ଜୟପୁରରେ ୧୦୦ ବ୍ୟକ୍ତିଗତ ଲକର୍‌ରେ ରହିଛି ୫୦୦ କୋଟିର କଳାଧନ ଓ ୫୦ କିଲୋ ସୁନା; ନେତା ଆଣିଲେ ବଡ଼ ଅଭିଯୋଗ

ଜୟପୁରରେ ୧୦୦ ବ୍ୟକ୍ତିଗତ ଲକର୍‌ରେ ରଖାଯାଇଛି ୫୦୦ କୋଟି ଟଙ୍କାର କଳାଧନ ଏବଂ ୫୦ କିଲୋଗ୍ରାମ୍‌ ସୁନା। ଏଭଳି ଆଶ୍ଚର୍ଯ୍ୟଜନକ ଦାବି କରିଛନ୍ତି ବିଜେପିର ରାଜ୍ୟସଭା ସଦସ୍ୟ କିରୋଡି ଲାଲ୍‌ ମିଣା। ସେ ପୋଲିସ ଉପସ୍ଥିତିରେ ଲକର୍‌ ଖୋଲିବାକୁ ଦାବି କରିଛନ୍ତି।

ବିଧାନସଭା ନିର୍ବାଚନ ଘୋଷଣା ପରଠାରୁ ବର୍ତ୍ତମାନ ରାଜସ୍ଥାନରେ ରାଜନୀତି ସରଗରମ୍‌ ରହିଛି। ତେବେ କିରୋଡି ଲାଲ ମିଣା ଏହି ଲକର୍‌ କାହାର ବୋଲି ଜଣାଇବାକୁ ପ୍ରଥମେ ମନା କରିଦେଇଥିଲେ, କିନ୍ତୁ ପରେ କହିଥିଲେ କି, ୫୦ଟି ଲକର ଅପରେଟ୍‌ ହେଉଛି ଏବଂ ସେଥିମଧ୍ୟରୁ ୧୦ଟି କିଛି ଅଧିକାରୀଙ୍କର ରହିଛି। ମିଣା ଅଭିଯୋଗ କରିଛନ୍ତି ଯେ ଏହି ଲକର୍‌ରେ ପେପର୍‌ ଲିକ୍, ଆଇଟି (ସୂଚନା ପ୍ରଯୁକ୍ତିବିଦ୍ୟା) ଦୁର୍ନୀତି, ଜଳ ଜୀବନ ମିଶନ (ଜେଜେଏମ୍) ଦୁର୍ନୀତିରୁ ଆୟ କରାଯାଇଥିବା କଳା ଧନ ମହଜୁଦ୍‌ ଅଛି।

ଏଭଳି ଆଶ୍ଚର୍ଯ୍ୟଜନକ ଦାବି କରିବା ପରେ କିରୋଡି ଲାଲ ମିଣା ଜୟପୁରର ଗଣପତି ପ୍ଲାଜାରେ ଥିବା ଏକ ଘରୋଇ କମ୍ପାନୀର ଅଫିସ୍‌ରେ ମଧ୍ୟ ପହଞ୍ଚିଥିଲେ। ସେ ଦାବି କରିଥିଲେ କି, ଲକର୍‌ଗୁଡ଼ିକ ଏଠାରେ ରହିଛି। ପୋଲିସ, ଆୟକର ବିଭାଗ ଏବଂ ଅନ୍ୟାନ୍ୟ ଏଜେନ୍ସିର ଅଧିକାରୀମାନେ ଏଥିରେ ହସ୍ତକ୍ଷେପ କରି ଲକର ଖୋଲିବାକୁ ସେ ଦାବି କରିଥିଲେ। କିଛି ସମୟ ପରେ ପୋଲିସ ସେଠାରେ ପହଞ୍ଚିଥିଲା।

ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ମିଣା କହିଥିଲେ, ଯେଉଁ ପରିସରରେ ଲକର୍‌ ରହିଛି, ତାହାର ମୁଖ୍ୟ ଫାଟକକୁ ପୋଲିସ ସିଲ୍ କରିଦେଇଛି। ସେ ଦାବି କରିଛନ୍ତି, ଆୟକର ବିଭାଗର ଏକ ଟିମ୍ ସେଠାରେ ପହଞ୍ଚିଥିଲା ଏବଂ ପରେ ପ୍ରବର୍ତ୍ତନ ନିର୍ଦ୍ଦେଶାଳୟର ଟିମ୍ ମଧ୍ୟ ମାମଲାର ତଦନ୍ତ ପାଇଁ ସେଠାରେ ପହଞ୍ଚିଥିଲା।