ପ୍ରତ୍ୟେକ ମଙ୍ଗଳବାର ଦିନ ମଙ୍ଗଳା ଗୌରୀ ଉପବାସ ପାଳନ କରନ୍ତି । ଝିଅମାନେ ମନଲାଖି ବର ପାଇବା ଏବଂ ଭଗବାନ ଶିବଙ୍କ ଆଶୀର୍ବାଦ ପାଇବା ପାଇଁ ସୋମବାର ଉପବାସ ପାଳନ କରନ୍ତି । ଶ୍ରାବଣ ମାସରେ ବୋଲ ବମ ଯାତ୍ରା ମଧ୍ୟ ଅତ୍ୟନ୍ତ ପ୍ରସିଦ୍ଧ, ଯେଉଁଠାରେ ଭକ୍ତମାନେ ନଦୀ ତଥା ଜଳାଶୟରୁ ପାଣି ଭାର ନେଇ ମହାଦେବଙ୍କ ଜଳାଭିଷେକ କରିଥାନ୍ତି । ଭଗବାନ ଭୋଲେନାଥଙ୍କ ଆଶୀର୍ବାଦ ପାଇବା ଏବଂ ତାଙ୍କୁ ପ୍ରସନ୍ନ କରିବା ପାଇଁ ଶ୍ରାବଣ ମାସ ସବୁଠାରୁ ଲାଭଦାୟକ ବୋଲି ବିବେଚନା କରାଯାଏ ।
ଶ୍ରାବଣ ମାସ ପୂଜା ବିଧି:
ଭକ୍ତମାନେ ସକାଳୁ ଉଠି ପୂଜା ଆରମ୍ଭ କରିବା ପୂର୍ବରୁ ସ୍ନାନ କରନ୍ତୁ । ଭଗବାନ ଶିବ ଏବଂ ମାତା ପାର୍ବତୀଙ୍କ ମୂର୍ତ୍ତି ରଖନ୍ତୁ, ଦୀପ ଜାଳନ୍ତୁ ଏବଂ ପ୍ରାର୍ଥନା କରନ୍ତୁ । ଶିବ ଚାଳିଶା, ଶିବ ତାଣ୍ଡବ ସ୍ତୋତ୍ର ଏବଂ ଶ୍ରାବଣ ମାସ କଥା ପଢନ୍ତୁ । ଶିବ ମନ୍ଦିରକୁ ଯାଆନ୍ତୁ ଏବଂ ଶିବଲିଙ୍ଗ ଉପରେ ପଞ୍ଚାମୃତ (କ୍ଷୀର, ଦହି, ଚିନି, ମହୁ ଏବଂ ଘିଅ) ଅର୍ପଣ କରନ୍ତୁ । ଶିବଲିଙ୍ଗରେ ଜଳ ଚଢ଼ାନ୍ତୁ ଏବଂ ଫୁଲ ଏବଂ ବେଲ ପତ୍ରରେ ସଜାନ୍ତୁ । ଭଗବାନ ଶିବଙ୍କର ବେଲପତ୍ର ଅତ୍ୟନ୍ତ ପ୍ରିୟ । ଭଗବାନ ଶିବଙ୍କୁ ମିଠା ଭୋଗ ଅର୍ପଣ କରନ୍ତୁ । ଶ୍ରାବଣ ମାସ ଭଗବାନ ଶିବଙ୍କର ଅତ୍ୟନ୍ତ ପ୍ରିୟ ମାସ । ତେଣୁ ଏହି ଶ୍ରାବଣ ମାସର ସୋମବାର ଦିନ ମହାଦେବଙ୍କୁ ପୂଜା କରିବା ଦ୍ୱାରା ଭକ୍ତଙ୍କର ସମସ୍ତ ମନୋସ୍କାମନା ପୁରଣ ହୋଇଥାଏ ।
ତେବେ ଆସନ୍ତୁ ଜାଣିବା ଶ୍ରାବଣ ମାସ ମହାଦେବଙ୍କର ଏତେ ପ୍ରିୟ କାହିଁକି?
ପୌରାଣିକ ମାନ୍ୟତା ଅନୁଯାୟୀ, ଶ୍ରାବଣ ମାସରେ ମାତା ପାର୍ବତୀ ସୋମବାର ଦିନ ପ୍ରଭୁ ଶଙ୍କରଙ୍କୁ ସ୍ୱାମୀ ରୂପେ ପାଇବା ପାଇଁ ଉପବାସ କରିଥିଲେ ଏବଂ ଏହି ମାସରେ କଠୋର ତପସ୍ୟା ମଧ୍ୟ କରିଥିଲେ । ଏହି ତପସ୍ୟା ହେତୁ ଭଗବାନ ଶିବ ମାତା ପାର୍ବତୀଙ୍କୁ ତାଙ୍କର ଅର୍ଦ୍ଧାଙ୍ଗିନୀ ଭାବରେ ଗ୍ରହଣ କରିଥିଲେ । ଏହି କାରଣରୁ ଭଗବାନ ଶିବଙ୍କ ପାଇଁ ଏହି ମାସ ଅତ୍ୟନ୍ତ ପ୍ରିୟ ଅଟେ ।