କର୍ଣ୍ଣାଟକ: କଲ୍ୟାଣ ଜୁଏଲର୍ସ ଶୋ’ରୁମ୍ରେ ଫାଟିଲା AC, ୩ ଆହତ
କର୍ଣ୍ଣାଟକର ବେଲାରି ସହରରେ ଥିବା କଲ୍ୟାଣ ଜୁଏଲର୍ସ ଶୋ’ ରୁମ୍ରେ ଏକ ବଡ଼ ଧରଣର ଦୁର୍ଘଟଣା ଘଟିଛି । ଏଠାରେ ଖରାପ ହୋଇଯାଇଥିବା ଏକ ଏୟାର କଣ୍ଡିସନର (ଏସି)ରେ ହଠାତ୍ ବିସ୍ଫୋରଣ ହୋଇଥିଲା । ଏହି ବିସ୍ଫୋରଣ ଏତେ ଜୋର୍ଦାର ଥିଲା ଯେ ବ୍ଲାଷ୍ଟ୍ ହେବା କ୍ଷଣି ଶୋ’ ରୁମ୍ ଭିତରେ ନିଆଁ ଲାଗିଯାଇଥିଲା ।
କର୍ଣ୍ଣାଟକର ବେଲାରି ସହରରେ ଥିବା କଲ୍ୟାଣ ଜୁଏଲର୍ସ ଶୋ’ ରୁମ୍ରେ ଏକ ବଡ଼ ଧରଣର ଦୁର୍ଘଟଣା ଘଟିଛି । ଏଠାରେ ଖରାପ ହୋଇଯାଇଥିବା ଏକ ଏୟାର କଣ୍ଡିସନର (ଏସି)ରେ ହଠାତ୍ ବିସ୍ଫୋରଣ ହୋଇଥିଲା । ଏହି ବିସ୍ଫୋରଣ ଏତେ ଜୋର୍ଦାର ଥିଲା ଯେ ବ୍ଲାଷ୍ଟ୍ ହେବା କ୍ଷଣି ଶୋ’ ରୁମ୍ ଭିତରେ ନିଆଁ ଲାଗିଯାଇଥିଲା । ଏହି ଦୁର୍ଘଟଣାରେ ପୋଡ଼ି ହୋଇ ୩ ଜଣ ଆହତ ହୋଇଛନ୍ତି । ସେମାନଙ୍କ ଭିତରୁ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି ।
ସମସ୍ତ ଆହତଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ଖବର ପାଇ ପୋଲିସ ପହଞ୍ଚି ପୂରା ଘଟଣାର ତଦନ୍ତ ଆରମ୍ଭ କରିଛି । ସୂଚନା ମୁତାବକ, ବେଲାରିର ଟେରୁ ଷ୍ଟ୍ରିଟ୍ରେ ଥିବା କଲ୍ୟାଣ ଜୁଏଲର୍ସରେ ଏହି ଘଟଣା ଘଟିଛି । ଏସିରେ ବିସ୍ଫୋରଣ ଯୋଗୁ ଶୋ’ ରୁମ୍ର କାଚଗୁଡ଼ିକ ଭାଙ୍ଗି ଚୁର୍ମାର ହୋଇଯାଇଛି । ତେବେ ଏହାର କିିଛି ସମୟ ପରେ ଶୋ’ ରୁମ୍ ଭିତର ସମ୍ପୂର୍ଣ୍ଣ ଧୂଆଁମୟ ହୋଇଯାଇଥିଲା ।
ସୂଚନା ପାଇ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲା ଏବଂ ତୁରନ୍ତ ରେସ୍କ୍ୟୁ ଅପରେସନ ଆରମ୍ଭ କରିଥିଲା । ଦୁର୍ଘଟଣା ପରେ ଆହତମାନଙ୍କୁ ଚିକିତ୍ସା ପାଇଁ ତୁରନ୍ତ ପାଖ ହସ୍ପିଟାଲ ନିଆଯାଇଥିଲା । ହେଲେ ସ୍ୱାସ୍ଥ୍ୟାବସ୍ଥା ଦେଖି ସେଠାରୁ ସେମାନଙ୍କୁ ବେଲାରିସ୍ଥିତ ବିଜୟନଗର ଇନ୍ଷ୍ଟିଚ୍ୟୁଟ ଅଫ୍ ମେଡିକାଲ୍ ସାଇନ୍ସେସ୍କୁ ସ୍ଥାନାନ୍ତର କରାଯାଇଛି । ଏଠାରେ ଆହତମାନଙ୍କ ଚିକିତ୍ସା ଚାଲିଛି ।
ରିପୋର୍ଟ ମୁତାବକ, ଶୋ’ ରୁମ୍ରେ ଲାଗିଥିବା ଏକ ଖରାପ ଏସିରେ ଅଚାନକ୍ ବିସ୍ଫୋରଣ ହୋଇଥିଲା । ଦୁର୍ଘଟଣା ପରେ ଶୋ’ ରୁମ୍ର କର୍ମଚାରୀମାନେ ଭୟଭୀତ ହୋଇପଡ଼ି ଏଣେତେଣେ ଦୌଡ଼ିବାକୁ ଲାଗିଥିଲେ । ଦୁର୍ଘଟଣା ପରର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ସାମ୍ନାକୁ ଆସିଛି । ଏଥିରେ ଗୁରୁତର ଆହତ ଜଣେ ବ୍ୟକ୍ତିଙ୍କୁ ହସ୍ପିଟାଲ ନିଆଯାଉଥିବା ଦେଖିବାକୁ ମିଳୁଛି । ପୋଲିସ ଏହି ଘଟଣାରେ ଏକ ମାମଲା ରୁଜୁ କରିଛି । ଟିମ୍ ଘଟଣାସ୍ଥଳରେ ଉପସ୍ଥିତ ରହି ମାମଲାର ତଦନ୍ତ କରୁଛି ।