କେନ୍ଦ୍ର ସରକାର ଅଗ୍ନିପଥ ଯୋଜନାରେ ପରିବର୍ତ୍ତନ ଆଣିପାରନ୍ତି । ପ୍ରତିରକ୍ଷା ମନ୍ତ୍ରଣାଳୟ ସହ ଜଡ଼ିତ ସୂତ୍ର ମୁତାବକ, ଅଗ୍ନିପଥ ଯୋଜନାରେ ନିଶ୍ଚିତ ରୂପେ ପରିବର୍ତ୍ତନ କରାଯିବ, କିନ୍ତୁ ଠିକ୍ ସମୟରେ ଏହି ସବୁ ହେବ । କୁହାଯାଉଛି ଯେ ଭାରତୀୟ ସେନାରେ ଅଗ୍ନିବୀରଙ୍କ ସଂଖ୍ୟା ବୃଦ୍ଧି, ସେମାନଙ୍କ ଦରମା ଏବଂ ଯୋଗ୍ୟତାରେ ପରିବର୍ତ୍ତନ ଆଣିବା ଉପରେ ସରକାର ବିଚାର ବିମର୍ଶ କରୁଛନ୍ତି ।
ଅଗ୍ନିପଥ ଯୋଜନାକୁ ନେଇ ୟୁନିଟ୍ ଏବଂ ସଂରଚନା ମଧ୍ୟରେ ସର୍ଭେ ଓ ଫିଡ୍ବ୍ୟାକ୍ ପ୍ରକ୍ରିୟା ଜାରି ରହିଛି । ପୂର୍ବରୁ ହିଁ ସେନା ପରିବର୍ତ୍ତନ ଉପରେ ସରକାରଙ୍କୁ ସୁପାରିଶ କରିସାରିଛି । ତେବେ ଏହି ପରିବର୍ତ୍ତନଗୁଡ଼ିକ ବିଳମ୍ବ ହୋଇପାରେ, କିନ୍ତୁ ପରିବର୍ତ୍ତନ ହେବା ନିଶ୍ଚିତ ।
କହି ରଖୁଛୁ ଯେ ଭାରତ ସରକାର ୨୦୨୨ ମସିହା ଜୁନ୍ରେ ପ୍ରତିରକ୍ଷା ବାହିନୀ ପାଇଁ ଅଗ୍ନିପଥ ନିଯୁକ୍ତି ଯୋଜନା ଘୋଷଣା କରିଥିଲେ । ଏହା ଅଧୀନରେ ଭାରତୀୟ ସୈନିକମାନଙ୍କୁ କେବଳ ୪ ବର୍ଷ ପାଇଁ ନିଯୁକ୍ତ କରାଯାଇଥାଏ । ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅଗ୍ନିପଥ ଯୋଜନାରେ ସୈନିକ ନିଯୁକ୍ତି ପ୍ରକ୍ରିୟାରେ ଏକ ପ୍ରମୁଖ ପରିବର୍ତ୍ତନ ଘୋଷଣା କରିଛନ୍ତି ।
ଏହି ଯୋଜନାରେ ୪ ବର୍ଷ ପାଇଁ ଯୁବକମାନଙ୍କୁ ସେନାରେ ନିଯୁକ୍ତି ବ୍ୟବସ୍ଥା ରହିଛି । ଏହା ବ୍ୟତୀତ ଅବସର ସହିତ ସେମାନଙ୍କୁ ସେବା ନିଧି ପ୍ୟାକେଜ୍ ଦିଆଯିବା ଯୋଜନା ମଧ୍ୟ ସ୍କିମ୍ରେ ଅନ୍ତର୍ଭୁକ୍ତ । ଯୋଜନା ଅଧୀନରେ ସେନାରେ ଯୋଗଦେଉଥିବା ଯୁବକମାନଙ୍କୁ ଅଗ୍ନିବୀର କୁହାଯାଇଥାଏ ।
ଯୁବକମାନଙ୍କୁ ପ୍ରଥମ ବର୍ଷରେ ୪.୭୬ ଲକ୍ଷ ଟଙ୍କା ପ୍ୟାକେଜ୍ ମିଳିଥାଏ, ଯାହା ଚତୁର୍ଥ ବର୍ଷ ସୁଦ୍ଧା ବଢ଼ି ପାଖାପାଖି ୬.୯୨ ଲକ୍ଷ ଟଙ୍କା ହୋଇଥାଏ ।
