ଅମୃତସରରୁ ହାୱଡା ଯାଉଥିବା ଟ୍ରେନରେ ବିସ୍ଫୋରଣ, ପ୍ରାଣ ବିକଳରେ ଡେଇଁଲେ ଲୋକ, ୪ ଆହତ

ଅମୃତସରରୁ ହାୱଡା ଯାଉଥିବା ଟ୍ରେନରେ ବିସ୍ଫୋରଣ । ବିସ୍ଫୋରଣ ଶବ୍ଦ ଶୁଣି ଯାତ୍ରୀ ପ୍ରାଣ ବିକଳରେ ଧାଆଁ ଦୌଡ ବେଳେ ୪ ଜଣ ଆହତ ହୋଇଛନ୍ତି । ଆହତଙ୍କୁ ଫତେହଗଡର ସାହିବର ସିଭିଲ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଏହା କୌଣସି ବୋମା ବିସ୍ଫୋରଣ ନ ଥିଲା । ଫତେହଗଡ ସାହିବର ସରହିନ୍ଦ ଷ୍ଟେସନ ନିକଟରେ ଅମୃତସର ହାୱଡା ଟ୍ରେନର ଏକ ଡବାରେ ଥିବା ବାଣ ବିସ୍ଫୋରଣ ହୋଇଥିଲା ।

ସୂଚନା ମୁତାବକ, ଟ୍ରେନ ବ୍ରାହାଣମାଜରା ରେଳ ପୋଲ ନିକଟରେ ପହଞ୍ଚିବା ବେଳକୁ ଗୋଟିଏ ବଗିରେ ବିସ୍ଫୋରଣ ହୋଇଥିଲା । ଫଳରେ ବଗି ଭିତରେ ଧୂଆଁ ଭରିଯାଇଥିଲା । ଟ୍ରେନ ସରହିନ୍ଦ ଜଙ୍କସନରୁ ବାହାରୁଥିବାରୁ ସ୍ପିଡ କମ୍ ଥିଲା ବୋଲି ଭୟରେ ଯିଏ ଯୁଆଡେ ଧାଇଁଲେ । କିଛି ଯାତ୍ରୀ ପ୍ରାଣ ବିକଳରେ କିଛି ଏମର୍ଜେନ୍ସି ଡୋର ଖୋଲି ତଳକୁ ଡେଇଁବା ଆରମ୍ଭ କରିଥିଲେ । ଏଥିରେ ୪ ଜଣ ଆହତ ହୋଇଛନ୍ତି ।

ଏହି ସୂଚନା ପାଇ ତୁରନ୍ତ ସେଠାରେ ଜିଆରପି ଅଧିକାରୀ ପହଞ୍ଚିଥିଲେ । ତେବେ ଜଣେ ଯାତ୍ରୀ ଟ୍ରେନରେ ବାଣ ନେଇ ଯାଉଥିବା ବେଳେ ରଖିଥିବା ସ୍ଥାନରେ ବିଦ୍ୟୁତ ସର୍ଟ ସର୍କିଟ ହୋଇ ନିଆଁ ଧାସ ବାଣ ଉପରେ ପଡିଥିଲା ଓ ବାଣ ଫୁଟିବା ଆରମ୍ଭ କରିଥିଲା ।

ତେବେ ଗତ କିଛିଦିନ ହେଲାଣି ବିମାନ, ଟ୍ରେନକୁ ବୋମାରେ ଉଡାଇଦେବାକୁ ଧମକ ମିଳିବା ପରେ ଭୟଭୀତ ରହିଛନ୍ତି ଲୋକ । ତେଣୁ କିଛି ବି ବିସ୍ଫୋରଣ ହେଲେ ଡରି ଯାଉଛନ୍ତି ଯାତ୍ରୀ ।