କୋଲକତା ଛାତ୍ରୀଙ୍କୁ ଦୁଷ୍କର୍ମ ଓ ହତ୍ଯା ଘଟଣା, ବ୍ୟାରିକେଡ୍ ଭାଙ୍ଗି ହସ୍ପିଟାଲ ଭିତରକୁ ଧସେଇ ପଶିଥିଲେ ଶତାଧିକ ଲୋକ
ନୂଆଦିଲ୍ଲୀ : କୋଲକାତା ଆରଜି କର ହସ୍ପିଟାଲରେ ରାତି ଅଧରେ ବ୍ୟାପକ ଭଙ୍ଗାରୁଜା । ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ପ୍ରତିବାଦରେ ଚାଲଥିବା ଆନ୍ଦୋଳନ ହଠାତ ରାତି ଅଧରେ ହିଂସାର ରୂପ ନେଇଥିଲା । ରାତି ପ୍ରାୟ ୧୨ଟା ୪୦ ମିନିଟ ସମୟରେ ପୋଲିସ ବ୍ୟାରିକେଡ୍ ଭାଙ୍ଗି ହସ୍ପିଟାଲ ଭିତରକୁ ଧସେଇ ପଶିଥିଲେ ଶତାଧିକ ଅଜ୍ଞାତ ଲୋକ । ଆରମ୍ଭ କରିଥିଲେ ଭଙ୍ଗା ରୁଜା ଓ ଫିଙ୍ଗା ଫୋପଡ଼ା । ଇମର୍ଜେନ୍ସୀ ୱାର୍ଡକୁ ବି ଛାଡ଼ି ନଥିଲେ ଆକ୍ରମଣକାରୀ । ହସ୍ପିଟାଲର ଅନେକ କିଛି ଭାଙ୍ଗି ଦେଇଛନ୍ତି । ସୋସିଆଲ ମିଡିଆରେ Reclaim the night ନାମରେ ଆରମ୍ଭ ହୋଇଥିବା କ୍ୟାମ୍ପେନ ଏହି ହିଂସା ପଛର କାରଣ ବୋଲି କୁହାଯାଉଛି । ରାତି ପ୍ରାୟ ୧୧ଟା ୫୫ ମିନିଟ ସମୟରେ ସୋସିଆଲ ମିଡିଆ ବିକ୍ଷୋଭକୁ ଇନ୍ଧନ ଦେଇଥିଲା । ରାତି ୧୨ଟା ୪୦ରେ ହସ୍ପିଟାଲରେ ପଶିଥିଲେ ଶତାଧିକ ଉତ୍ତ୍ୟକ୍ତ ଲୋକ ।
ହସ୍ପିଟାଲରେ ବ୍ୟାପକ ଭଙ୍ଗାରୁଜା କରିଥିଲେ । ଭଙ୍ଗାରୁଜା ବେଳେ ପୋଲିସ ସହ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଟିୟର ଗ୍ୟାସ୍ ଓ ଲାଠି ମାଡ଼ କରିଥିଲା ପୋଲିସ । ପାଲଟା ଆକ୍ରମଣ କରିଥିଲେ ବିକ୍ଷୋଭକାରୀ । ଅନେକ ପୋଲିସ କର୍ମଚାରୀ ଆହତ ହୋଇଥିବା ବେଳେ ଏକାଧିକ ପୋଲିସ ଗାଡ଼ିକୁ ଭାଙ୍ଗି ଦେଇଛନ୍ତି ହିଂସ୍ର ବିକ୍ଷୋଭକାରୀ । କୋଲକାତା ପୋଲିସ କମିଶନର ଭିନିତ ଗୋୟଲ ରାତି ପ୍ରାୟ ୧ଟା ୨୦ ମିନିଟରେ ପହଞ୍ଚିଥିଲେ ଆରଜି କର ହସ୍ପିଟାଲରେ ପହଞ୍ଚିଥିଲେ। ଗୁଜବ ସୃଷ୍ଟି ନକରିବାକୁ ସେ ସେ ନିବେଦନ କରିଛନ୍ତି । ପ୍ରତିଟି ଅଭିଯୋଗର ଯାଞ୍ଚ ହେଉଛି। ସମସ୍ତଙ୍କୁ ଜଜ ଜଣ କରି ପଚରାଯାଉଛି ବୋଲି କହିଛନ୍ତି ପୋଲିସ କମିଶନର । ଅଗଷ୍ଟ ୯ରେ ଆରଜି କର ହସ୍ପିଟାଲରେ ଜଣେ ମହିଳା ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିଲା । ଏହାର ପ୍ରତିବାଦରେ ସାରା ଦେଶରେ ଆନ୍ଦୋଳନ ଚାଲିଛି । ଯେଉଁମାନେ ଭଙ୍ଗାରୁଜା କରିଛନ୍ତି ସେମାନେ ଆନ୍ଦୋଳନକାରୀ ଡାକ୍ତର ନୁହନ୍ତି । ନ୍ୟାୟ ଦାବିରେ ଆନ୍ଦୋଳନ ଜାରି ରଖିଛନ୍ତି ଡାକ୍ତର। ଅନ୍ୟପଟେ ଏହି ହିଂସା ପଛରେ ଟିଏମସିର ହାତ ଅଛି ବୋଲି ବିଜେପି ଅଭିଯୋଗ କରିଛି ।
ସେହିପରି ଏହି ଆନ୍ଦୋଳନ ଜାରି ରହିବ ବୋଲି କହିଛନ୍ତି ମହାରାଷ୍ଟ୍ର ଆବାସିକ ଡାକ୍ତର ସଂଘ, ତେଲଙ୍ଗାନା ଓ ଆନ୍ଧ୍ରପ୍ରଦେଶ ଜୁନିଅର ଡାକ୍ତର ସଂଘ, ପାଟନା, ଭବୁନେଶ୍ବର, ଋଷିକେଶ, ମଙ୍ଗଳଗିରି ଏମସ ଡାକ୍ତର ସଂଘ, ବେଙ୍ଗାଲୁରୁ ନିମହାନ୍ସ, ପିଜିଆଇ ଚଣ୍ଡୀଗଡ଼, କେଜିଏମୟୁ ଲକ୍ଷ୍ମୌ ଆଦି ଡାକ୍ତର ସଂଘ ପକ୍ଷରୁ ଆନ୍ଦୋଳନ ଚାଲିବ ବୋଲି ଘୋଷଣା କରାଯାଇଛି।
