ବାଗେଶ୍ୱର ଧାମକୁ ପ୍ରବଚନ ଶୁଣିବାକୁ ନେଲେନି ସ୍ୱାମୀ, ଜୀବନ ହାରିଲା ସ୍ତ୍ରୀ
ବାଗେଶ୍ୱର ଧାମର ମହନ୍ତ ଧୀରେନ୍ଦ୍ର ଶାସ୍ତ୍ରୀଙ୍କ ଦରବାରକୁ ସ୍ୱାମୀ ନେଲେ ନାହିଁ ବୋଲି ଜୀବନ ହାରିଲେ ସ୍ତ୍ରୀ । ଘଟଣାଟି ମଧ୍ୟପ୍ରଦେଶର ଅଧାରତାଲ ଥାନା କଞ୍ଚନପୁର ଅଞ୍ଚଳରେ ଘଟିଛି । ସ୍ୱାମୀ ଜଣକ ନିଜ ମାକୁ ନେଇ ହସପିଟାଲ ଯାଇ ଫେରିବା ପରେ ପତ୍ନୀ ସୁଇସାଇଡ କରିଦେଇଥିବା ଦେଖିବାକୁ ପାଇଥିଲେ ।
ବାଗେଶ୍ୱର ଧାମର ମହନ୍ତ ଧୀରେନ୍ଦ୍ର ଶାସ୍ତ୍ରୀଙ୍କ କାର୍ଯ୍ୟକ୍ରମକୁ ନେଲେନି ସ୍ୱାମୀ, ସେଥିପାଇଁ ସୁଇସାଇଡ କଲେ ମହିଳା । ଘଟଣାଟି ମଧ୍ୟପ୍ରଦେଶର ଅଧାରତାଲ ଥାନା କଞ୍ଚନପୁର ଅଞ୍ଚଳରେ ଘଟିଛି । ପଲ୍ଲବୀ ଚୌଧୁରୀ ନାମକ ଜଣେ ମହିଳା ଫାଶୀ ଲଗାଇ ଆତ୍ମହତ୍ୟା କରିଛନ୍ତି । ମହିଳା ଜଣକ ଆତ୍ମହତ୍ୟା କରିବା ପରେ ସଂପୂର୍ଣ୍ଣ ପରିବାର ଦୁଃଖରେ ଭାଙ୍ଗିପଡିଛି ।
ସୂଚନା ମୁତାବକ, ମଧ୍ୟପ୍ରଦେଶର ଅଧାରତାଲ ଥାନା କଞ୍ଚନପୁର ଅଞ୍ଚଳରେ ସନ୍ଦୀପ ଚୌଧୁରୀ ଏବଂ ପତ୍ନୀ ପଲ୍ଲବୀ ଚୌଧୁରୀ ଦୁଇ ପିଲା ଏବଂ ମାଙ୍କ ସହିତ ରହୁଥିଲେ । ବୃଦ୍ଧା ମା’ର ସ୍ୱାସ୍ଥ୍ୟବସ୍ଥା ଗୁରୁତର ରହିଥିଲା । ସନ୍ଦୀପଙ୍କ ଆର୍ଥିକ ସ୍ଥିତି ମଧ୍ୟ ଭଲ ନଥିଲା । ଦୁଇ ପିଲାଙ୍କୁ ପାଠ ପଢା ଠାରୁ ଆରମ୍ଭ କରି ଘର ଖର୍ଚ୍ଚ ଏବଂ ମା’ର ସ୍ୱାସ୍ଥ୍ୟବସ୍ଥାକୁ ନେଇ ବେଶ୍ ଚିନ୍ତାରେ ଥିଲେ ସନ୍ଦୀପ । ତେବେ ସନ୍ଦୀପଙ୍କ ପତ୍ନୀ ପଲ୍ଲବୀ ସବୁଦିନ ଧୀରେନ୍ଦ୍ର ଶାସ୍ତ୍ରୀଙ୍କ ପ୍ରବଚନ ଶୁଣନ୍ତି । ଆଉ ଘରର ସମସ୍ୟା ସାମାଧାନ କରିବା ପାଇଁ ଯାହା ଉପଦେଶ ଦିଅନ୍ତି, ସେ ତାକୁ ପାଳନ ମଧ୍ୟ କରନ୍ତି ।
ତେବେ ୨୭ ମାର୍ଚ୍ଚରେ ପଲ୍ଲବୀ ବାଗେଶ୍ୱର ଧାମର ମହନ୍ତଙ୍କ କାର୍ଯ୍ୟକ୍ରମକୁ ଯିବାକୁ ଜିଦି ଧରିଥିଲେ । ସନ୍ଦୀପଙ୍କ ମା’ଙ୍କ ସ୍ୱାସ୍ଥ୍ୟ ଭଲ ନଥିବାରୁ ସେ ତାଙ୍କୁ ହସପିଟାଲ ନେଇ ଯାଇଥିଲେ । ଆଉ ଡାକ୍ତର ଆସିନଥିବାରୁ ହସପିଟାଲରେ ଟିକେ ବିଳମ୍ବ ହୋଇଯାଇଥିଲା । ସେପଟେ ଘରେ ପ୍ରବଚନ ପାଇଁ ଯିବାକୁ ଅପେକ୍ଷା କରିଥିବା ପଲ୍ଲବୀ ରାଗରେ ଆତ୍ମହତ୍ୟା କରିଦେଇଥିଲେ । ଡାକ୍ତରଖାନାରୁ ଫେରି ସନ୍ଦୀପ ପତ୍ନୀଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ ।
ଘଟଣା ପରେ ପଡୋଶୀ ତୁରନ୍ତ କବାଟ ଭାଙ୍ଗିଥିଲେ । ତା’ ପରେ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ମାମଲା ରୁଜୁ କରି ତଦନ୍ତ କରୁଛି ।
