କିଛି ଦିନ ତଳେ ଗର୍ଭିଣୀ ହାତୀ ହତ୍ୟା ଘଟଣା ପରି ଏକ ହୃଦୟସ୍ପର୍ଶୀ ଘଟଣା ଦେଶ ବାସୀଙ୍କ ମନରୁ ଲିଭି ନଥିବା ବେଳେ ବିହାରର ଜଣେ ବ୍ୟକ୍ତିଙ୍କ ପଶୁ ପ୍ରେମ ଏବେ ଚାରି ଆଡେ ଚହଳ ସୃଷ୍ଟି କରିଛି । ବିହାର ବାସିନ୍ଦା ଏହି ବ୍ୟକ୍ତି ଜଣକ ନିଜର ସମସ୍ତ ସମ୍ପତ୍ତି ଦୁଇ ହାତୀଙ୍କ ନାଁରେ କରି ଦେଇଛନ୍ତି । ବିହାର ରାଜଧାନୀ ପାଟଣା ସ୍ଥିତ ସଟେ ଯାନିପୁର ଗ୍ରାମ ନିବାସୀ ତଥା ଐରାବତ ଟ୍ରଷ୍ଟର ମୁଖ୍ୟ ପ୍ରବନ୍ଧକ ୫୦ ବର୍ଷୀୟ ଅଖତାର ଇମାମ ନିଜ ଦ୍ୱାରା ପାଳିତ ଦୁଇ ହାତୀ ମୋତି ଓ ରାଣୀଙ୍କ ନାଁରେ ନିଜର ସମସ୍ତ ସମ୍ପତ୍ତି ସେମାନଙ୍କ ନାଁରେ କରି ଦେଇଛନ୍ତି । କିନ୍ତୁ ଅଖତାରଙ୍କ ଏହି ପଦକ୍ଷେପ ନେଇ ତାଙ୍କୁ ପରିବାର ସଦସ୍ୟଙ୍କ ବିରୋଧର ସାମ୍ନା କରିବାକୁ ପଡିଛି । କିନ୍ତୁ ଏବାବଦରେ ଅଖତାର କହିଛନ୍ତିକି ତାଙ୍କ ଜୀବନ କୁ ସେ ହାତୀ ମାନଙ୍କ ପାଇଁ ସମର୍ପିତ କରି ଦେଇଛନ୍ତି ।
ଏହା ପଛର ରହସ୍ୟ ବି ବଖାଣିଛନ୍ତି । ଅଖତାରଙ୍କ ଅନୁଯାୟୀ ଥରେ ତାଙ୍କ ଉପରକୁ ମରଣାତ୍ମକ ଆକ୍ରମଣ ହୋଇଥିଲା । ଥରେ ଅଖତାର ଶୋଇଥିବା ସମୟରେ ବନ୍ଧୁକ ଧରି କିଛି ଦୁବୃତ୍ତ ତାଙ୍କ ଉପରକୁ ଆକ୍ରମଣ କରିବାକୁ ଆସିଥିଲେ । ଏହି ସମୟରେ ତାଙ୍କ ପାଳିତ ଦୁଇ ହାତୀ ହିଁ ଅଖତାରଙ୍କ ଜୀବନ ବଞ୍ଚାଇଥିଲେ । ନିଦରୁ ଉଠି ଦେଖନ୍ତିତ ସେହି ଦୁବୃତ୍ତ ମାନେ ହାତୀ ମାନଙ୍କୁ ଡରି ଦୌଡ଼ି ପଳାଇ ଥିଲେ । ଅଖତାରଙ୍କ କାହାଣୀ ବି କିଛିଟା ଅଜବ ଧରଣର । ତାଙ୍କ ଅନୁଯାୟୀ ତାଙ୍କ ପୁଅ ନିଜ ପ୍ରେମିକା ଉପରେ ଦୁଷ୍କର୍ମ ଆରୋପ ଲଗାଇ ତାଙ୍କୁ ବାରମ୍ବାର ଜେଲ ପଠାଇ ସାରିଛି । ଅବଶ୍ୟ ପଛରେ ଏହି ଆରୋପ ଭୁଲ ପ୍ରମାଣିତ ହୋଇଛି । ଅଖତାର ଆହୁରି ମଧ୍ୟ କହିଛନ୍ତିକି, ତାଙ୍କ ପୁଅ ପଶୁ ତସ୍କର ମାନଙ୍କ ସହ ମିଶି ଅନେକ ଥର ତାଙ୍କ ହାତୀ ମାନଙ୍କୁ ବିକ୍ରି କରିବାକୁ ଚେଷ୍ଟା ବି କରିଛି । ଏନେଇ ସେ ଅନେକ ଥର ପୋଲିସ ହାତରେ ଧରା ବି ପଡିଛି । ଏହାକୁ ଆଖି ଆଗରେ ରଖିହିଁ ନିଜର ସମସ୍ତ ସମ୍ପତ୍ତି ଅଖତାର ନିଜ ହାତୀଙ୍କ ନାଁରେ କରି ଦେଇଥିବା କହିଛନ୍ତି ।
ଯଦି ହାତୀଙ୍କର କିଛି ହୁଏ ତେବେ ମୋ ପରିବାର ସଦସ୍ୟଙ୍କୁ କିଛି ହେଲେ ମିଳିବ ନାହିଁ । ହାତୀଙ୍କ ପ୍ରତି ଥିବା ଅହେତୁକ ଦୁର୍ବଳତା କାରଣରୁ ନିଜ ପରିବାର ଠାରୁ ଦୀର୍ଘ ୧୦ ବର୍ଷ ଧରି ଦୁରେଇ ରହିଛନ୍ତି ଅଖତାର । ନିଜ ବଡ଼ ପୁଅ ମେରାଜଙ୍କ ବ୍ୟବହାରରେ ଅତିଷ୍ଠ ହୋଇ ତାଙ୍କୁ ନିଜ ସମ୍ପତ୍ତିରୁ ବଂଚିତ କରିଛନ୍ତି ଅଖତାର । ନିଜ ସ୍ତ୍ରୀଙ୍କ ନାଁରେ ନିଜ ସମସ୍ତ ସମ୍ପତ୍ତିର ଅଧା ଭାଗ ଲେଖି ଦେଇଥିବା ବେଳେ ବାକି ଅଧା ଭାଗର ପାଖାପାଖି ୫ କୋଟି ଟଙ୍କା ମୂଲ୍ୟର (ଜମି, କ୍ଷେତ, ଘର)ମୂଲ୍ୟର ସମ୍ପତ୍ତିକୁ ସେ ନିଜ ଦୁଇ ହାତୀଙ୍କ ନାଁ ରେ କରିଛନ୍ତି । ଅଖତାରଙ୍କ ଅନୁଯାୟୀ, ଯଦି ଦୁଇ ହାତୀଙ୍କ ମୃତ୍ୟୁ ଏକା ସାଙ୍ଗରେ ହୋଇଯାଏ ତେବେ ସମସ୍ତ ସମ୍ପତ୍ତି ”ଐରାବତ ଟ୍ରଷ୍ଟ” ହାତକୁ ଚାଲିଯିବ ।