ହରିୟାଣା କଂଗ୍ରେସର ପୂର୍ବତନ ବିଧାୟକ ଧର୍ମ ସିଂହ ଛୋକ୍କରଙ୍କୁ ଗିରଫ କରିଛି ଇଡି । ପ୍ରବର୍ତ୍ତନ ନିର୍ଦ୍ଦେଶାଳୟ ଛୋକ୍କରଙ୍କୁ ଦିଲ୍ଲୀରୁ ଗିରଫ କରିଛି । ପୂର୍ବତନ ବିଧାୟକ ଏବଂ ତାଙ୍କ କମ୍ପାନୀ ଦୀନଦୟାଲ ଆବାସ ଯୋଜନା ଅଧୀନରେ ପ୍ରାୟ ୧୫୦୦ କୋଟି ଟଙ୍କାର ମନି ଲଣ୍ଡରିଂ କରିଥିବା ଅଭିଯୋଗ ହୋଇଛି ।
ଧର୍ମ ସିଂହ ଛୋକ୍କର ହରିୟାଣାର ସମଲଖା ବିଧାନସଭା ନିର୍ବାଚନମଣ୍ଡଳୀର କଂଗ୍ରେସ ବିଧାୟକ ରହିଥିଲେ । ତାଙ୍କ ବିରୋଧରେ ପୂର୍ବରୁ ମଧ୍ୟ ଜମି ଦୁର୍ନୀତି ଅଭିଯୋଗ ଆସିଥିଲା । ପୂର୍ବରୁ ମଧ୍ୟ, ଛୋକ୍କର ଏବଂ ତାଙ୍କ ପରିବାରଙ୍କ ଘରେ ଚଢାଉ କରାଯାଇଥିଲା । ବିପୁଳ ପରିମାଣର ଡକ୍ୟୁମେଣ୍ଟ ଓ ସନ୍ଦେହଜନକ କାରବାରର ପ୍ରମାଣ ମଧ୍ୟ ମିଳିଥିଲା ।
ଗିରଫ ପରେ ଧର୍ମ ସିଂହ ଛୋକ୍କରଙ୍କୁ କୋର୍ଟରେ ହାଜର କରାଯିବ ଯେଉଁଠାରେ ଇଡି ତାଙ୍କୁ ରିମାଣ୍ଡରେ ନେବାକୁ ଆବେଦନ କରିପାରେ । ଯାହାଫଳରେ ପଚରାଉଚରା ମାଧ୍ୟମରେ ସମଗ୍ର ନେଟୱାର୍କ ଏବଂ ଅନ୍ୟାନ୍ୟ ସହଯୋଗୀମାନଙ୍କ ବିଷୟରେ ସୂଚନା ସଂଗ୍ରହ କରାଯାଇପାରିବ।
ଧର୍ମ ସିଂହଙ୍କୁ ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂହ ହୁଡାଙ୍କ ନିକଟତର । ତାଙ୍କ କମ୍ପାନୀ ସାଇ ଆଇନା ଫାର୍ମସ୍ ଉପରେ ଗୁରୁଗ୍ରାମରେ ଘର ଦେବା ବଦଳରେ ଲୋକଙ୍କଠାରୁ କୋଟି କୋଟି ଟଙ୍କା ନେଇଥିବା ଅଭିଯୋଗ ହୋଇଛି । କିନ୍ତୁ ପରେ ସେ ଲୋକମାନଙ୍କୁ ଘର ଦେଇନଥିଲେ କିମ୍ବା ଟଙ୍କା ଫେରାଇ ନଥିଲେ । ତାଙ୍କ ନାମରେ ୪୦୦ କୋଟି ଟଙ୍କାର ର୍ଦୁନୀତି ଅଭିଯୋଗ ହୋଇଛି । ଧର୍ମ ସିଂ ଏବଂ ତାଙ୍କ ପୁଅ ନାମରେ ମନି ଲଣ୍ଡ୍ରିଂ ମାମଲା ରହିଛି ।
ଧରମ ସିଂହଙ୍କ ପୁଅ ସିକନ୍ଦର ଚୌକର ମଧ୍ୟ ୪୦୦ କୋଟି ଟଙ୍କାର ଘୋଟାଲାରେ ଜଣେ ଅଭିଯୁକ୍ତ। ଇଡି ତାଙ୍କ ବିରୋଧରେ ଏକ ମାମଲା ମଧ୍ୟ ରୁଜୁ କରିଛି। ଧର୍ମ ସିଂହ ଛୋକ୍କର ଏବଂ ତାଙ୍କ ପୁଅ ସିକନ୍ଦର ସିଂହଙ୍କ ବିରୋଧରେ ୧୫୦୦ ରୁ ଅଧିକ ଘର କ୍ରେତାଙ୍କୁ ଠକିବାର ଅଭିଯୋଗ ରହିଛି। ଇଡି ଉଭୟଙ୍କ ବିରୋଧରେ ମନି ଲଣ୍ଡରିଂ ମାମଲା ରୁଜୁ କରିଛି।
Also Read : ୟୁପିରେ ଭୟଙ୍କର ଅଗ୍ନିକାଣ୍ଡ, ଗୋଟିଏ ପରିବାରର ୫ ଜଣ ଜୀବନ୍ତ ଦଗ୍ଧ