କରୋନା ମହାମାରୀ ମଧ୍ୟରେ ଆମେରିକାରେ ଆଉ ଏକ ଭୟଙ୍କର ସଂକ୍ରମଣ ବ୍ୟାପିବାରେ ଲାଗିଛି। ଏଠାରେ ପ୍ରାୟ ୪୦୦ ଲୋକ ସାଲମୋନେଲା ବ୍ୟାକ୍ଟେରିଆ ଶିକାର ହୋଇଛନ୍ତି । କାନାଡାରେ ମଧ୍ୟ ଏପରି କିଛି ମାମଲା ସାମ୍ନାକୁ ଆସିଛି । ଦେଶର ୩୧ ଟି ରାଜ୍ୟରେ ଏହି ସଂକ୍ରମଣ ବ୍ୟାପିଥିବା ବେଳେ ଏପର୍ଯ୍ୟନ୍ତ ୪୦୦ରୁ ଅଧିକ ଲୋକେ ଆକ୍ରାନ୍ତ ହେଲେଣି।
ଏହାପଛରେ ଥମସନ୍ ଇଣ୍ଟରନ୍ୟାଶନାଲ କମ୍ପାନୀ ଯୋଗାଉଥିବା ପିଆଜକୁ ଦାୟୀ କରାଯାଇଛି । ତେବେ ବ୍ୟାପୁଥିବା ସଂକ୍ରମଣର ସମ୍ପର୍କ ନାଲି ପିଆଜ ସହ ଥିବା ବେଳେ କାଲିଫର୍ଣ୍ଣିଆର ଏକ କମ୍ପାନୀକୁ ଏହାର ଉତ୍ସ ବୋଲି ସଂଘୀୟ ସ୍ୱାସ୍ଥ୍ୟ ଅଧିକାରୀ କହିଛନ୍ତି। ନାଲି ରଙ୍ଗର ପିଆଜ ଖାଇବା ପରେ ଲୋକମାନେ ସଂକ୍ରମିତ ହୋଇଥିଲେ । ଏହାପରେ କମ୍ପାନୀ ସମସ୍ତ ପିଆଜକୁ ଦୋକାନରୁ ଫେରାଇ ନେଇଛି । ତେବେ ଏହି ରୋଗ ଗତ ଜୁଲାଇ ୧୦ ତାରିଖରୁ ବ୍ୟାପିବାରେ ଲାଗିଛି।
ସାଲମୋନେଲାର ଶିକାର ହୋଇଥିବା ବ୍ୟକ୍ତି ସାଧାରଣତଃ ଡାଇରିଆ, ପେଟ କାଟିବା ଓ ଜ୍ୱର ଇତ୍ୟାଦି ଲଣକ୍ଷ ଦେଖାଯାଇଥାଏ। ସଂକ୍ରମିତ ହେବାର ୬ ଘଣ୍ଟାରୁ ୬ ଦିନ ପର୍ଯ୍ୟନ୍ତ ଏହାର ଲକ୍ଷଣ ଦେଖିବାକୁ ମିଳିଥାଏ । ୪ରୁ ୭ଦିନ ଯାଏ ସଂକ୍ରମିତ ବ୍ୟକ୍ତି ଅସୁସ୍ଥତା ଅନୁଭବ କରିଥାନ୍ତି । ୫ ବର୍ଷରୁ କମ୍ ଓ ୬୫ ବର୍ଷରୁ ଅଧିକ ବୟସର ବ୍ୟକ୍ତିଙ୍କୁ ସଂକ୍ରମଣ ଭୟ ଅଧିକ ରହିଛି । କିଛି ମାମଲାରେ ଏହି ବ୍ୟାକ୍ଟେରିଆ ଶରୀରର ଅନ୍ୟ ଅଙ୍ଗକୁ ମଧ୍ୟ ବ୍ୟାପିଥାଏ । ଫଳରେ ଆକ୍ରାନ୍ତମାନେ ହସ୍ପିଟାଲରେ ମଧ୍ୟ ଭର୍ତ୍ତି ହୋଇଥାନ୍ତି ।
ବେଳେ ବେଳେ ଏହି ବ୍ୟାକ୍ଟେରିଆ ଅନ୍ତନଳୀକୁ ସଂକ୍ରମଣ କରିବା ପରେ ଅନ୍ୟ ଅଙ୍ଗକୁ ବ୍ୟାପିଥାଏ। କିନ୍ତୁ ଆମେରିକାରେ ଫୁଡ ଆଣ୍ଡ ଡ୍ରଗ ଆଡମିନିଷ୍ଟ୍ରେସନ ଏହି ସଂକ୍ରମଣ ପିଆଜ କିମ୍ବା ଅନ୍ୟ କୌଣସି ଯୋଗୁଁ ବ୍ୟାପୁଛି କି ନାହିଁ ପତ୍ତା ଲଗାଉଛି।