ବାତ୍ୟା ‘ରେମାଲ୍‌’ ଆସାମରେ ରଚିଲା ଧ୍ୱଂସଲୀଳା: ଉପୁଡ଼ିଲା ଗଛ, ବିଦ୍ୟୁତ୍‌ ଖୁଣ୍ଟ; ୧ ମୃତ

ପଶ୍ଚିମବଙ୍ଗରେ ବାତ୍ୟା ‘ରେମାଲ୍‌’ର ପ୍ରଭାବରେ ଆସାମରେ ମଧ୍ୟ ଜନଜୀବନ ପ୍ରଭାବିତ ହୋଇଛି । ଅଧିକାରୀ କହିଛନ୍ତି ଯେ ମଙ୍ଗଳବାର ପ୍ରବଳ ବର୍ଷା ସହିତ ପବନ ଆସାମରେ ବିପର୍ଯ୍ୟୟ ସୃଷ୍ଟି କରିଛି ।

ପଶ୍ଚିମବଙ୍ଗରେ ବାତ୍ୟା ‘ରେମାଲ୍‌’ର ପ୍ରଭାବରେ ଆସାମରେ ମଧ୍ୟ ଜନଜୀବନ ପ୍ରଭାବିତ ହୋଇଛି । ଅଧିକାରୀ କହିଛନ୍ତି ଯେ ମଙ୍ଗଳବାର ପ୍ରବଳ ବର୍ଷା ସହିତ ପବନ ଆସାମରେ ବିପର୍ଯ୍ୟୟ ସୃଷ୍ଟି କରିଛି । ଏଥିରେ ଜଣେ ୧୭ ବର୍ଷ ବାଳକର ମୃତ୍ୟୁ ଘଟିଥିବା ବେଳେ ଅନେକ ଲୋକ ଆହତ ହୋଇଛନ୍ତି ।

ନ୍ୟୁଜ୍ ଏଜେନ୍ସିର ରିପୋର୍ଟ ମୁତାବକ, ମୋରିଗାଓଁ ଜିଲ୍ଲାର ଦିଘଲବୋରିରେ ଏକ ଅଟୋ ରିକ୍ସା ଉପରେ ଗଛ ପଡ଼ିଯିବାରୁ ଏହା ତଳେ ଚାପି ହୋଇ ଜଣେ କଲେଜ ଛାତ୍ରଙ୍କ ମୃତ୍ୟୁ ଘଟିଛି । ମୃତକଙ୍କ ନାମ କୌଶିକ୍‌ ବୋର୍ଦୋଲୋଇକେ ବୋଲି ଜଣାପଡିଛି । ଏହି ଅଟୋରେ ଯାତ୍ରା କରୁଥିବା ଅନ୍ୟ ଚାରି ଜଣ ମଧ୍ୟ ଆହତ ହୋଇଛନ୍ତି ।

ଏହି ଘୂର୍ଣ୍ଣିବାତ୍ୟା ଯୋଗୁ ସୋନିତପୁର ଜିଲ୍ଲାର ଢେକିୟାଜୁଲିରେ ଏକ ସ୍କୁଲ ବସ୍‌ ଉପରେ ଗଛ ଭାଙ୍ଗି ପଡ଼ିଥିଲା । ଫଳରେ ବସ୍‌ ଭିତରେ ଥିବା ୧୨ ଜଣ ପିଲା ଏଥିରେ ଆହତ ହୋଇଥିଲେ । ସମସ୍ତଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି । ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା କହିଛନ୍ତି ଯେ ଖରାପ ପାଣିପାଗ ଆହୁରି ଆଗକୁ ଜାରି ରହିବାର ଆଶଙ୍କା ରହିଛି ।

ସିଏମ୍ ସୋସିଆଲ୍ ମିଡିଆ ପ୍ଲାଟଫର୍ମ ‘X’ରେ ଲେଖିଛନ୍ତି, ‘ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ମୁଁ ଅଧିକାରୀମାନଙ୍କୁ ସତର୍କ ରହିବାକୁ ନିର୍ଦ୍ଦେଶ ଦେଇଛି । ଯେ ପର୍ଯ୍ୟନ୍ତ କୌଣସି ଜରୁରୀ ସ୍ଥିତି ନ ଉପୁଜିଛି, ନାଗରିକମାନେ ଘରୁ ବାହାରନ୍ତୁ ନାହିଁ ଏବଂ ନିରାପଦରେ ରୁହନ୍ତୁ ବୋଲି ଅନୁରୋଧ କରାଯାଇଛି । ଆମେ ସ୍ଥିତି ଉପରେ କ୍ରମାଗତ ନଜର ରଖିଛୁ’।

ଅଧିକାରୀମାନେ କହିଛନ୍ତି ଯେ ପ୍ରବଳ ପବନ ହେତୁ ଗୌହାଟି ସମେତ ରାଜ୍ୟର ଅନେକ ସ୍ଥାନରେ ଗଛ ଉପୁଡ଼ି ପଡ଼ିଛି । ନିମ୍ନାଞ୍ଚଳରେ ବିଦ୍ୟୁତ୍‌ ଖୁଣ୍ଟ ଉପୁଡ଼ି ପଡ଼ିବାରୁ ବିଦ୍ୟୁତ୍ ଯୋଗାଣ ବ୍ୟାହତ ହୋଇଛି । ସହରଗୁଡ଼ିକରୁ ଜଳ ନିଷ୍କାସନ ହୋଇପାରୁ ନାହିଁ । ଏହି ଘୂର୍ଣ୍ଣିବାତ୍ୟା ପ୍ରଭାବରେ ସାରା ରାଜ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି ବୋଲି ଭାରତୀୟ ପାଣିପାଗ ବିଭାଗ (ଆଇଏମଡି) ଚେତାବନୀ ଦେଇଛି । ବର୍ତ୍ତମାନ ପରିସ୍ଥିତିର ମୁକାବିଲା ପାଇଁ ଏନ୍‌ଡିଆର୍‌ଏଫ୍‌ ଏବଂ ଏସ୍‌ଡିଆର୍‌ଏଫ୍‌ ଦଳ ସଜାଗ ଅଛନ୍ତି ।

Leave A Reply

Your email address will not be published.