ଜମ୍ମୁ-କଶ୍ମୀର : ସେନା ଗାଡ଼ି ଉପରେ ଆତଙ୍କୀ ହମଲା, ୩ ଜଣ ଯବାନ ସହିଦ

ଜମ୍ମୁ-କଶ୍ମୀରରେ ସେନା ଗାଡ଼ି ଉପରେ ଆତଙ୍କୀ ହମଲା । ୩ ଜଣ ଯବାନ ସହିଦ ହୋଇଛନ୍ତି । ଆହତ ହୋଇଛନ୍ତି ଆଉ ୩ ଜଣ । ରାଜୌରୀ ସେକ୍ଟରର ଥାନାମଣ୍ଡି ଅଞ୍ଚଳରେ ସେନାର ଦୁଇଟି ଗାଡ଼ି ଉପରେ ହମଲା କରିଛନ୍ତି ଆତଙ୍କବାଦୀ । ଆଜି  ଅପରାହ୍ଣ ୩ଟା ୪୫ ମିନିଟ ବେଳେ ଏହି ହମଲା ହୋଇଥିଲା । ସେନା ଗାଡ଼ି ଉପରେ ଆଖିବୁଜା ଗୁଳିମାଡ଼ କରିଥିଲେ ଆତଙ୍କବାଦୀ । ଏହାର କଡ଼ା ଜବାବ ଦେଇଥିଲେ ସୁରକ୍ଷା ବାହିନୀ ।

ସେନା ଓ ଆତଙ୍କୀଙ୍କ ମଧ୍ୟରେ ଚାଲିଥିଲା ଗୁଳି ବିନିମୟ । ଏଥିରେ ୩ ଜଣ ଯବାନ ସହିଦ ହୋଇଛନ୍ତି । ଗତକାଲି ସନ୍ଧ୍ୟାରୁ ରାଜୌରୀ ସେକ୍ଟରର ଥାନାମଣ୍ଡି ଅଞ୍ଚଳରେ ସେନା ପକ୍ଷରୁ ଆରମ୍ଭ ହୋଇଥିଲା ଆତଙ୍କବାଦୀ ନିପାତ ଅପରେସନ୍ । ଆଜିର ଗୁଳି ବିନିମୟ ପରେ ସଂପୃକ୍ତ ଅଞ୍ଚଳରେ ସେନା ଓ ପୋଲିସ ପକ୍ଷରୁ ସର୍ଚ୍ଚ ଅପରେସନ୍ ଜୋରଦାର ହୋଇଛି । ଗତ ମାସରେ ମଧ୍ୟ ରାଜୌରି ଜିଲ୍ଲାର କାଲାକୋଟ ଅଞ୍ଚଳରେ ଆତଙ୍କବାଦୀ ସେନା ଉପରେ ଆକ୍ରମଣ କରିଥିଲେ। ଏହି ଆକ୍ରମଣରେ ୨ କ୍ୟାପ୍ଟେନଙ୍କ ସହ ସହିଦ ହୋଇଥିଲେ ୨ ଜଣ ଯବାନ ।