କାଲିଠାରୁ କାର୍ଯ୍ୟରେ ଯୋଗ ଦେବେ ଜୁନିଅର ଡାକ୍ତର, ଆଜି ସ୍ବାସ୍ଥ୍ୟ ଭବନରୁ ସିବିଆଇ ଅଫିସ ଯାଏଁ ଶୋଭାଯାତ୍ରା
ଆସନ୍ତାକାଲିଠାରୁ କାର୍ଯ୍ୟରେ ଯୋଗ ଦେବେ ଜୁନିଅର ଡାକ୍ତର । କୋଲକାତା ଆରଜିକର ମେଡିକାଲ କଲେଜ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ବିରୋଧ କରି ଚାଲିଥିବା ଜୁନିଅର ଡାକ୍ତରଙ୍କ ଆନ୍ଦୋଳନ ପ୍ରତ୍ୟାହୃତ ହୋଇଛି । ୪୧ ଦିନର ଆନ୍ଦୋଳନ ପରେ କାଲିଠାରୁ କାର୍ଯ୍ୟରେ ଯୋଗଦେବାକୁ ନିଷ୍ପତ୍ତି ନେଇଛନ୍ତି । ତେବେ ଜରୁରୀ ସ୍ବାସ୍ଥ୍ୟ ସେବାରେ ଯୋଗଦେବେ । ଆଜି ଅହରାହ୍ଣ ୩ଟାବେଳେ ସ୍ବାସ୍ଥ୍ୟଭବନରୁ ସିବିଆଇ ଅଫିସ ଯାଏଁ ଶୋଭାଯାତ୍ରା କରିବେ ଜୁନିଅର ଡାକ୍ତର । ତଦନ୍ତ ତ୍ବରାନ୍ବିତ କରିବାକୁ ସିବିଆଇ ଉପରେ ଚାପ ପକାଇବାକୁ ଏହି ଶୋଭାଯାତ୍ରା କରିବେ ।
ଗୁରୁବାର ପଶ୍ଚିମବଙ୍ଗ ସରକାରଙ୍କ ସହ ଆଲୋଚନା ପରେ ଆନ୍ଦୋଳନ ପ୍ରତ୍ୟାହାର ନିଷ୍ପତ୍ତି ନେଇଛନ୍ତି ଜୁନିଅର ଡାକ୍ତର । ତେବେ ସବୁ ମେଡିକାଲରେ ଧାରଣା ମଞ୍ଚ ରହିବ ବୋଲି କହିଛି ଜୁନିଅର ଡାକ୍ତର ସଂଘ । କେବଳ ଜରୁରୀ ସ୍ବାସ୍ଥ୍ୟ ସେବାରେ ଯୋଗ ଦେବେ । ଓପିଡିରେ ଯୋଗ ଦେବେନି । ବନ୍ୟାକୁ ଦୃଷ୍ଟିରେ ରଖି ମାନବିକତା ଦୃଷ୍ଟିରୁ ଏହି ନିଷ୍ପତ୍ତି ନେଇଥିବା ସଂଘ କହିଛି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଡାକ୍ତରଙ୍କୁ କାର୍ଯ୍ୟରେ ଯୋଗ ଦେବାକୁ ଅନୁରୋଧ କରିଥିଲେ ।
ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ପ୍ରତିବାଦରେ ଅଗଷ୍ଟ ୯ ତାରିଖରୁ ଜୁନିୟର ଡାକ୍ତର ମାନେ ଆନ୍ଦୋଳନ ଚଲାଇଥିଲେ । ସୋମବାର ମମତାଙ୍କ ସହ ଆନ୍ଦୋଳନକାରୀ ଡାକ୍ତରଙ୍କ ସହ ଆଲୋଚନା ହୋଇଥିଲା । ଏଥିରେ ଡାକ୍ତରଙ୍କ ୫ଟି ଦାବିରୁ ତିନୋଟିକୁ ମମତା ତତ୍କାଳ ପୂରଣ କରିଥିଲେ ।
