ତାମିଲନାଡ଼ୁର ଚେନ୍ନାଇ ନିକଟ ପଲ୍ଲାଭରମରେ ଦୂଷିତ ପାଣି ପିଇ ୩ ଜଣଙ୍କ ମୃତ୍ୟୁ ହୋଇଛି । ମୃତକମାନଙ୍କ ମଧ୍ୟରେ ୮୮ ବର୍ଷୀୟା ଜଣେ ମହିଳା ଅଛନ୍ତି । ଏହି ପାଣି ପିଇ ୨୦ରୁ ଅଧିକ ଅସୁସ୍ଥ ମଧ୍ୟ ହୋଇପଡ଼ିଛନ୍ତି । ଅସୁସ୍ଥ ବ୍ୟକ୍ତିମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏହି ଘଟଣା ପରେ ସ୍ଥାନୀୟ ବାସିନ୍ଦା ଅଭିଯୋଗ ଆଣି କହିଛନ୍ତି ଯେ ନିକଟରେ ହୋଇଥିବା ବର୍ଷା ଯୋଗୁ ସ୍ୱେରେଜ ପାଣି ପାନୀୟ ଜଳରେ ମିଶିଥିଲା ।
ଲୋକଙ୍କ କହିବା ହେଲା, ଦୂଷିତ ପାଣି ପିଇବା କାରଣରୁ ବାନ୍ତି, ମୁଣ୍ଡବିନ୍ଧା ସହ ଅନ୍ୟାନ୍ୟ ଗମ୍ଭୀର ସ୍ୱାସ୍ଥ୍ୟ ସମସ୍ୟା ଦେଖା ଦେଉଛି । ଏହି ଘଟଣାକୁ ନେଇ ଅଞ୍ଚଳରେ ଏକ ପ୍ରକାର ଭୟର ବାତାବରଣ ଖେଳିଯାଇଛି ।
ତାମିଲନାଡ଼ୁ ସ୍ୱାସ୍ଥ୍ୟମନ୍ତ୍ରୀ ମା ସୁବ୍ରମଣ୍ୟମ୍ ଏକ ସରକାରୀ ହସ୍ପିଟାଲରେ ଅସୁସ୍ଥ ବ୍ୟକ୍ତିମାନଙ୍କୁ ଭେଟି ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଛନ୍ତି । ମନ୍ତ୍ରୀ ନିଶ୍ଚିତ କରିଛନ୍ତି ଯେ ଗିଣ୍ଡିରେ କିଙ୍ଗ୍ ଇନଷ୍ଟିଚ୍ୟୁଟ୍ ଅଫ୍ ପ୍ରିଭେଣ୍ଟିଭ୍ ମେଡିସିନ ଆଣ୍ଡ ରିସର୍ଚ୍ଚରେ ପରୀକ୍ଷଣ ପାଇଁ ପାଣି ନମୁନା ପଠାଯାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ।
ତାମିଲନାଡ଼ୁ ମନ୍ତ୍ରୀ ଟିଏମ୍ ଅନବରସନ ମଧ୍ୟ ପ୍ରଭାବିତ ଅଞ୍ଚଳ ନିରୀକ୍ଷଣ କରିଥିଲେ ଏବଂ ତୁରନ୍ତ ଏକ ଚିକିତ୍ସା ଶିବିର ଆୟୋଜନ କରିବାକୁ ନିର୍ଦ୍ଦେଶ ଦେଇଛନ୍ତି । ମନ୍ତ୍ରୀ କହିଛନ୍ତି, ପିଇବା ପାଣି ଦୂଷିତ ଥିଲା କି ନାହିଁ, ତାହା ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଖିଆ ଯାଇଥିବା ଖାଦ୍ୟ ଯୋଗୁ ବି ଏଭଳି ସମସ୍ୟା ଦେଖା ଦେଇଥାଇପାରେ । ସେ ଦିଗରେ ମଧ୍ୟ ଯାଞ୍ଚ କରାଯାଉଛି । ଯଦି ପାଣି ଦୂଷିତ ହୋଇ ଥାଆନ୍ତା, ତେବେ ପୂରା ଅଞ୍ଚଳ ପ୍ରଭାବିତ ହୋଇ ଥାଆନ୍ତା ।
ଏହି ଘଟଣା ପରେ ଅଧିକାରୀମାନେ ସମ୍ଭାବ୍ୟ ଜଳ ପ୍ରଦୂଷଣ ଏବଂ ଅଧିକ ମୃତାହତକୁ ରୋକିବା ପାଇଁ ପଦକ୍ଷେପ ଗ୍ରହଣ କରିଛନ୍ତି ।
#WATCH | Tamil Nadu: Three people died, and 20 others fell ill yesterday, in Pallavaram near Chennai after allegedly consuming drinking water contaminated with sewage. The cause of death can be known only after the completion of the autopsy of 3 people. The deceased were… pic.twitter.com/umkSAL8ST8
— ANI (@ANI) December 6, 2024