ପାକିସ୍ତାନରେ ଆତ୍ମଘାତୀ ବିସ୍ଫୋରଣ, ୧୭ ସୈନ୍ୟ ମୃତ

ପାକିସ୍ତାନରେ ପୁଣି ଆତ୍ମଘାତୀ ବିସ୍ଫୋରଣ । ଖୈବର ପଖତୁନଖୱା ପ୍ରଦେଶର ବନ୍ନୁ ଜିଲ୍ଲାରେ ଏକ ସୁରକ୍ଷା ପୋଷ୍ଟ ଉପରକୁ ଆତ୍ମଘାତୀ ଆକ୍ରମଣ କରାଯାଇଛି । ଆକ୍ରମଣକାରୀ ବିସ୍ଫୋରକ ଭର୍ତ୍ତି ଏକ ଗାଡ଼ିରେ ଆସି ଏଠାରେ ବିସ୍ଫୋରଣ କରିଛନ୍ତି । ଏହି ଆକ୍ରମଣରେ ୧୭ ଜଣ ପାକିସ୍ତାନୀ ସୈନ୍ୟଙ୍କ ମୃତ୍ୟୁ ହୋଇଥିବା ବେଳେ ଅନେକ ଜଣ ଆହତ ହୋଇଛନ୍ତି ।
ପାକିସ୍ତାନୀ ତାଲିବାନର ହାଫିଜ୍ ଗୁଲ୍ ବାହାଦୂର ଗୋଷ୍ଠୀ ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି ।
ସୂଚନା ମୁତାବକ, ମଙ୍ଗଳବାର ସନ୍ଧ୍ୟାରେ ଉତ୍ତର-ପଶ୍ଚିମ ପାକିସ୍ତାନରେ ଜଣେ ଆକ୍ରମଣକାରୀ ସୁରକ୍ଷା ପୋଷ୍ଟ ନିକଟରେ ନିଜର ବିସ୍ଫୋରକ ଭର୍ତ୍ତି ଗାଡ଼ିକୁ ଉଡ଼ାଇ ଦେଇଥିଲେ । ଏଥିରେ ପାଖାପାଖି ୧୭ ଜଣ ସୈନ୍ୟଙ୍କ ମୃତ୍ୟୁ ଘଟିଥିବା ଗୁଇନ୍ଦା ତଥା ସୁରକ୍ଷା ଅଧିକାରୀ ବୁଧବାର ସୂଚନା ଦେଇଛନ୍ତି । ବିସ୍ଫୋରଣ ପରେ ଫାୟାରିଂ ଖବର ମଧ୍ୟ ରହିଛି, ଯେଉଁଥିରେ ଆହତମାନଙ୍କ ସଂଖ୍ୟା ଆହୁରି ବଢ଼ିଯାଇଛି ।
ତେବେ ସରକାରଙ୍କ ତରଫରୁ ଏ ପର୍ଯ୍ୟନ୍ତ କୌଣସି ଅଫିସିଆଲ ବୟାନ ଜାରି କରାଯାଇ ନାହିଁ । କିନ୍ତୁ ଆତଙ୍କୀଙ୍କ ବିରୋଧରେ ସୁରକ୍ଷା ବାହିନୀ ଏକ ଅପରେସନ ଚଳାଇଥିବା ଗୁଇନ୍ଦା ଅଧିକାରମାନେ କହିଛନ୍ତି ।
ପାକିସ୍ତାନୀ ତାଲିବାନକୁ ‘ତହରିକ-ଏ-ତାଲିବାନ ପାକିସ୍ତାନ (ଟିଟିପି)’ ନାମରେ ମଧ୍ୟ ଜଣାଯାଇଥାଏ । ଏହା ଏକ ପୃଥକ ଗୋଷ୍ଠୀ, କିନ୍ତୁ ଏହି ଗୋଷ୍ଠୀ ଆଫଗାନିସ୍ତାନ ତାଲିବାନର ସହଯୋଗୀ, ଯିଏ ୨୦୨୧ରେ ଅଫଗାନିସ୍ତାନରେ ଶାସନ ସମ୍ଭାଳିଥିଲା । ଟିଟିପି ପାଇଁ ଆଫଗାନିସ୍ତାନରେ ତାଲିବାନର କବଜା ସଫଳ ହୋଇଥିଲା । ଏହାର ପ୍ରମୁଖ ନେତା ଓ ଯୋଦ୍ଧା ଆଫଗାନିସ୍ତାନରେ ଲୁଚି ରହିଛନ୍ତି ।