ମେ ଓ ଜୁନ ମାସରେ ସମସ୍ତ ଗରିବଲୋକଙ୍କୁ ମାଗଣାରେ ମିଳିବ ରାସନ

କେନ୍ୟୁଜ୍(ବ୍ୟୁରୋ):  କୋଭିଡ୍‌ ପାଇଁ କେନ୍ଦ୍ର ସରକାର ମେ ଓ ଜୁନ ମାସରେ ଦେଶର ସମସ୍ତ ଗରିବଲୋକଙ୍କୁ ମାଗଣାରେ ରାସନ ଯୋଗାଇ ଦେବେ ।ଏହା ଦ୍ୱାରା ପ୍ରାୟ ୮୦କୋଟି ଲୋକ ଲାଭବାନ ହେବେ । ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ମାଧ୍ୟମରେ କେନ୍ଦ୍ର ସରକାରଙ୍କ ପକ୍ଷରୁ ଏହି ଖାଦ୍ୟଶସ୍ୟ ଯୋଗାଇ ଦିଆଯିବ।

ଯୋଜନା ଅନୁଯାୟୀ, ହିତାଧିକାରୀଙ୍କୁ କେନ୍ଦ୍ର ୫ କିଲୋଗ୍ରାମ ମାଗଣା ଖାଦ୍ୟଶସ୍ୟ ଯୋଗାଣ କରିବ। ଏଥିପାଇଁ ୨୬,୦୦୦ କୋଟିରୁ ଅଧିକ ଟଙ୍କା ଖର୍ଚ୍ଚ ହେବ ବୋଲି କେନ୍ଦ୍ର ସରକାର କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ଯେଉଁ ସମୟରେ ଦେଶ କୋଭିଡ-୧୯ର ଦ୍ୱିତୀୟ ଲହରର ସମ୍ମୁଖୀନ ହେଉଛି ସେହି ସମୟରେ ଗରିବଙ୍କ ପାଇଁ ପୁଷ୍ଟିକର ଖାଦ୍ୟର ସହାୟତା ଜରୁରୀ।

ଦେଶରେ ବଢ଼ୁଛି କରୋନା ବିପର୍ଯ୍ୟାୟ । ଲଗାତର ଦ୍ୱିତୀୟ ଦିନରେ ୩ ଲକ୍ଷ ଉପରେ ଦୈନିକ ସଂକ୍ରମଣ । ଗତକାଲିର ରେକର୍ଡ ଆଜି ପୁଣି ଭାଙ୍ଗିଛି। ୨୪ ଘଣ୍ଟାରେ ୩ ଲକ୍ଷ ୩୨ ହଜାର ନୂଆ ସଂକ୍ରମିତ । ସଂକ୍ରମଣ ବଢ଼ିବା ସହ ଦେଶରେ ସ୍ୱାସ୍ଥ୍ୟ ଭିତ୍ତିଭୂମି ଭୁଶୁଡ଼ିବାରେ ଲାଗିଛି । କେଉଁଠି ଆଇସିୟୁ ନାହିଁ ତ କେଉଁଠି ବେଡ୍‌ ନାହିଁ । ଦିଲ୍ଲୀରେ ଅକ୍ସଜେନ୍‌ ସଂକଟ ଭୟଂକର ରୂପ ନେଉଛି । କେଉଁ ହସ୍ପିଟାଲରେ ୨ ଘଣ୍ଟା ତ କେଉଁ ହସ୍ପିଟାଲରେ ୪ ଘଣ୍ଟା ପାଇଁ ଅକ୍ସିଜେନ୍‌ ମହଜୁଦ ଅଛି। ତା ପରେ କଣ ହେବ ଡାକ୍ତର କିଛି ଭାବି ପାରୁ ନାହାନ୍ତି।

ସର୍ବାଧିକ ସଂକ୍ରମିତ ୧୧ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ । ଫୋକସ୍‌ ଥିଲା ଅକ୍ସିଜେନ୍‌ ସଂକଟର ମୁକାବିଲା। ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା ପରେ ଅକ୍ସିଜେନ ଉତ୍ପାଦନକାରୀ କମ୍ପାନୀମାନଙ୍କ ସହ ଆଲୋଚନା କରିଥିଲେ ପ୍ରଧାନମନ୍ତ୍ରୀ।