କ୍ରିକେଟର ରବିନ୍ଦ୍ର ଜାଡେଜା ବିଜେପିରେ ମିଶିଲେ, ଗୁଜରାଟରେ ଆରମ୍ଭ କରିବେ ରାଜନୈତିକ କ୍ୟାରିୟର
ଭାରତୀୟ କ୍ରିକେଟର ରବିନ୍ଦ୍ର ଜାଡେଜା ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି । ବିଜେପି ବିଧାୟକ ତଥା ରବିନ୍ଦ୍ର ଜାଡେଜାଙ୍କ ପତ୍ନୀ ରିଭାବା ଜାଡେଜା ତାଙ୍କ ସୋସିଆଲ ମିଡିଆ ହ୍ୟାଣ୍ଡେଲରେ ନୂଆ ସଦସ୍ୟ ଭାବରେ ସ୍ୱାମୀଙ୍କ ଫଟୋ ପୋଷ୍ଟ କରି ଏହି ସୂଚନା ଦେଇଛନ୍ତି ।
ରିଭାବା ତାଙ୍କ ‘ଏକ୍ସ’ ହ୍ୟାଣ୍ଡେଲ ପୋଷ୍ଟରେ ବିଜେପି ସଦସ୍ୟତା କାର୍ଡ ସହିତ ନିଜର ଏବଂ ସ୍ୱାମୀଙ୍କର ଫଟୋ ସେୟାର କରିଛନ୍ତି । କହି ରଖୁଛୁ ଯେ ଗତ ଜୁନ୍ ମାସରେ ଦକ୍ଷିଣ ଆଫ୍ରିକା ବିପକ୍ଷରେ ଭାରତ ଐତିହାସିକ ଟି-୨୦ ବିଶ୍ୱକପ୍ ଜିତିବା ପରେ ୩୫ ବର୍ଷୀୟ ଜାଡେଜା ଟି-୨୦ରୁ ଅବସର ଘୋଷଣା କରିଥିଲେ ।
ରିଭାବା ପୂର୍ବରୁ ହିଁ ବିଜେପିରେ ଅଛନ୍ତି । ସେ ଗୁଜରାଟର ଜାମନଗର ଉତ୍ତର ଆସନରୁ ବିଜେପିର ବିଧାୟକ । ଏବେ ରବିନ୍ଦ୍ର ଜାଡେଜା ରାଜନୀତିରେ ନିଜର ନୂଆ ଇନିଂସ ଆରମ୍ଭ କରିବାକୁ ଯାଉଛନ୍ତି । ତେବେ ବିଜେପିରେ ତାଙ୍କର ଭୂମିକା କ’ଣ ରହିବ, ତାହା ଦଳ ଏ ପର୍ଯ୍ୟନ୍ତ ସ୍ପଷ୍ଟ କରିନାହିଁ ।
ରିଭାବା ୨୦୧୯ରେ ବିଜେପିରେ ଯୋଗ ଦେଇଥିଲେ । ୨୦୨୨ରେ ଦଳ ତାଙ୍କୁ ଜାମନଗର ବିଧାନସଭା ଆସନରୁ ମୈଦାନକୁ ଆଣିଥିଲା । ଏଠାରେ ଆପ୍ ପ୍ରାର୍ଥୀଙ୍କୁ ପରାସ୍ତ କରି ସେ ଏହି ଆସନ ଜିତିଥିଲେ । ପତ୍ନୀଙ୍କ ନିର୍ବାଚନ ପ୍ରଚାରରେ ଜାଡେଜାଙ୍କୁ ମଧ୍ୟ ଦେଖିବାକୁ ମିଳିଥିଲା । ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପି ଅଧ୍ୟକ୍ଷ ଜେପି ନଡ୍ଡା ସଦସ୍ୟତା ଅଭିଯାନ ଆରମ୍ଭ କରିଥିଲେ ।
