ଚାଲିଥିଲା ବିଜୟ ଉତ୍ସବ, ଅବିର ପଡୁ ପଡୁ ଲାଗିଲା ଭୟଙ୍କର ନିଆଁ, ନବନିର୍ବାଚିତ ପ୍ରାର୍ଥୀଙ୍କ ସହ ଅନେକ ମହିଳା ଆହତ
ମହାରାଷ୍ଟ୍ର ବିଧାନସଭା ନିର୍ବାଚନର ଫଳାଫଳ ଆସିସାରିଛି । ଗତକାଲି ଫଳାଫଳ ଘୋଷଣା ପରେ ରାଜ୍ୟର ବିଭିନ୍ନ ନିର୍ବାଚନ ମଣ୍ଡଳୀରେ ଉତ୍ସବର ମାହୋଲ ଥିବା ବେଳେ କୋହ୍ଲାପୁରରୁ ଆସିଛି ଏକ ଆଶ୍ଚର୍ଯ୍ୟଜନକ ମାମଲା । ଚାନ୍ଦଗଡ଼ ନିର୍ବାଚନ ମଣ୍ଡଳୀରେ ନବନିର୍ବାଚିତ ପ୍ରାର୍ଥୀଙ୍କ ବିଜୟ ଉତ୍ସବ ବେଳେ ଘଟିଛି ଏକ ଭୟଙ୍କର ଅଗ୍ନିକାଣ୍ଡ, ଯେଉଁଥିରେ ବିଧାୟକ ପ୍ରାର୍ଥୀଙ୍କ ସହ କିଛି ମହିଳା ମଧ୍ୟ ଆହତ ହୋଇଛନ୍ତି ।
ଏହି ଆସନରୁ ସ୍ୱାଧୀନ ପ୍ରାର୍ଥୀ ଭାବରେ ବିଜୟ ଲାଭ କରିଛନ୍ତି ଶିବାଜୀ ପାଟିଲ । ରାତିରେ ତାଙ୍କ ବିଜୟ ଉତ୍ସବ ପାଳନ କରାଯାଉଥିବା ବେଳେ ହଠାତ୍ ନିଆଁ ଲାଗିଯାଇଥିଲା । ଏଥିରେ ଶିବାଜୀ ପାଟିଲ ଆହତ ହୋଇଛନ୍ତି । ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ବିଜୟ ଶୋଭାଯାତ୍ରାରେ ସାମିଲ କିଛି ମହିଳା ମଧ୍ୟ ଆହତ ହୋଇଛନ୍ତି ।
ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଚାନ୍ଦଗଡ଼ ତହସିଲ ମହାଗାଓଁରେ କିଛି ମହିଳା ଶିବାଜୀ ପାଟିଲଙ୍କୁ ବନ୍ଦାପନା କରୁଥିବା ବେଳେ ହଠାତ୍ ଏହି ଅଘଟଣ ଘଟିଥିଲା । ଏହି ସମୟରେ କ୍ରେନରୁ ବହୁ ପରିମାଣର ଅବିର ସେମାନଙ୍କ ଉପରେ ଢଳାଯାଇଥିଲା । ଅବିରଗୁଡ଼ିକ ଆଳତି ଉପରେ ପଡ଼ିବା କ୍ଷଣି ଭୟଙ୍କର ଭାବରେ ନିଆଁ ଲାଗିଥିଲା । ଅବିରରେ ରାସାୟନିକ ମିଶ୍ରିତ ହେତୁ ନିଆଁ ଚାରିଆଡ଼େ ବ୍ୟାପି ଯାଇଥିଲା ।
ଏଥିରେ ଶିବାଜୀ ପାଟିଲ ସାମାନ୍ୟ ଆହତ ହୋଇଥିବା ସୂଚନା ରହିଛି । ଭିଡିଓରେ ଦେଖାଯାଉଛି ଯେ ବିଜୟ ଉତ୍ସବ ପାଳନ ବେଳେ କ୍ରେନରୁ ଅବିର ପକାଯାଉଥିବା ସମୟରେ ହଠାତ୍ ନିଆଁ ଲାଗୁଛି । ନିଆଁ ଚାରିଆଡ଼େ ବ୍ୟାପିଯିବାରୁ ଲୋକମାନେ ଜୀବନ ବିକଳରେ ଏଣେତେଣେ ଦୌଡ଼ୁଛନ୍ତି ।