ନିର୍ବାଚନ ଭିତରେ ବିହାର ପୋଲିସର ବଡ଼ କାର୍ଯ୍ୟାନୁଷ୍ଠାନ, ୬୦ ଲକ୍ଷ ନେପାଳି ଓ ୩୪ ଲକ୍ଷ ଭାରତୀୟ ନୋଟ୍ ଜବତ
ବିହାରର ମୋତିହାରୀରେ ଲୋକସଭା ନିର୍ବାଚନ ଭିତରେ ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ରବିବାର ଏଠାରେ ଚଢ଼ାଉ କରି ପୋଲିସ ବିପୁଳ ପରିମାଣର ଭାରତୀୟ ଏବଂ ନେପାଳି ନୋଟ୍ ଜବତ କରିଛି ।
ବିହାରର ମୋତିହାରୀରେ ଲୋକସଭା ନିର୍ବାଚନ ଭିତରେ ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ରବିବାର ଏଠାରେ ଚଢ଼ାଉ କରି ପୋଲିସ ବିପୁଳ ପରିମାଣର ଭାରତୀୟ ଏବଂ ନେପାଳି ନୋଟ୍ ଜବତ କରିଛି । ଗୋଟିଏ ଘରୁ ୩୪ ଲକ୍ଷରୁ ଅଧିକ ଭାରତୀୟ ଏବଂ ୬୦ ଲକ୍ଷରୁ ଅଧିକ ନେପାଳି ନୋଟ୍ ଜବତ କରାଯାଇଛି । ଏହା ବିଷୟରେ ଆୟକର ଏବଂ ଇଡି ଟିମ୍କୁ ସୂଚନା ଦିଆଯାଇଛି ।
ମୋତିହାରୀ ଏସ୍ପି କାନ୍ତେଶ କୁମାର ମିଶ୍ର କହିଛନ୍ତି ଯେ ରାକ୍ସୋଲର ଜଣେ ବ୍ୟବସାୟୀଙ୍କ ଘରେ ବିପୁଳ ପରିମାଣର ଭାରତୀୟ ଏବଂ ନେପାଳି ନୋଟ୍ ଜମା ହୋଇଥିବା ନେଇ ଗୁପ୍ତ ସୂଚନା ମିଳିଥିଲା । ପ୍ରଥମେ ଏହାର ଯାଞ୍ଚ କରାଯାଇଥିଲା ଏବଂ ପରେ ସଦର ଡିଏସ୍ପି ଶିଖର ଚୌଧୁରୀଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଥିଲା ।
ଟିମ୍ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ରାକ୍ସୋଲର ଉକ୍ତ ବ୍ୟବସାୟୀଙ୍କ ଘରେ ଚଢ଼ାଉ କରିଥିଲା । ଏହି ସମୟରେ ଘଟଣାସ୍ଥଳରୁ ପ୍ରାୟ ୩୪ ଲକ୍ଷ ୩୪ ହଜାର ୫୦୦ ଭାରତୀୟ ନୋଟ୍ ଏବଂ ୬୦ ଲକ୍ଷ ୧୮ ହଜାର ନେପାଳି ନୋଟ୍ ଜବତ କରାଯାଇଥିଲା । ପୋଲିସ ସୂଚନା ମୁତାବକ, ଘର ଭିତରୁ ପାଖାପାଖି ୯୪ ଲକ୍ଷରୁ ଅଧିକ ଟଙ୍କା ଜବତ କରାଯାଇଛି ।
ଯେତେବେଳେ ବ୍ୟବସାୟୀ ସନ୍ତୋଷଜନକ ଉତ୍ତର ଦେଇ ନ ଥିଲେ, ସେତେବେଳେ ମାଜିଷ୍ଟ୍ରେଟଙ୍କ ତତ୍ତ୍ୱାବଧାନରେ ଏହି ଟଙ୍କା ଜବତ କରାଯାଇଥିଲା । ଏ ନେଇ ଆୟକର ବିଭାଗ ଏବଂ ଇଡିକୁ ସୂଚନା ଦିଆଯାଇଥିବା ବେଳେ ଆୟକର ଅଧିକାରୀ ଖୁବ୍ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବେ ।
ଏହିପରି ଗତକାଲି ଉତ୍ତର ପ୍ରଦେଶର ଆଗ୍ରାରେ ଆୟକର ବିଭାଗ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଏଠାରେ ୩ ଜଣ ଜୋତା ବ୍ୟବସାୟୀଙ୍କ ଘରେ ଚଢ଼ାଉ ବେଳେ ଅମାପ ସମ୍ପତ୍ତି ମିଳିଥିଲା । ସରକାରୀ ସୂତ୍ର ମୁତାବକ, ୪୦ କୋଟି ନଗଦ ଟଙ୍କା ଜବତ କରାଯାଇଥିଲା । ଚଢ଼ାଉ ସମୟରେ ବ୍ୟବସାୟୀଙ୍କ ଘରେ ଟଙ୍କାର ପାହାଡ଼ ଦେଖିବାକୁ ମିଳିଥିଲା, ଯେଉଁଥିରେ ୫୦୦ ଟଙ୍କିଆ ନୋଟ୍ ରହିଥିଲା ।
ଆୟକର ବିଭାଗ ନୋଟ୍ଗୁଡ଼ିକୁ ଗଣିବା ପାଇଁ ବ୍ୟାଙ୍କ ଅଧିକାରୀ ଏବଂ କର୍ମଚାରୀମାନଙ୍କୁ ଦାୟିତ୍ୱ ଦେଇଥିଲା । କହି ରଖୁଛୁ, ଟିକସ ଫାଙ୍କିବା ଏବଂ ଆୟଠାରୁ ଅଧିକ ବେଆଇନ ସମ୍ପତ୍ତି ଠୁଳ ନେଇ ଆୟକର ବିଭାଗର ସନ୍ଦେହ ହୋଇଥିଲା । ଯେତେବେଳେ ଏ ସମ୍ପର୍କରେ ବିଭାଗ ସୂଚନା ପାଇଥିଲା, ସେତେବେଳେ ଅଧିକାରୀମାନେ ବ୍ୟବସାୟୀଙ୍କ ଘରେ ଚଢ଼ାଉ କରିଥିଲେ ।