ମଧ୍ୟପ୍ରଦେଶ: ୪୧ ବର୍ଷର ଏକ ଚୋରି ମାମଲାକୁ ଶନିବାର ଦିନ ନ୍ୟାସନାଲ ଲୋକ ଅଦାଲତରେ ଶୁଣାଣି ହୋଇ କେସକୁ ବନ୍ଦ କରାଯାଇଛି। ଘଟାଣାଟି ୧୯୭୮ ମସିହାର ବୋଲି ଜଣା ପଡିଛି। ବାବୁଲାଲ ନାମକ ଜଣେ ବ୍ୟକ୍ତି ବସରେ ଯାତ୍ରା କରୁଥିବା ସମୟରେ ତାଙ୍କର ୨୦ ଟଙ୍କା ଚୋରି ହୋଇଯାଇଥିଲା । ପୋଲିସ ଏହି ମାମଲାର ତଦନ୍ତ କରି ଇସ୍ମାଇଲ ଖାନ ନାମକ ଜଣେ ବ୍ୟକ୍ତଙ୍କୁ ଗିରଫ କରି କୋର୍ଟ ଚାଲଣ କରିଥିଲା। ସେବେଠାରୁ କୋର୍ଟର ପ୍ରତ୍ୟେକ ତାରିଖରେ ଇସ୍ମାଇଲ ଖାନ ଯୋଗ ଦେଉଥିଲେ କିନ୍ତୁ ୨୦୦୪ ମସିହାରେ ଇସ୍ମାଇଲ କୋର୍ଟର ତାରିଖରେ ଯୋଗ ଦେଲେ ନାହିଁ । ତେଣୁ ପୋଲିସ ତାଙ୍କ ଉପରେ ଅଦାଲତ ଅବମାନନା ଅଭିଯୋଗରେ ଏପ୍ରିଲ ୧୮ରେ ଗିରଫ କରି ଜେଲ ପଠାଇ ଦେଇଥିଲେ। ଯେହେତୁ ତାଙ୍କର କେହି ଜାମିନଦାର ନଥିଲେ ତେଣୁ ଇସ୍ମାଇଲଙ୍କୁ ଚାରିମାସ ଜେଲ ଦଣ୍ଡ ପରେ କୋର୍ଟରେ ହାଜର କରାଯାଇଥିଲା।
ଲୋକ ଅଦାଲତ ଶନିବାର ଦିନ ଅଭିଯୋଗକାରୀଙ୍କୁ ଏହାର ବିଚାର ପାଇଁ ଡାକାଇଥିଲେ । ଯେହେତୁ ମାମଲାଟି ୪୧ ବର୍ଷ ପୁରୁଣା ଅଟେ ଓ ଅଭିଯୁକ୍ତ ୪ମାସ ଜେଲରେ ସଜା କାଟିସରିଛନ୍ତି ତେଣୁ ଏହାକୁ ଆଗକୁ ବଢାଇବାର କିଛି ଅର୍ଥନାହିଁ ବୋଲି କୋର୍ଟ କହିଥିଲେ। ଶୁଣାଣି ବେଳେ ବାବୁଲାଲ ବିଚାରପତିଙ୍କୁ ନିବେଦନ କରି କହିଥିଲେ ସେ ଅଭିଯୁକ୍ତଙ୍କୁ ଜାଣି ନାହାନ୍ତି ଓ ତୁରନ୍ତ ଏହି ମାମଲାକୁ ଏଠାରେ ବନ୍ଦ କରାଯାଉ। ଅଭିଯୋଗ କାରୀ ବାବୁଲାଲଙ୍କ ମତକୁ ସହମତ କରି କୋର୍ଟ ତାଙ୍କୁ ଖଲାସ କରିବା ସହ ତାଙ୍କ କେସକୁ ବନ୍ଦ କରିଥିଲେ। ଜିଲ୍ଲା ଲୋକ ଅଦାଲତରେ ଆପୋଷ ବୁଝାମଣା ୭୬୯ ଓ ହାଇକୋର୍ଟରେ ୪୪୭ ମାମଲାକୁ ସେଟଲ୍ଡ କରାଯାଇଛି।