‘୧୦୦ରୁ ନେଇ ୧୦୦୦ ଟଙ୍କା ଦେଇପାରିବେ ଚାନ୍ଦା…୪୦ ଲକ୍ଷ ଦରକାର’, ନିର୍ବାଚନ ଲଢ଼ିବା ପାଇଁ ଲୋକଙ୍କୁ ନିବେଦନ କଲେ ସିଏମ୍ ଅତିଶୀ
ଦିଲ୍ଲୀ ମୁଖ୍ୟମନ୍ତ୍ରୀ ଅତିଶୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା ପାଇଁ ଲୋକଙ୍କୁ ସହାୟତା ଲାଗି ନିବେଦନ କରିଛନ୍ତି । ସେ କହିଛନ୍ତି ଯେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଆମକୁ କ୍ରାଉଡ୍ ଫଣ୍ଡିଂର ଆବଶ୍ୟକତା ରହିଛି । ନିର୍ବାଚନ ଲଢ଼ିବା ପାଇଁ ମୋତେ ୪୦ ଲକ୍ଷ ଟଙ୍କା ଦରକାର ।
ଲୋକମାନେ ୧୦୦ରୁ ନେଇ ୧୦୦୦ ଟଙ୍କା ପର୍ଯ୍ୟନ୍ତ ଆମକୁ ସାହାଯ୍ୟ କରିପାରିବେ । ଏହା ଆମକୁ ନିର୍ବାଚନ ଲଢ଼ିବାରେ ସାହାଯ୍ୟ କରିବ ବୋଲି ସେ କହିଛନ୍ତି ।
ଅତିଶୀ ଲୋକମାନଙ୍କୁ ନିବେଦନ କରି କହିଛନ୍ତି ଯେ ଦିଲ୍ଲୀର ଲୋକମାନେ ଆପକୁ ସମର୍ଥନ କରିଛନ୍ତି । ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଆମକୁ ଚାନ୍ଦା ଦେଇଛନ୍ତି । ଲୋକଙ୍କ ଛୋଟ ଛୋଟ ସହଯୋଗରୁ ନିର୍ବାଚନ ଲଢ଼ିବାରେ ଏବଂ ଜିତିବାରେ ଆମକୁ ସାହାଯ୍ୟ ମିଳିଛି ।
ଦିଲ୍ଲୀର ଗରିବ ଲୋକମାନେ ଆମକୁ ୧୦ରୁ ୧୦୦ ଟଙ୍କା ପର୍ଯ୍ୟନ୍ତ ସବୁଠୁ ସ୍ୱଳ୍ପ ରାଶି ଦ୍ୱାରା ସମର୍ଥନ ଦେଇଛନ୍ତି । ସମଗ୍ର ଦେଶର ଲୋକମାନେ ଆମକୁ ଦାନ ଦେଇଛନ୍ତି । ମୁଁ ନିର୍ବାଚନ ଲଢ଼ିବା ପାଇଁ ପର୍ଯ୍ୟାପ୍ତ ଫଣ୍ଡିଂ ଚାହୁଁଛି ବୋଲି ଅତିଶୀ କହିଛନ୍ତି ।
କହି ରଖୁଛୁ, ୭୦ ବିଧାନସଭା ଆସନ ପାଇଁ ଗୋଟିଏ ପର୍ଯ୍ୟାୟରେ ଫେବୃୟାରୀ ୫ରେ ଭୋଟ୍ ଅନୁଷ୍ଠିତ ହେବ ଏବଂ ୮ରେ ଫଳାଫଳ ଘୋଷଣା କରାଯିବ ।
ଦିଲ୍ଲୀରେ ତ୍ରିମୁଖୀ ଲଢ଼େଇ ହେବ । ଏଥିପାଇଁ ଆପ୍ ପ୍ରସ୍ତୁତି କରିସାରିଛି । ତୃତୀୟ ଥର କ୍ଷମତା ହାତେଇବାକୁ ଚେଷ୍ଟା କରିବ ଆପ୍ । ରାଜଧାନୀ ଦିଲ୍ଲୀରେ ୧ କୋଟି ୫୫ ଲକ୍ଷରୁ ଅଧିକ ଭୋଟର ଅଛନ୍ତି ।
ଏଥର ଦିଲ୍ଲୀର ସରକାର ବାଛିବେ ୧.୫୫ କୋଟି ଭୋଟର । ନିର୍ବାଚନ ଆୟୋଗ (EC) ଚୂଡ଼ାନ୍ତ ଭୋଟର ତାଲିକା ପ୍ରକାଶ କରିସାରିଛନ୍ତି । ଆୟୋଗଙ୍କ ମୁତାବକ, ଏଥର ନିର୍ବାଚନରେ ମୋଟ ୧.୫୫ କୋଟିରୁ ଅଧିକ ଭୋଟର ରହିବେ । ସେମାନଙ୍କ ମଧ୍ୟରୁ ପୁରୁଷ ଭୋଟରଙ୍କ ସଂଖ୍ୟା ୮୩,୪୯,୬୪୫ ଥିବା ବେଳେ ମହିଳା ଭୋଟରଙ୍କ ସଂଖ୍ୟା ରହିଛି ୭୧,୭୩,୯୫୨ । ଏହିପରି ତୃତୀୟ ଲିଙ୍ଗଙ୍କ ସଂଖ୍ୟା ୧,୨୬୧ ରହିଛି ।