ବନ୍ଧୁ ସାଜିଲା ବଇରୀ: ସାଙ୍ଗକୁ ମିଶି ହତ୍ୟା କଲେ ତିନି ନାବାଳକ, ଖାଇବାକୁ ଦେଲେ ରସଗୋଲା…

ପଶ୍ଚିମବଙ୍ଗ: ବନ୍ଧୁ ସାଜିଲା ବଇରୀ । ନିଜ ସାଙ୍ଗକୁ ମିଶି କଲେ ହତ୍ୟା । ବିଶ୍ୱାସରେ ଦେଲେ ଧୋକା । ତିନିଜଣ ନାବାଳକ ମିଶି ସେମାନଙ୍କ ୧୪ ବର୍ଷର ସାଙ୍ଗକୁ କମ୍ପ୍ୟୁଟର କିଣିବା ପାଇଁ ଅପହରଣ ପରେ ହତ୍ୟା କରିଥିବା ନେଇ ଆସିଛି ସାଙ୍ଘାତିକ ଅଭିଯୋଗ । ପଶ୍ଚିମବଙ୍ଗର ନାଦିଆ ଜିଲ୍ଲାର କ୍ରୀଷ୍ଣାନଗର ଘୁରନି ଅଞ୍ଚଳରେ ଘଟିଛି ଏହି ଛାତିଥରା ଘଟଣା। ସବୁଠାରୁ ଆଶ୍ଚର୍ଯ୍ୟର କଥା କି, ମାରିବା ପୂର୍ବରୁ ନିଜ ସାଙ୍ଗର ଶେଷ ଇଚ୍ଛା ପୂରଣ କରିଥିଲେ ଏହି ଦଗାବାଜ୍ ସାଙ୍ଗମାନେ । ରସଗୋଲା ଖୁଆଇବା ସହ କୋଲ୍ଡ ଡ୍ରିଙ୍କସ୍ ପିଇବାକୁ ଦେଇଥିଲେ । ଏହାପରେ ଗଳା କାଟି କରିଥିଲେ ହତ୍ୟା ।

ତେବେ ସୂଚନା ଥାଉକି କି, ଏକ ଅଖା ଭିତରେ ବନ୍ଧା ହୋଇଥିବା ମୃତଦେହ ଗତ ଶନିବାର ଦିନ କ୍ରୀଷ୍ଣାନଗର ସହର ଉପକଣ୍ଠ ହିଜୁଲି ଅଞ୍ଚଳର ଏକ ପୋଖରୀରୁ ଉଦ୍ଧାର କରାଯାଇଥିଲା । ଏହାପରେ ତଦନ୍ତ ଆରମ୍ଭ କରିଥିଲା ପୋଲିସ୍ । ତଦନ୍ତ ପରେ ପ୍ରକୃତ ଘଟଣା ସାମ୍ନାକୁ ଆସିଥିଲା । ଗେମ୍ ଖେଳିବା ପାଇଁ କମ୍ପ୍ୟୁଟର ଦରକାର ଥିଲା ତିନି ସାଙ୍ଗଙ୍କୁ । ଯେଉଁଥିବା ତିନି ନାବାଳକ ମିଶି ରଚିଥିଲେ ଷଡଯନ୍ତ୍ର । ସେମାନେ ନିଜର ଆଉ ଏକ ସାଙ୍ଗକୁ ପ୍ରଥମେ ଅପହରଣ କରିଥିଲେ ଏବଂ ଅପହରଣ ପରେ ହତ୍ୟା କରିଥିଲେ । ପୋଲିସ୍ ତିନି ନାବାଳକଙ୍କୁ କାବୁ କରି ଗତ ରବିବାର କ୍ରୀଷ୍ଣାନଗରର ଜୁଭେନାଲ୍ କୋର୍ଟରେ ହାଜର କରିଥିଲା।

ଅଭିଯୋଗ ମୁତାବକ, ଗତ ଶୁକ୍ରବାର ଅପରାହ୍ନରେ ଘୁରନି ଅଞ୍ଚଳର ୮ମ ଶ୍ରେଣୀର ଛାତ୍ର କିଛି ଜିନିଷ କିଣିବାକୁ ନିକଟସ୍ଥ ଦୋକାନକୁ ଯାଇଥିବାବେଳେ ଆଉ ଘରକୁ ଫେରିନଥିଲେ । ବହୁ ଖୋଜାଖୋଜି କରିବା ପରେ ନିଖୋଜ ହେବା ନେଇ ପରିବାର ଲୋକେ ଥାନାରେ ଅଭିଯୋଗ କରିଥିଲେ । ଏହାପରେ ସକାଳେ ମୃତ ନାବାଳକଙ୍କ ମାଙ୍କ ନିକଟକୁ ଏକ କଲ୍ ଆସିଥିଲା । ଯେଉଁଥିରେ ତାଙ୍କୁ ୩ଲକ୍ଷ ଟଙ୍କା ଦେବାକୁ କୁହାଯାଇଥିଲା । ଏହା ପରେ ସେ ଏନେଇ କୋଟୱାଲୀ ପୋଲିସ୍ ଷ୍ଟେସନକୁ ସୂଚନା ଦେଇଥିଲେ।

ଏପଟେ ପୋଲିସ୍ କହିଛି ତିନି ନାବାଳକ ୧୦ମ ଶ୍ରେଣୀର ଛାତ୍ର । ଯେଉଁମାନେ ମୃତ ନାବାଳକ ସହିତ ସେହି ସମାନ ସ୍କୁଲ୍ ରେ ପାଠ ପଢୁଥିଲେ ଏବଂ ସେହି ଗୋଟିଏ ଅଞ୍ଚଳରେ ହିଁ ବସବାସ କରୁଥିଲେ । ତିନି ଜଣ ଛାତ୍ର ହତ୍ୟା କରିଥିବା କଥା ସ୍ୱୀକାର କରିଛନ୍ତି । ଏପଟେ ହତ୍ୟା ପଛର ପ୍ରକୃତ କାରଣ ଜାଣିବା ପାଇଁ ତଦନ୍ତ କରୁଛି ପୋଲିସ୍। ଖବର ମିଳିବା କ୍ଷଣି ପୋଲିସ୍ ଘଟଣାସ୍ଥଳରେ ପହଁଚି ଶବ ଜବତ କରିବା ସହିତ ପୋଷ୍ଟମର୍ଟମ ପାଇଁ ପଠାଇଦେଇଥିଲା ।

ସ୍ଥାନୀୟ ଲୋକଙ୍କ ଠାରୁ ମିଳିଥିବା ସୂଚନା ଅନୁଯାୟୀ, ମୃତକଙ୍କ ପିତାଙ୍କର ବହୁ ପୂର୍ବରୁ ମୃତ୍ୟୁ ଘଟିଥିଲା ​​ଏବଂ ତାଙ୍କ ମା ‘ଆୟା’ ଭାବରେ କାର୍ଯ୍ୟ କରୁଥିଲେ । ନିଜ ମାଙ୍କ ସହିତ ନାବାଳକଟି ନିଜ ମାମୁଁ ଘରେ ରହୁଥିଲେ ।