ବେଙ୍ଗାଲୁରୁ: ନିୟନ୍ତ୍ରଣ ହରାଇଲେ ବସ୍ ଡ୍ରାଇଭର, ରାସ୍ତାରେ ଅନେକ ଗାଡ଼ିକୁ ପଛପଟୁ ଦେଲେ ଧକ୍କା; ଏକାଧିକ ଆହତ
କର୍ଣ୍ଣାଟକର ବେଙ୍ଗାଲୁରୁରୁ ଏକ ଭୟଙ୍କର ସଡ଼କ ଦୁର୍ଘଟଣାର ଭିଡିଓ ସାମ୍ନାକୁ ଆସିଛି । ଏହି ଘଟଣା ହେବାଲ୍ ଫ୍ଲାଏଓଭରରେ ଘଟିଥିବା ସୂଚନା ରହିଛି । ଭାଇରାଲ ଭିଡିଓରେ ଦେଖିବାକୁ ମିଳୁଛି ଯେ ଟ୍ରାଫିକ୍ ଜାମ ହେତୁ ଅନେକ ଗାଡ଼ି ପଛକୁ ପଛ ରାସ୍ତାରେ ଠିଆ ହୋଇଛନ୍ତି । ଏହି ସମୟରେ ଏକ ଭୋଲ୍ଭୋ ବସ୍ ଆସି ସେଠାରେ ଅଟକୁଛି । କିନ୍ତୁ ଯେତେବେଳେ ଗାଡ଼ିମୋଟର ଚାଲିବା ଆରମ୍ଭ କରୁଛି, ସେତିକି ବେଳେ ବସ୍ ଡ୍ରାଇଭର ନିୟନ୍ତ୍ରଣ ହରାଇ ବସୁଛନ୍ତି ।
ବସ୍ଟି ପଛପଟୁ ଧକ୍କା ଦେବା ଫଳରେ ଅନେକ ଗାଡ଼ି କ୍ଷତିଗ୍ରସ୍ତ ହୋଇଛି । ଏହି ଦୁର୍ଘଟଣାରେ କିଛି ଲୋକ ଆହତ ମଧ୍ୟ ହୋଇଛନ୍ତି । ସୌଭାଗ୍ୟବଶତଃ, ବସ୍ର ଗତି ଅଧିକ ନ ଥିଲା, ଯେଉଁଥିପାଇଁ ଏକ ବଡ଼ ଦୁର୍ଘଟଣା ଟଳିଯାଇଥିଲା ।
ବସ୍ ଡ୍ରାଇଭର ଜଣକ ରାସ୍ତାରେ ଠିଆ ହୋଇଥିବା ଅନେକ ବାଇକ୍ ଏବଂ କାର୍କୁ ଧକ୍କା ଦେଇଥିଲେ । ସୂଚନା ମୁତାବକ, ଦୁର୍ଘଟଣାରେ ୩ଟି ବାଇକ୍ ଏବଂ ୨ଟି କାର୍ କ୍ଷତିଗ୍ରସ୍ତ ହୋଇଛି । ଜଣେ ବାଇକ୍ ଆରୋହୀଙ୍କୁ ଆହତ ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି ।
କୁହାଯାଉଛି ଯେ ଭୋଲ୍ଭୋ ବସ୍ ବିମାନବନ୍ଦରରୁ HSR ଲେଆଉଟ୍ ଆଡକୁ ଯାଉଥିଲା । ବସ୍ ଭିତରେ ଲାଗିଥିବା ସିସିଟିଭିରେ ଏହି ଘଟଣା କଏଦ ହୋଇଛି । ଘଟଣାର ତଦନ୍ତ ଚାଲିଥିବା ଟ୍ରାଫିକ ପୋଲିସ କହିଛି ।
