କରୋନା ମୁକାବିଲା ନେଇ କେନ୍ଦ୍ର ତଥା ବିଭିନ୍ନ ରାଜ୍ୟ ସରକାର ମାନେ ତତ୍ପର ଥିବା ବେଳେ ବିଭିନ୍ନ ରାଜ୍ୟର ଡାକ୍ତର ତଥା ନର୍ସ ମାନେ ବି ନିଜ ନିଜ ସେବା ଯୋଗାଇବାରେ ଲାଗି ପଡିଛନ୍ତି । ସଂକ୍ରମଣ ହେବା ଭୟରେ ଅନେକ ସ୍ୱାସ୍ଥ୍ୟ କର୍ମୀ ମାନଙ୍କୁ ନିଜ ନିଜ ବାସ ଭବନ ଘର ମାଲିକ ମାନେ ଘରୁ ବାହାର କରି ଦେଉଛନ୍ତି । ଭୟରେ ଅନେକ ଲୋକେ ସେମାନଂକୁ ଘରୁ ବାହାର କରି ଦେଉଥିବା ବେଳେ ସେହି ସ୍ୱାସ୍ଥ୍ୟ କର୍ମୀଙ୍କୁ ସାହାଯ୍ୟର ହାତ ବଢ଼ାଇଛନ୍ତି ସୂଚନା ସାହ ନାମକ ଜଣେ ଯୁବତୀ ।
କୋଭିଡ-୧୯ ରୋଗୀ ମାନଙ୍କ ସେବା କରୁଥିବା ସ୍ୱାସ୍ଥ୍ୟ କର୍ମୀଙ୍କ ପ୍ରତି ହେଉଥିବା ଅପମାନ ଓ ଦୁର୍ବ୍ୟବହାର ବିଷୟରେ ବିଭିନ୍ନ ସୂତ୍ରରୁ ପଢି ଏହି ଯୁବତୀ ଜଣକ ଯେମିତି ବ୍ୟସ୍ତ ହୋଇଯାଇଥିଲେ । ଏବିଷୟରେ ଅନେକ ଚିନ୍ତା କରିବାରୁ ଏକ ଉପାୟ ତାଙ୍କ ମୁଣ୍ଡକୁ ଜୁଟିଲା । ଛଅ ମାସରୁ ସମ୍ପୂର୍ଣ୍ଣ ଖାଲି ପଡିଥିବା ନିଜ ବ୍ୟବସାୟୀ ପିତାଙ୍କ 2 ଟି ଫ୍ଲାଟରେ ସ୍ୱାସ୍ଥ୍ୟ କର୍ମୀଙ୍କୁ ମାଗଣାରେ ରଖିବା ଚିନ୍ତା ତାଙ୍କ ମନକୁ ଆସିଲା । ପରେ ପିତାଙ୍କ ସହ ଏବାବଦରେ ଆଲୋଚନା କରିବାରୁ ପିତା ମଧ୍ୟ ସହମତି ଦେଇଥିଲେ । ପିତା ମଧ୍ୟ ଝିଅର ଏପରି ଏକ ପ୍ରସ୍ତାବରେ ଖୁସି ହୋଇଥିଲେ ।
ପରେ ନିଜ ନିଜ ବାସଭବନରୁ ବହିଷ୍କାର ହୋଇଥିବା ସ୍ୱାସ୍ଥ୍ୟ କର୍ମୀ ମାନଙ୍କୁ ସେଠାରେ ରଖିବାର ବ୍ୟବସ୍ଥା କଲେ । ଦୀର୍ଘ ଛଅ ମାସରୁ ଫ୍ଲାଟ ଗୁଡିକ ଖାଲି ଥିବାରୁ ଭଡାରେ ଦିଆ ଯିବା ପୂର୍ବରୁ ଭଲ ରୂପେ ସଫା କରାଯାଇଥିଲା । କହି ରଖିବା ଉଚିତ ହେବ ଯେ, ଏପରି ପରିସ୍ଥିତିରେ ବିଭିନ୍ନ ଅଂଚଳର ଡାକ୍ତର ତଥା ନର୍ସ ମନଙ୍କୁ ଅନେକ ଅସୁବିଧାର ସାମ୍ନା କରିବାକୁ ପଡୁଛି । ଏମିତିକି ସେମାନଙ୍କୁ ରହୁଥିବା ଘରୁ ବାହାର କରି ଦିଆଯାଉଛି । ଏମିତିକି ଜଣେ ନର୍ସଙ୍କୁ ତାଙ୍କ ଘରୁ ବାହାର କରି ଦିଆଯିବାରୁ ତାଙ୍କୁ ଦୁଇ ଦିନ ଧରି ସେ କମ କରୁଥିବା ହସ୍ପିଟାଲରେ ହିଁ ରହିବାକୁ ପଡିଥିଲା ।