କରୋନା ସଙ୍କଟ ମଧ୍ୟରେ ସାମ୍ନାକୁ ଆସିଲା ବାବା ଅମରନାଥଙ୍କ ପ୍ରଥମ ଫଟୋ, ଆପଣ ବି କରନ୍ତୁ ଦର୍ଶନ

ସାରା ଦେଶ ଏବେ କରୋନା ସଙ୍କଟ ଦେଇ ଗତି କରୁଛି। ଭାରତରେ ଲକଡାଉନର ଅବଧିକୁ ମେ ୩ ଯାଏଁ ବଢ଼ାଇ ଦିଆଯାଇଛି। ଏହି ସଂକ୍ରମଣର ପ୍ରଭାବ ବାବା ଅମରନାଥଙ୍କ ଯାତ୍ରା ଉପରେ ମଧ୍ୟ ପଡ଼ିଛି। ଯାତ୍ରାର ଆଡ଼ଭାନ୍ସ ପଞ୍ଜିକରଣକୁ ମେ ୪ ଯାଏଁ ସ୍ଥଗିତ ରଖାଯାଇଛି। ତେବେ ଏହି ସଙ୍କଟ ସମୟରେ ବାବା ଅମରନାଥଙ୍କ ଫଟୋ ସାମ୍ନାକୁ ଆସିଛି।

ଅମରନାଥ ଗୁମ୍ଫାରେ ବାବାଙ୍କ ସ୍ୱୟଂଭୁ ଶିବଲିଙ୍ଗ ତିଆରି ହେବା ଆରମ୍ଭ ହୋଇଯାଇଛି। ସୂଚନାଯୋଗ୍ୟ ଯେ ଏପ୍ରିଲ ୧ରୁ ଅମରନାଥ ଯାତ୍ରାର ପଞ୍ଜିକରଣ ଆରମ୍ଭ ହେବାକୁ ଥିଲା। ମାତ୍ର ଲକଡାଉନ ଯୋଗୁ ପ୍ରଥମେ ଏହାକୁ ଏପ୍ରିଲ ୧୫କୁ ଓ ପରେ ମେ ୪ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ଏଣୁ ପୂର୍ବରୁ ନିର୍ଦ୍ଧାରିତ ହୋଇଥିବା ୨୩ ଜୁନରେ ଅମରନାଥ ଯାତ୍ରା ହେବା ନେଇ ସନ୍ଦେହ ଉପୁଜିଛି। ବାବାଙ୍କ ଯାତ୍ରାରେ କରୋନା ବାଧକ ସାଜିବାର ଆଶଙ୍କା ଦେଖା ଦେଇଛି।

ପ୍ରତିବର୍ଷ ଏହି ସମୟରେ ଯାତ୍ରା ପାଇଁ ବୁକିଂ ହେବା ସହ ଗୁମ୍ଫା ପର୍ଯ୍ୟନ୍ତ ରାସ୍ତାକୁ ସରକାରଙ୍କ ତରଫରୁ ପରିଷ୍କାର କରାଯାଏ। ମାତ୍ର କରୋନା ଯୋଗୁ ବାଲଟାଲ ଓ ପହଲଗ୍ରାମ ପଥର ବରଫକୁ ଏପର୍ଯ୍ୟନ୍ତ ସଫା କରାଯାଇନାହିଁ। ପ୍ରଶାସନ ଓ ସରକାରଙ୍କ ସମ୍ପୂର୍ଣ୍ଣ ଧ୍ୟାନ ଏବେ କରୋନା ଉପରେ ରହିଛି। ଏଣୁ ଅମରନାଥ ଯାତ୍ରାକୁ ନେଇ ଆଶଙ୍କା ସୃଷ୍ଟି ହୋଇଛି।