ପ୍ରତିଥର ଫଟୋରେ ଜଳୁଥିଲା ପୁଅର ଆଖି, ଫ୍ଲାଶଲାଇଟ ପାଇଁ ଏପରି ହେଉଛି ଭାବି ଛାଡିଦେଉଥିଲେ ମା କିନ୍ତୁ ଡାକ୍ତରଙ୍କୁ ଦେଖାଇବା ପରେ ଜଣାପଡିଲା ଭୟଙ୍କର ରୋଗ

ଆମେରିକାର ଟେକ୍ସାସ ଘଟିଛି ଏକ ଅତି ଆଶ୍ଚର୍ଯ୍ୟକର ଘଟଣା। ଯେଉଁଠି ଫଟୋ ଉଠାଇବା ସମୟରେ ଜଣେ ମା ନିଜ ପିଲାର ଏକ ଭୟଙ୍କର ରୋଗ ବିଷୟରେ ଜାଣି ପାରିଛନ୍ତି । ସୂଚନା ଅନୁଯାୟୀ ଏହି ପିଲାର ମା ଏକ ନୂଆ ମୋବାଇଲ କିଣିଥିଲେ ଯେଉଁଥିରେ ସେ ନିଜ ପୁଅର ଫଟୋ ଉଠାଉଥିଲେ । ତେବେ ଏହି ଫଟୋ ଗୁଡିକ ମାଧ୍ୟମରେ ସେ ନିଜ ପୁଅକୁ ହୋଇଥିବା ଏକ ଭୟଙ୍କର ରୋଗ ବିଷୟରେ ଜାଣି ପାରିଥିଲେ ।

ଫଟୋ ଉଠାଇସାରିବା ପରେ ମହିଳା ଜଣକ ଏହି ଫଟୋଗୁଡିକୁ ନିଜ ଭଉଣୀଙ୍କୁ ମଧ୍ୟ ଦେଖାଇଥିଲେ । ଯେଉଁ ଫଟୋରେ ସେହି ପିଲାର ଡାହାଣ ଆଖିଟି ଅବିକଳ ଏକ ପଶୁର ଆଖି ପରି ଚମକୁଥିଲା । ତାଙ୍କୁ ଲାଗୁଥିଲା ଯେ ମୋବାଇଲରେ ଥିବା ଫ୍ଲାଶ କାରଣରୁ ଏପରି ହେଉଛି କିନ୍ତୁ ବେଳେବେଳେ ତାଙ୍କୁ ଏକ ଅଜଣା ଭୟ ଆସୁଥିଲା । ଏହାପରେ ସେ ଜଣେ ଡାକ୍ତରଙ୍କ ସହ ଏହି ବିଷୟରେ କଥା ହୋଇଥିଲେ ଯାହାପରେ ଜଣାପଡିଥିଲା ପିଲାଟିର ଆଖି ଚମକୁଥିବାର ପ୍ରକୃତ କାରଣ । ମହିଳା ନିଜ ପୁଅକୁ ଡାକ୍ତରଙ୍କ ନିକଟକୁ ନେଇ ଯାଇଥିଲେ ଏବଂ ପରୀକ୍ଷା ପରେ ଜଣାପଡିଥିଲା ଯେ ପିଲାଟିର ଆଖି ଫ୍ଲାସ ଯୋଗୁଁ ନୁହେଁ ବରଂ କ୍ୟାନ୍ସର କାରଣରୁ ଚମକୁଛି । ଡାକ୍ତରଙ୍କ କହିବା ଅନୁଯାୟୀ ପିଲାଟିକୁ retinoblastoma ନାମକ ଏକ ଆଖି କ୍ୟାନସର ହୋଇଛି ଯେଉଁ କାରଣରୁ ଏପରି ହୋଇଛି ।

ଏହାସହିତ ଡାକ୍ତର କହିଥିଲେ ଯେ ଭଲହେଲା ସମୟ ପୂର୍ବରୁ ଏହା ଜଣା ପଡିଗଲା କାରଣ ଏହା କ୍ୟାନ୍ସରର ଫାଷ୍ଟ ଷ୍ଟେଜ ଥିଲା । ଆଉଟିକେ ବିଳମ୍ବ ହୋଇଥିଲେ ପିଲାଟିର ଆଖି ନଷ୍ଟ ହୋଇଯିବାର ସମ୍ଭାବନା ରହିଥିଲା ଏବଂ ଚିକିତ୍ସା ସମୟରେ ମଧ୍ୟ କିଛି ବି ଘଟିପାରେ । ଏହାପରେ ପିଲାଟିର ଚିକିତ୍ସା ଆରଂଭ ହୋଇଥିଲା । ଆମେରିକାନ କ୍ୟାନ୍ସର ସୋସାଇଟିର ରିପୋର୍ଟ ଅନୁଯାୟୀ retinoblastoma ନାମକ ଏହି କ୍ୟାନସରକୁ ଅତି ସହଜରେ ଡିଟେକ୍ଟ କରାଯାଇପାରେ । ସାଧାରଣତଃ ଫ୍ଲାଶଲାଇଟରେ ଏହାକୁ ଅତି ସହଜରେ ଡିଟେକ୍ଟ କରାଯାଇପାରେ ।