ସେପ୍ଟେମ୍ବର ୨୧ରେ ଦିଲ୍ଲୀ ମୁଖ୍ୟମନ୍ତ୍ରୀ ପଦର ଶପଥ ନେବେ ଆତିଶୀ
ଆତିଶୀଙ୍କ ନେତୃତ୍ୱରେ ଦିଲ୍ଲୀରେ ସେପ୍ଟେମ୍ବର ୨୧ରେ ଗଠନ ହେବ ଆମ୍ ଆଦମୀ ପାର୍ଟିର ସରକାର । ଆମ୍ ଆଦମୀ ପାର୍ଟି ବିଧାୟକ ଦଳର ନେତା ଆତିଶୀଙ୍କୁ ଏଲ୍ଜି ଭି.କେ. ସକ୍ସେନା ସେପ୍ଟେମ୍ବର ୨୧ରେ ମୁଖ୍ୟମନ୍ତ୍ରୀ ପଦର ଶପଥ ପ୍ରଦାନ କରାଇବେ । ଏହା ସହିତ ଦଳର କିଛି ବିଧାୟକ ମଧ୍ୟ ମନ୍ତ୍ରୀ ଭାବେ ଶପଥ ଗ୍ରହଣ କରିବେ । ଏହି ସମୟରେ ଅରବିନ୍ଦ କେଜ୍ରିୱାଲ, ମନୀଷ ସିସୋଦିଆଙ୍କ ସମେତ ଦଳର ଅନେକ ନେତା ମଧ୍ୟ ଉପସ୍ଥିତ ରହିବେ ।
ଦିଲ୍ଲୀର ତୃତୀୟ ମହିଳା ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ଆତିଶୀ । ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ଅରବିନ୍ଦ କେଜ୍ରିୱାଲ । ସେ ଉପରାଜ୍ୟପାଳଙ୍କୁ ଭେଟି ନିଜର ଇସ୍ତଫାପତ୍ର ପ୍ରଦାନ କରିଥିଲେ ।
ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଗିରଫ ହୋଇଥିବା କେଜ୍ରିୱାଲ ଗତ ଶୁକ୍ରବାର ଜେଲରୁ ବାହାରିଥିଲେ । ଏହାପରେ ରବିବାର ସେ ଦଳୀୟ କର୍ମୀଙ୍କୁ ସମ୍ବୋଧନ କରି ୪୮ ଘଣ୍ଟା ମଧ୍ୟରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ବୋଲି ଘୋଷଣା କରିଥିଲେ । ଉପରାଜ୍ୟପାଳଙ୍କୁ ଇସ୍ତଫାପତ୍ର ଦେବା ପୂର୍ବରୁ ଆପ୍ର ବିଧାୟକ ଦଳ ବୈଠକ ବସିଥିଲା । ଏହି ସମୟରେ କେଜ୍ରିୱାଲଙ୍କ ପରେ ଆତିଶୀ ମୁଖ୍ୟମନ୍ତ୍ରୀ ହେବେ ବୋଲି ପ୍ରସ୍ତାବ ଦିଆଯାଇଥିଲା । ଏହାକୁ ସର୍ବସମ୍ମତିକ୍ରମେ ଗ୍ରହଣ କରାଯାଇଥିଲା ।
