ପୁଣି ୩୦ ବିମାନକୁ ସୋମବାର ବିଳମ୍ବିତ ରାତିରେ ବୋମାରେ ଉଡ଼ାଇ ଦେବାକୁ ଧମକ ମିଳିଛି । ରିପୋର୍ଟ ମୁତାବକ, ଏଥିରେ ଇଣ୍ଡିଗୋ, ଭିସ୍ତାରା ଓ ଏୟାର ଇଣ୍ଡିଆର ଘରୋଇ ଏବଂ ଅନ୍ତର୍ଜାତୀୟ ବିମାନ ରହିଛି । ଗତ ୮ ଦିନରୁ ବର୍ତ୍ତମାନ ପର୍ଯ୍ୟନ୍ତ ୧୨୦ରୁ ଅଧିକ ବିମାନକୁ ବୋମା ଧମକ ମିଳି ସାରିଲାଣି ।
ଇଣ୍ଡିଗୋର ଜଣେ ଅଧିକାରୀ ମଙ୍ଗଳବାର କହିଛନ୍ତି ଯେ ସୋମବାର ଏୟାରଲାଇନର ୪ଟି ବିମାନକୁ ସୁରକ୍ଷା ସମ୍ବନ୍ଧୀୟ ଆଲର୍ଟ ମିଳିଥିଲା । ଏଥିରେ ମେଙ୍ଗାଲୁରୁରୁ ମୁମ୍ବାଇ ଆସୁଥିବା 6E164 ବିମାନ, ଅହମ୍ମଦାବାଦରୁ ଜେଦ୍ଦା ଯାଉଥିବା 6E75 ବିମାନ, ହାଇଦ୍ରାବାଦରୁ ଜେଦ୍ଦା ଯାଉଥିବା 6E67 ବିମାନ ଏବଂ ଲକ୍ଷ୍ନୌରୁ ପୁଣେ ଆସୁଥିବା 6E118 ବିମାନ ରହିଛି ।
ଏହିପରି ଭିସ୍ତାରା ଓ ଏୟାର ଇଣ୍ଡିଆର ପ୍ରବକ୍ତାମାନେ ମଧ୍ୟ ମଙ୍ଗଳବାର ଏହି ଖବରକୁ ନିଶ୍ଚିତ କରିଛନ୍ତି । ସେମାନେ କହିଛନ୍ତି ଯେ ସୋମବାର କିଛି ବିମାନକୁ ସୋସିଆଲ ମିଡିଆରେ ସୁରକ୍ଷା ସମ୍ବନ୍ଧୀୟ ଧମକ ମିଳିଥିଲା । ଆମେ ସମ୍ବନ୍ଧିତ ଅଧିକାରୀମାନଙ୍କୁ ଏ ବିଷୟରେ ଜଣାଇଛୁ ଏବଂ ସମସ୍ତ ପ୍ରୋଟୋକଲକୁ କଡ଼ାକଡ଼ି ଭାବେ ପାଳନ କରାଯାଉଛି । ଆମ ପାଇଁ ଆମ ଗ୍ରାହକ, ଚାଳକ ଦଳ ଏବଂ ବିମାନର ସୁରକ୍ଷା ସବୁଠାରୁ ଗୁରୁତ୍ୱପୂର୍ଣ୍ଣ ।
କହି ରଖୁଛୁ ଯେ ଗତକାଲି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁ କହିଛନ୍ତି ଯେ ଏୟାରଲାଇନ୍ କମ୍ପାନୀକୁ ହକ୍ସ ବା ମିଥ୍ୟା କଲ୍ କଲେ ଏବେ ଏହା ଅପରାଧ ଭାବରେ ବିବେଚିତ ହେବ । କେନ୍ଦ୍ର ମନ୍ତ୍ରୀ ସାମ୍ବାଦିକ ସମ୍ମିଳନୀ ସମୟରେ ଏହାକୁ ଅତି ସମ୍ବେଦନଶୀଳ ସ୍ଥିତି ବୋଲି ଦର୍ଶାଇଥିଲେ । ସେ କହିଥିଲେ, ଏଭଳି ମିଥ୍ୟା କଲ୍ କରୁଥିବା ବ୍ୟକ୍ତିଙ୍କୁ ବିମାନ କମ୍ପାନୀର ନୋ-ଫ୍ଲାଏ ଲିଷ୍ଟରେ ରଖାଯିବ ।