ଲୋକସଭା ବାଚସ୍ପତି ଓମ୍ ବିର୍ଲାଙ୍କ ଝିଅ ଅଞ୍ଜଳି ବିବାହ ବନ୍ଧନରେ ଆବଦ୍ଧ, ବନ୍ଧୁଙ୍କ ହାତ ଧରିଲେ

ଲୋକସଭା ବାଚସ୍ପତି ଓମ୍ ବିର୍ଲାଙ୍କ ଝିଅ ଅଞ୍ଜଳି ବିର୍ଲା ବିବାହ ବନ୍ଧନରେ ବାନ୍ଧି ହୋଇଛନ୍ତି । ସାତ ଜନମ ପାଇଁ ସେ ନିଜର ବନ୍ଧୁ ଅନିସ୍ ରାଜାନୀଙ୍କ ହାତ ଧରିଛନ୍ତି । ମଙ୍ଗଳବାର ରାତିରେ ରାଜସ୍ଥାନର କୋଟାରେ ବିବାହ ଉତ୍ସବ ଆୟୋଜିତ ହୋଇଥିଲା । ବିବାହର ସମସ୍ତ ରୀତିନୀତି ଜିଏମଏ ଟାଉନଶିପରେ ସମ୍ପନ୍ନ ହୋଇଥିଲା ।

ଆଜି ସ୍ୱାଗତ ସମାରୋହରେ ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମାଙ୍କ ସମେତ ଅନେକ ଭିଆଇପି ପହଞ୍ଚିବେ । ମୁଖ୍ୟମନ୍ତ୍ରୀ ସନ୍ଧ୍ୟାରେ କୋଟା ଏୟାରପୋର୍ଟରେ ଓହ୍ଲାଇବେ । ବୁଧବାର ସକାଳେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଡା. ମୋହନ ଯାଦବ ମଧ୍ୟ ବିର୍ଲାଙ୍କ ବାସଭବନରେ ପହଞ୍ଚି ବରକନ୍ୟାଙ୍କୁ ଆଶୀର୍ବାଦ ଦେଇଛନ୍ତି । ଏଠାରେ ନବଦମ୍ପତିଙ୍କୁ ଆଶୀର୍ବାଦ ଦେବା ପାଇଁ ଅନେକ ପ୍ରମୁଖ ମନ୍ତ୍ରୀ, ସାଂସଦ, ବିଧାୟକ, ଅଧିକାରୀ ଏବଂ ସେଲିବ୍ରିଟି ପହଞ୍ଚିଛନ୍ତି ।

ଅତ୍ୟନ୍ତ ଭବ୍ୟ ତରିକାରେ ଅଞ୍ଜଳି ଓ ଅନିସଙ୍କ ବିବାହ ଉତ୍ସବ ଆୟୋଜନ କରାଯାଇଥିଲା । ଏଥିରେ ଯୋଗ ଦେଇଥିବା ଅତିଥିମାନେ ନବଦମ୍ପତିଙ୍କୁ ଆଶୀର୍ବାଦ ଦେଇଥିଲେ । ଏହି ଖୁସିର ଅବସରରେ ଅତିଥିମାନେ ଓମ୍ ବିର୍ଲା ଏବଂ ତାଙ୍କ ପରିବାରକୁ ଶୁଭେଚ୍ଛା ଜଣାଇଥିଲେ । ସେପଟେ ଓମ୍ ବିର୍ଲା ମଧ୍ୟ ଅତିଥି ସତ୍କାର କରିଥିଲେ ।

ଏବେ ଅଞ୍ଜଳି ଓ ଅନିସଙ୍କ ବିବାହ ଭିଡିଓ ସାମ୍ନାକୁ ଆସିଛି । ଏଥିରେ ଉଭୟ ଫିଲ୍ମ ଗୀତରେ ଝୁମୁଥିବାର ନଜର ଆସିଛନ୍ତି । ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି ।