ମେକ୍ସିକୋ ବାରରେ ଆଖିବୁଜା ଗୁଳିମାଡ଼, ୧୦ ମୃତ

ମେକ୍ସିକୋର ଏକ ବାରରେ ଆଖିବୁଜା ଗୁଳିମାଡ଼ ହୋଇଛି । ଏଥିରେ ୧୦ ଜଣଙ୍କ ମୃତ୍ୟୁ ହୋଇଥିବା ବେଳେ ୭ ଜଣ ଆହତ ହୋଇଛନ୍ତି । ସୂଚନା ଅନୁସାରେ, ଆକ୍ରମଣକାରୀ ଏକ ଟ୍ରକରେ ଆସିଥିଲେ ଏବଂ ବାରରେ ପଶି ଆଖିବୁଜା ଗୁଳି ଚଳାଇଥିଲେ । ଏଭଳି କାଣ୍ଡ ଘଟାଇବା ପରେ ସେମାନେ ସେଠାରୁ ଫେରାର ହୋଇଯାଇଥିଲେ । ପୋଲିସ ଆକ୍ରମଣକାରୀଙ୍କୁ ଖୋଜାଖୋଜି କରୁଛି ।

ବାରରେ ଅନେକ ଲୋକ ଥିବାବେଳେ ଏହି ଘଟଣା ଘଟିଥିଲା । ଆହତମାନଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ସେଠାରେ ସେମାନଙ୍କ ଚିକିତ୍ସା ଚାଲିଛି । ଏହି ଅଞ୍ଚଳରେ ପୂର୍ବରୁ ହିଁ ହିଂସା ଜାରି ରହିଛି । ତେଣୁ ଏହାକୁ ଆଧାର କରି ଅଧିକାରୀମାନେ ଘଟଣାର ତଦନ୍ତ ଆରମ୍ଭ କରିଛନ୍ତି ।

ଗତ କିଛି ଦିନ ହେବ ସହରରେ ହିଂସା ବ୍ୟାପିଛି । ଏଣୁ ଏଭଳି ଘଟଣା ସବୁ ସାମ୍ନାକୁ ଆସୁଛି । ନିକଟରେ ଏକ ସିଫୁଡ୍ ରେଷ୍ଟୁରାଣ୍ଟରେ ମଧ୍ୟ ୩ ଜଣଙ୍କୁ ହତ୍ୟା କରାଯାଇଥିଲା । ଏ ପର୍ଯ୍ୟନ୍ତ ମିଳିଥିବା ସୂଚନା ଅନୁସାରେ, ମେକ୍ସିକୋର କ୍ୱେରେଟାରୋସ୍ଥିତ ବାରରେ ଏହି ଗୁଳିକାଣ୍ଡ ଘଟିଛି ।

ଗତ ବିଳମ୍ବିତ ରାତିରେ ୪ ସଶସ୍ତ୍ର ଆକ୍ରମଣକାରୀ ବାର୍ ଭିତରେ ପଶିଥିଲେ ଏବଂ ଆଖିବୁଜା ଗୁଳି ଚଳାଇଥିଲେ । ଏହି ଘଟଣା ପରେ ପୋଲିସ ଅଞ୍ଚଳକୁ ସିଲ୍ କରି ତଦନ୍ତ ଆରମ୍ଭ କରିଛି ।